ಪ್ರೀತಿ ಹೆಸರಲ್ಲಿ ಮಹಿಳೆಯರಿಗೆ ಧೋಖಾ: ಅಪರಿಚಿತರಿಗೆ ಖಾಸಗಿ ದೃಶ್ಯ ಕಳುಹಿಸಿ ಪೇಚು

ಬೆಂಗಳೂರು: ಸಾಮಾಜಿಕ ಜಾಲತಾಣಗಳಲ್ಲಿ ಮಹಿಳೆಯ ರನ್ನು ಪರಿಚಯಿಸಿಕೊಂಡು ಪ್ರೀತಿಸುವುದಾಗಿ ನಂಬಿಸಿ, ಅವರಿಂದಲೇ ಖಾಸಗಿ ದೃಶ್ಯ ತರಿಸಿಕೊಂಡು ಬ್ಲಾ್ಯಕ್​ವೆುೕಲ್ ಮಾಡುವ ಪ್ರಕರಣಗಳು ದಿನೇದಿನೆ ಹೆಚ್ಚುತ್ತಿವೆ.

ಈ ವಿಚಾರವಾಗಿ ‘ಪರಿಹಾರ್’ ಕೇಂದ್ರದಲ್ಲಿ ಕಳೆದ ಏಪ್ರಿಲ್​ನಲ್ಲಿ 418 ಪ್ರಕರಣಗಳು ದಾಖಲಾಗಿದ್ದವು. ಮೇನಲ್ಲಿ ಈ ಸಂಖ್ಯೆ 803ಕ್ಕೆ ಏರಿಕೆಯಾಗಿತ್ತು. ಆದರೆ, ಜೂನ್​ನಲ್ಲಿ 1,014 ಮಹಿಳಾ ದೌರ್ಜನ್ಯ ಪ್ರಕರಣ ದಾಖಲಾಗಿದ್ದು, ಇದರಲ್ಲಿ 80ಕ್ಕೂ ಅಧಿಕ ಕೇಸ್​ಗಳು ಸೈಬರ್ ಅಪರಾಧಗಳಿಗೆ ಸಂಬಂಧಿಸಿವೆ. ಆರೋಪಿಗಳ ಬಲೆಗೆ ಬಿದ್ದ ಮಹಿಳೆಯರು ಮಾನಕ್ಕೆ ಅಂಜಿ ಪೇಚಿಗೆ ಸಿಲುಕುತ್ತಿದ್ದಾರೆ. ಅಂಥ ಕೆಲವು ಕೇಸ್​ಗಳ ವಿವರ ಇಲ್ಲಿದೆ.

ಅಪ್​ಲೋಡ್ ಮಾಡುವ ಬೆದರಿಕೆ: ನಗರದ ಕಾಲೇಜೊಂದರಲ್ಲಿ ದ್ವಿತೀಯ ಪಿಯು ವ್ಯಾಸಂಗ ಮಾಡುತ್ತಿದ್ದ 19 ವರ್ಷದ ಯುವತಿಗೆ ಬೆಂಗಳೂರಿನಲ್ಲಿ ಚಾರ್ಟೆರ್ಡ್ ಅಕೌಂಟೆಂಟ್ ವ್ಯಾಸಂಗ ಮಾಡುತ್ತಿರುವ 23 ವರ್ಷದ ಯುವಕ 3 ತಿಂಗಳ ಹಿಂದೆ ಇನ್​ಸ್ಟಾಗ್ರಾಂನಲ್ಲಿ ಪರಿಚಯವಾಗಿದ್ದ. ಇಬ್ಬರ ನಡುವೆ ಸಲುಗೆ ಬೆಳೆದು ಮೊಬೈಲ್ ನಂಬರ್ ವಿನಿಮಯ ಮಾಡಿಕೊಂಡಿದ್ದರು. ವಿಡಿಯೋ ಕರೆ ಮಾಡುತ್ತಿದ್ದ ಯುವಕ ಖಾಸಗಿ ದೃಶ್ಯ ಕಳುಹಿಸುವಂತೆ ಪೀಡಿಸುತ್ತಿದ್ದುದರಿಂದ ಯುವತಿ ಕಳುಹಿಸಿದ್ದಳು. ಯುವಕ ಇತ್ತೀಚೆಗೆ ಆಕೆಯನ್ನು ನಿರ್ಲಕ್ಷಿಸಿದ್ದ. ಈ ಬಗ್ಗೆ ಪ್ರಶ್ನಿಸಿದಾಗ, ‘ನೀನು ಕಳುಹಿಸಿದ ಖಾಸಗಿ ವಿಡಿಯೋ ಗಳನ್ನು ಅಪ್​ಲೋಡ್ ಮಾಡುತ್ತೇನೆ’ ಎಂದು ಬೆದರಿಸಿದ್ದ. ಯುವತಿ ಪರಿಹಾರ ಕೇಂದ್ರದ ಮೊರೆ ಹೋಗಿದ್ದು, ಸಿಬ್ಬಂದಿ ಯುವಕನನ್ನು ಕರೆಸಿ ಎಚ್ಚರಿಕೆ ಕೊಟ್ಟು ಕಳುಹಿಸಿದ್ದಾರೆ.

ವಿಡಿಯೋ ಕಳಿಸಿ ಪೇಚಿಗೆ ಸಿಕ್ಕ ಲೇಡಿ: ರಾಜಸ್ಥಾನ ಮೂಲದ 36 ವರ್ಷದ ವಿವಾಹಿತೆಗೆ ಬೆಂಗಳೂರಿನ 23 ವರ್ಷದ ಮೆಕಾನಿಕ್ 6 ತಿಂಗಳ ಹಿಂದೆ ಫೇಸ್​ಬುಕ್ ನಲ್ಲಿ ಫ್ರೆಂಡ್ ರಿಕ್ವೆಸ್ಟ್ ಕಳುಹಿಸಿದ್ದ. ಆತ ಕಳುಹಿಸುತ್ತಿದ್ದ ಸಂದೇಶಗಳಿಗೆ ಮಹಿಳೆ ಪ್ರತಿಕ್ರಿಯಿಸುತ್ತಿದ್ದಳು. ಕ್ರಮೇಣ ಇಬ್ಬರೂ ಅಶ್ಲೀಲ ಚಾಟ್ ಆರಂಭಿಸಿದ್ದರು. ಅಲ್ಲದೆ ಯುವಕನ ಒತ್ತಾಯದ ಮೇರೆಗೆ ಮಹಿಳೆ ಹಲವು ಬಾರಿ ತನ್ನ ಖಾಸಗಿ ದೃಶ್ಯವನ್ನು ಫೇಸ್​ಬುಕ್​ನಲ್ಲಿ ಕಳುಹಿಸಿದ್ದಳು. ಮಹಿಳೆಯ ಪತಿ ರಾಜಸ್ಥಾನದಲ್ಲಿ ಬಟ್ಟೆ ವ್ಯಾಪಾರ ಮಾಡುತ್ತಿದ್ದು, ಲಾಕ್​ಡೌನ್ ಹಿನ್ನೆಲೆಯಲ್ಲಿ ಮನೆಯಲ್ಲೇ ಇರುತ್ತಿದ್ದರು. ಆಗ ಚಾಟ್ ಮಾಡಲು ಆಗಿರಲಿಲ್ಲ. ಈ ಬಗ್ಗೆ ಪ್ರಶ್ನಿಸಿದ ಯುವಕ, ‘ನನ್ನೊಂದಿಗೆ ಮಾತನಾಡದಿದ್ದರೆ ಖಾಸಗಿ ವಿಡಿಯೋ ಅಪ್​ಲೋಡ್ ಮಾಡುತ್ತೇನೆ’ ಎಂದಿದ್ದ. ಆಗ ಮಹಿಳೆ ರಾಜಸ್ಥಾನದಿಂದಲೇ ಪರಿಹಾರ ಕೇಂದ್ರದ ಆಪ್ತ ಸಮಾಲೋಚಕರಿಗೆ ಕರೆ ಮಾಡಿ ದೂರಿದ್ದಾಳೆ. ಪರಿಹಾರ ಕೇಂದ್ರ ಸಿಬ್ಬಂದಿ ಯುವಕನಿಗೆ ಬುದ್ಧಿ ಹೇಳಿ, ಜೈಲಿಗೆ ಕಳುಹಿಸುವುದಾಗಿ ಎಚ್ಚರಿಕೆ ನೀಡಿ ಪ್ರಕರಣ ಇತ್ಯರ್ಥ ಪಡಿಸಿದ್ದಾರೆ.

24 ಗಂಟೆ ಸೇವೆ: ಕರೊನಾ ಭೀತಿಯಿಂದ ಮನೆಯಲ್ಲೇ ಇರುವವರ ಸಂಖ್ಯೆ ಹೆಚ್ಚಾಗಿದೆ. ಇದರಿಂದ ದಿನೇದಿನೆ ಮಹಿಳಾ ದೌರ್ಜನ್ಯಗಳ ಪ್ರಕರಣಗಳೂ ಏರಿಕೆಯಾಗುತ್ತಿವೆ. ಹೀಗಾಗಿ ‘ಪರಿಹಾರ್’ ಇದೀಗ ದಿನದ 24 ಗಂಟೆಯೂ ದೂರವಾಣಿ ಸಂಪರ್ಕದ ಮೂಲಕ ಆಪ್ತಸಮಾಲೋಚಕರನ್ನು ಸಂರ್ಪಸಲು ಅವಕಾಶ ಕಲ್ಪಿಸಿದೆ.

| ಅವಿನಾಶ ಮೂಡಂಬಿಕಾನ