ಚನ್ನಗಿರಿ: ಭಾರೀ ಮಳೆಗೆ 16 ಮನೆಗಳು ಧ್ವಂಸ, ₹10.5 ಲಕ್ಷ ನಷ್ಟ; 'ಪ್ರಕೃತಿ ವಿಕೋಪ'ದಡಿ ಪರಿಹಾರ ಭರವಸೆ ನೀಡಿದ ತಹಸೀಲ್ದಾರ್

ಹಾನಿಗೊಳಗಾದ ಗ್ರಾಮಗಳು ಮತ್ತು ರಸ್ತೆ ಸಂಪರ್ಕ ಕಡಿತ

ಮಳೆಯಿಂದಾಗಿ ತಾಲೂಕಿನಾದ್ಯಂತ ಕೆರೆಗಳು ಕೋಡಿ ಬಿದ್ದಿದ್ದು, ಕೆಲವು ಗ್ರಾಮಗಳಲ್ಲಿ ಸಂಪರ್ಕ ಕಡಿತಗೊಂಡಿದೆ.

• ಮನೆಗಳಿಗೆ ಹಾನಿ: ತಾಲೂಕಿನ ಲಕ್ಷ್ಮೀಸಾಗರ, ದೇವರಹಳ್ಳಿ, ಗೊಂಧಿಹೊಸಳ್ಳಿ, ನಲ್ಲೂರು, ನವಿಲೇಹಾಳು, ಚನ್ನೇಶಪುರ, ಲಕ್ಷ್ಮೀಸಾಗರ, ಹರೋನಹಳ್ಳಿ, ವೆಂಕಟೇಶ್ವರ ಕ್ಯಾಂಪ್ ಗ್ರಾಮಗಳಲ್ಲಿ ತಲಾ ಒಂದು ಮನೆ ಹಾನಿಯಾಗಿದೆ. ಬೈರನಹಳ್ಳಿ, ಮಾವಿನಹೊಳೆ ಗ್ರಾಮಗಳಲ್ಲಿ ತಲಾ ಮೂರು ಮತ್ತು ತಿಳಿನೀರುಕಟ್ಟೆ ಗ್ರಾಮದಲ್ಲಿ ಎರಡು ಮನೆಗಳು ಬಿದ್ದಿವೆ.
• ಜಲಾವೃತ: ಬೈರನಹಳ್ಳಿ, ದೇವರಹಳ್ಳಿ ಹಾಗೂ ಮಾವಿನಹೊಳೆ ಗ್ರಾಮಗಳಲ್ಲಿ ಮಳೆನೀರು ಮನೆಗಳಿಗೆ ನುಗ್ಗಿದೆ.
• ಕೆರೆಗಳು ಕೋಡಿ: ಕೊರಟಿಕೆರೆ ಮತ್ತು ಮಾವಿನಹೊಳೆ ಕೆರೆಗಳು ಕೋಡಿ ಬಿದ್ದಿದ್ದು, ಹಿರೇಮಳಲಿ ವಡ್ಡಿನ ಕೆರೆ ಏರಿ ಒಡೆದು ನೀರು ತೋಟಗಳಿಗೆ ನುಗ್ಗಿದೆ. ಹಿರೇಮಳಲಿ ಕೆರೆ ಕೋಡಿ ಬಿದ್ದ ಪರಿಣಾಮ ಎಂ.ಜಿ. ಈಶ್ವರಪ್ಪ ಅವರ ತೋಟ ಜಲಾವೃತಗೊಂಡಿದೆ.
• ರಸ್ತೆ ಸಂಪರ್ಕ ಕಡಿತ: ನಲ್ಲೂರಿನಿಂದ ಹಿರೇಮಳಲಿಗೆ ಹೋಗುವ ರಸ್ತೆ ಹಾಗೂ ಬುಳಸಾಗರ ಮತ್ತು ಚಿರಡೋಣಿ ಗ್ರಾಮದ ರಸ್ತೆ ಮೇಲೆ ನೀರು ನಿಂತು ಜನ ಸಂಚಾರಕ್ಕೆ ಅಡಚಣೆ ಉಂಟಾಯಿತು.

ದೇವಸ್ಥಾನ ಜಲಾವೃತ, ಪಟ್ಟಣದಲ್ಲಿ ಮೀನು ಹಿಡಿಯಲು ಮುಗಿಬಿದ್ದ ಜನ

ಮಳೆಯ ರಭಸಕ್ಕೆ ಬುಳಸಾಗರ ಗ್ರಾಮದ ಶ್ರೀ ಸಿದ್ದರಾಮೇಶ್ವರ ದೇವಸ್ಥಾನದ ಅಂಗಳದಲ್ಲಿ ನೀರು ನಿಂತು ದೇವಸ್ಥಾನದ ಸಂಪರ್ಕವೇ ಕಡಿದು ಹೋಗಿತ್ತು.

ಇನ್ನು, ಕೋಗಲೂರು ಗ್ರಾಮದ ಚಿಕ್ಕಹಳ್ಳ ತುಂಬಿ ಹರಿದು ಕಾರಿಗನೂರು ಗ್ರಾಮದ ಅಡಕೆ ತೋಟಗಳು ಜಲಾವೃತಗೊಂಡಿವೆ. ಚನ್ನಗಿರಿ ಪಟ್ಟಣದಲ್ಲಿ ಹರಿಯುವ ಹರಿದ್ರಾವತಿ ಹಳ್ಳವೂ ತುಂಬಿ ಹರಿಯುತ್ತಿದೆ.

ಪುಟ್ಟಬಸಪ್ಪನ ಕೆರೆ ಕೋಡಿ ಬಿದ್ದು ರಸ್ತೆಯ ಮೇಲೆ ನೀರು ಹರಿಯುತ್ತಿದ್ದಾಗ, ಈ ನೀರಿನಲ್ಲಿ ಬರುತ್ತಿದ್ದ ಮೀನುಗಳನ್ನು ಹಿಡಿಯಲು ಜನರು ಹೆಚ್ಚಿನ ಸಂಖ್ಯೆಯಲ್ಲಿ ಸೇರಿದ್ದರು. ಪರಿಸ್ಥಿತಿ ನಿಯಂತ್ರಿಸಲು ಪುರಸಭೆಯವರು ಜೆಸಿಬಿ ಬಳಸಿ ಕೋಡಿ ಹರಿಯುವ ಜಾಗವನ್ನು ಸ್ವಚ್ಛಗೊಳಿಸಿದ ನಂತರ ರಸ್ತೆಗೆ ಬರುತ್ತಿದ್ದ ನೀರು ನಿಂತು ಸಾಮಾನ್ಯ ಸ್ಥಿತಿಗೆ ಮರಳಿತು.