ಮೂಲನಿವಾಸಿಗಳಲ್ಲಿ ಒಬ್ಬರಾದ ಪಣಿಕ ಜನಾಂಗದ ವ್ಯಕ್ತಿಯಿಂದ ವಿವಿಧ ತೆರೆಗಳು ಸಾಂಪ್ರದಾಯಿಕ ವಿಧಿವಿಧಾನಗಳೊಂದಿಗೆ ನಡೆಯಿತು. ರಾತ್ರಿಯಿಡೀ ವಿವಿಧ ತೆರೆಗಳು ಗಮನ ಸೆಳೆದು ಸೋಮವಾರ ಬೆಳಗ್ಗೆ ಸುಮಾರು ಹತ್ತು ಘಂಟೆಯ ಸಮಯದಲ್ಲಿ ಆರಂಭಗೊಂಡ "ಪಾತಾಳ ಪತ್ತ್ ಕೂಟ ಮಂದಣ ಮೂರ್ತಿ ತೆರೆ" ವಿಶೇಷ ಗಮನ ಸೆಳೆಯಿತು. ತವರುಮನೆ ಹುಡುಗಿಯರು ವಿವಿಧ ಹರಕೆಗಳನ್ನು ಈ ಸಂದರ್ಭದಲ್ಲಿ ನೀಡಿದರು. ಭಾನುವಾರ ಸಂಜೆ ಆರಂಭಗೊಂಡ ವಿವಿಧ ತೆರೆಗಳಲ್ಲಿ ಪೂತೆರೆ, ಚಾವುಂಡಿ ತೆರೆ, ಕುಳಿಯ(ಭೂಮಿ ಗುಳಿಗ), ಕಾಳಿ ಪೊಲ್ತಿ, ನುಚ್ಚುಟ್ಟೆ, ಸಾರ್ಥಾವು ಹೀಗೆ ಹಲವಾರು ತೆರೆಗಳು ತೆರೆ ಕಟ್ಟುವ ವ್ಯಕ್ತಿಗಳ ಮೇಲೆ ಆವಾಹನೆಗೊಂಡು ಚೆಂಡೆ, ಮದ್ದಳೆ ಹಾಗೂ ಸಾಂಪ್ರದಾಯಿಕ ವಾಲಗದ ನಾದಕ್ಕೆ ಹೆಜ್ಜೆ ಹಾಕಿದರು.
ಭಾನುವಾರ ಸಂಜೆಯಿಂದ ಸೋಮವಾರ ರಾತ್ರಿಯವರೆಗೂ ನಡೆದ ಕಾರ್ಯಕ್ರಮದಲ್ಲಿ ಚಮ್ಮಟೀರ ಕುಟುಂಬದಿಂದ ಮದುವೆಯಾಗಿ ಹೋದ ತವರು ಮನೆ ಹುಡುಗಿಯರು ಹಾಗೂ ಅವರ ಸಂಸಾರ ಸೇರಿದಂತೆ ಹಳ್ಳಿಗಟ್ಟು ಊರಿನ ಗ್ರಾಮಸ್ಥರು, ಅಕ್ಕಪಕ್ಕದ ಊರಿನವರು, ಬಂಧುಗಳು ಹಾಗೂ ಭಕ್ತರು ಪಾಲ್ಗೊಂಡಿದ್ದರು.
