ಗ್ರಾಮದ ಶ್ರೀನಾರಾಯಣಸ್ವಾಮಿ ದೇವಸ್ಥಾನದ ಮುಂಭಾಗ ಮುಂಜಾನೆಯೇ ನಂದಿ ಧ್ವಜ, ಸತ್ತಿಗೆ, ಸೂರಿಪಾಣಿ, ಮಂಗಳವಾದ್ಯ ಹಾಗೂ ವೀರಮಕ್ಕಳ ಕುಣಿತ ಸಮೇತ ಬೆಳಿಗ್ಗೆ 10ಗಂಟೆಯಲ್ಲಿ ತೇರು ಮುಂದಡಿ ಇಟ್ಟಿತು. ಗ್ರಾಮದ ಪ್ರಮುಖ ಬೀದಿಯಲ್ಲಿ ಸಂಚರಿಸಿ ಮಧ್ಯಾಹ್ನ 12.45ರಲ್ಲಿ ಸ್ವಸ್ಥಾನವನ್ನು ತಲುಪಿತು. ಜಯ ಘೋಷಗಳೊಂದಿಗೆ ರಥ ಎಳೆಯಲು ಭಕ್ತರು ಮುಗಿಬಿದ್ದರು. ಬಾಳೆಹಣ್ಣು, ವೀಳ್ಯದೆಲೆ ಎಸೆದು ನಮಿಸಿದರು. ಅಲ್ಲಲ್ಲಿ ಮಜ್ಜಿಗೆ, ಪಾನಕ, ಕೋಸಂಬರಿ , ಪಂಚಾಮೃತವನ್ನು ವಿತರಿಸಲಾಯಿತು. ಭಾನುವಾರ ಬೆಳಗಿನಜಾವ ಶ್ರೀಲಕ್ಷ್ಮೀ ದೇವಿ ಜಾತ್ರೆ ಉರುಳುಸೇವೆಯೊಂದಿಗೆ ಪ್ರಾರಂಭವಾಗಿ ಇಡೀ ರಾತ್ರಿ ನಾನಾ ಧಾರ್ಮಿಕ ಕಾರ್ಯ ಹಾಗೂ ಅದ್ದೂರಿ ಮೆರವಣಿಗೆ ಜರುಗಿತು.
