ಜಿಲ್ಲೆಯವರು ಹುಟ್ಟುತ್ತಲೇ ಪ್ರತಿಭಾವಂತರಾಗಿದ್ದು, ತಮ್ಮ ಪ್ರತಿಭೆಯನ್ನು ಉತ್ತಮವಾಗಿ ಬಳಸಿಕೊಂಡು ಸಮಾಜವನ್ನು ಅಭಿವೃದ್ಧಿ ಮಾಡುವ ಕಡೆ ಗಮನ ಹರಿಸಬೇಕು ಎಂದು ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಹಿರಿಯ ಸಾಹಿತಿ ಪ್ರೊ.ಸಿ.ನಾಗಣ್ಣ ಸಲಹೆ ನೀಡಿದರು. ಕಾರ್ಯಕ್ರಮದಲ್ಲಿ ಸನ್ಮಾನ ಸ್ವೀಕರಿಸಿ ಮಾತನಾಡಿದ ಅವರು, ನಾನು ರಚನೆ ಮಾಡಿರುವ ಸಾಹಿತ್ಯ ಒಂದು ಭಾಗವಾಗಿದೆ. ನಾವು ಮಾಡಿದ ಬೋಧನೆ ಫಲಕೊಡುತ್ತಿದೆ. ನಮ್ಮ ನೆಲದಲ್ಲಿ ಸನ್ಮಾನ ಸ್ವೀಕರಿಸುತ್ತಿರುವುದು ಸಂತಸ ತಂದಿದೆ. ಯಾವ ಹುದ್ದೆಯಲ್ಲೂ ಇಂತಹ ಸಾರ್ಥಕ ಭಾವ ಸಿಗುತ್ತಿರಲಿಲ್ಲ. ಕನ್ನಡ ಭಾಷೆ, ಸಂಸ್ಕೃತಿ ಬಗ್ಗೆ ಎಷ್ಟು ಹೇಳಿದರೂ ಕಡಿಮೆಯೇ. ಕನ್ನಡದ ಜಾಣ್ಮೆಯ ಬಗ್ಗೆ ಪ್ರತಿಯೊಬ್ಬರೂ ಹೆಮ್ಮೆ, ಅಭಿಮಾನ ಪಡಬೇಕು. ಹೆಚ್ಚು ಜನರು ಮಾತನಾಡುವ ಜತೆಗೆ ಪ್ರಾಚೀನವಾಗಿರುವ ಭಾಷೆಗಳಲ್ಲಿ ಕನ್ನಡವೂ ಒಂದಾಗಿದೆ. ಗಡಿನಾಡಿನ ಜನರು ಗಾಂಭೀರ್ಯ, ಗಣತೆ ಮತ್ತು ಸುಖ ಸಂತೋಷದಿಂದ ಬದುಕುವಂತಾಗಬೇಕು ಎಂದರು.
