ಬ್ಯಾಂಕ್ ಮುಂದೆ ಸಾಲುಗಟ್ಟಿ ನಿಂತ ‘ಗೃಹಲಕ್ಷ್ಮಿ’

ಚಾಮರಾಜನಗರ: ನನ್ನ ಖಾತೆಗೆ ಗೃಹಲಕ್ಷ್ಮೀ ಯೋಜನೆಯ ಹಣ ಬಂದಿದೆ ಆದರೆ ತೆಗೆದುಕೊಳ್ಳಲು ಆಗುತ್ತಿಲ್ಲ, ಬ್ಯಾಂಕ್ ಖಾತೆ ಚಾಲ್ತಿಯಲ್ಲಿದ್ದರು ಅಕ್ಕಿ ದುಡ್ಡು ಬಂದಿಲ್ಲ, ವಾರದಿಂದ ಬ್ಯಾಂಕ್‌ಗೆ ಅಳೆದಾಡುತ್ತಿದ್ದರೂ ನನ್ನ ಬ್ಯಾಂಕ್ ಖಾತೆ ಚಾಲ್ತಿ ಆಗುತ್ತಿಲ್ಲ.

ಇದು ಗೃಹಲಕ್ಷ್ಮೀ ಯೋಜನೆ ಹಾಗೂ ಅನ್ನಭಾಗ್ಯ ಯೋಜನೆಯ ಲಾನುಭವಿ ಮಹಿಳೆಯರು ಬ್ಯಾಂಕ್ ಮುಂಭಾಗ ಸಾಲಿನಲ್ಲಿ ನಿಂತು ಬೇಸರದಿಂದ ಹಾಡಿದ ಮಾತುಗಳು. ನಗರದ ಬಿ.ರಾಚಯ್ಯ ಜೋಡಿರಸ್ತೆಯಲ್ಲಿರುವ ಯೂನಿಯನ್ ಬ್ಯಾಂಕ್ ಮುಂಭಾಗ ಸೋಮವಾರ ಚಾಮರಾಜನಗರ ಮತ್ತು ಗುಂಡ್ಲುಪೇಟೆ ತಾಲೂಕಿನ ಹಲವು ಗ್ರಾಮಗಳ ನೂರಾರು ಮಹಿಳೆಯರು ಬೆಳಿಗ್ಗೆಯಿಂದಲೇ ಸಾಲುಗಟ್ಟಿ ನಿಂತು ಹೈರಾಣಾದರು. ಹಲವರು ಬೆಳಿಗ್ಗೆ ತಿಂಡಿ ತಿನ್ನದೇ ಸುಸ್ತಾಗಿ ಬಿದ್ದ ಸನ್ನಿವೇಶವೂ ಎದುರಾಯಿತು. ವಯಸ್ಸಾದ ಮಹಿಳೆಯರು ಸರದಿ ಸಾಲಿನಲ್ಲಿ ನಿಲ್ಲಲು ಆಗದೇ ಹಿಡಿಶಾಪ ಹಾಕುತ್ತ ಹಿಂದಿರುಗಿದರು. ಮಹಿಳೆಯರನ್ನು ನಿಯಂತ್ರಸುವಲ್ಲಿ ಪೊಲೀಸರು ಸುಸ್ತಾದರು.

ಈ ಸಂದರ್ಭದಲ್ಲಿ ಗುಂಡ್ಲಪೇಟೆ ತಾಲೂಕಿನ ಹಂಗಳ ಗ್ರಾಮದ ರಾಣಿ ಎಂಬುವವರು ಮಾತನಾಡಿ, ನಾನು ಧರ್ಮಸ್ಥಳ ಗ್ರಾಮೀಣಾಭಿವೃದ್ಧಿ ಸಂಸ್ಥೆಯ ಸದಸ್ಯಳಾಗಿದ್ದು, ನನ್ನ ಖಾತೆಗೆ ಗೃಹಲಕ್ಷ್ಮೀ ಖಾತೆಯ ಹಣ ಜಮಾಗೊಂಡಿದೆ. ಆದರೆ ಖಾತೆ ಚಾಲ್ತಿಯಲ್ಲಿ ಇಲ್ಲದಾಗಿದ್ದು, ಅದನ್ನು ಮತ್ತೆ ಚಾಲ್ತಿಗೊಳಿಸಲು ಮನವಿ ಸಲ್ಲಿಸಲು ಬಂದಿದ್ದೇನೆ. ಬೆಳಿಗ್ಗೆಯಿಂದ ಸಾಲಿನಲ್ಲಿ ನಿಂತು ಸಾಕಾಗಿದೆ. ಬ್ಯಾಂಕ್‌ನವರು ಮತ್ತಷ್ಟು ಕೌಂಟರ್‌ಗಳನ್ನು ತೆರೆದು ಮಹಿಳೆಯರಿಗೆ ಅನುಕೂಲ ಮಾಡಬೇಕು ಎಂದು ಮನವಿ ಮಾಡಿದರು.

ಕರಿಗೌಡನಹಳ್ಳಿ ಗ್ರಾಮದ ಪ್ರೀತಿ ಎಂಬುವವರು ಮಾತನಾಡಿ, ಸುಮಾರು ಬೆಳಗ್ಗೆ 8 ಗಂಟೆಯಿಂದ ಬ್ಯಾಂಕ್ ಮುಂಭಾಗ ಕಾಯುತ್ತಿದ್ದೇವೆ. ನನ್ನ ಖಾತೆಗೆ ಗೃಹಲಕ್ಷ್ಮೀ ಯೋಜನೆ ಹಾಗೂ ಅನ್ನಭಾಗ್ಯ ಯೋಜನೆಯ ನಗದು ಸಂದಾಯವಾಗಿದೆ. ಆದರೆ ನನ್ನ ಖಾತೆ ಚಾಲ್ತಿಯಾಗಿಲ್ಲ. 20 ದಿನಗಳ ನಂತರ ಚಾಲ್ತಿ ಆಗುತ್ತದೆ ಎಂದು ಹೇಳಿದ್ದರೂ, ತಿಂಗಳು ಕಳೆದರೂ ಆಗಿಲ್ಲ ಇದರಿಂದಾಗಿ ನಿತ್ಯವೂ ಪರದಾಡುವಂತಹ ಸ್ಥಿತಿ ಎದುರಾಗಿದೆ. ಆದಷ್ಟು ಬೇಗ ಬ್ಯಾಂಕ್ ಖಾತೆಗಳು ಚಾಲ್ತಿಯಾಗುವಂತೆ ಸಂಬಂಧಪಟ್ಟ ಅಧಿಕಾರಿಗಳು ಕ್ರಮವಹಿಸಬೇಕು ಎಂದು ಒತ್ತಾಯಿಸಿದರು.