ಗಮನಸೆಳೆದ ಒಲೆ ರಹಿತ ಅಡುಗೆ ಸ್ಪರ್ಧೆ

ಚಾಮರಾಜನಗರ: ಮಹಿಳಾ ದಸರಾ ಅಂಗವಾಗಿ ಆಯೋಜಿಸಿದ್ದ ಒಲೆ ರಹಿತ ಅಡುಗೆ ಸ್ಪರ್ಧೆಯಲ್ಲಿ ಮಹಿಳೆಯರು ತಯಾರಿಸಿದ ವಿವಿಧ ಖಾದ್ಯಗಳು ಗಮನಸೆಳೆಯಿತು.

ಕರಿನಂಜನಪುರ ಬಡಾವಣೆಯ ಶಾರದಾ ಅವರ ತಯಾರಿಸಿದ್ದ ಸ್ವೀಟ್‌ಕಾರ್ನ್ ಸಲಾಡ್. ಗಾಳಿಪುರ ಶಾಯಿದಬಾನು ಮತ್ತು ಮೌಸಿಮಾ ಪಾತೀಮಾ ಆರೋಗ್ಯಕ್ಕೆ ಸಹಕಾರಿಯಾದ ಪಂಜೇರಿ, ಮಕ್ಹಾನ ಲಡ್ಡು ಅತ್ಯಂತ ರುಚಿಕರವಾಗಿತ್ತು. ಬೀಬಿ ಸಬೀನಾ ಕ್ಷಣಮಾತ್ರದಲ್ಲಿ ತಯಾರಿಸಿದ ಫ್ರೂಟ್ ಸಲಾಡ್, ಸರಸ್ವತಿ ಅವರು ತಯಾರಿಸಿದ್ದ ಕ್ಯಾರೆಟ್ ಲಡ್ಡು, ಮಸಾಲ ನಿಪ್ಪಿಟ್ಟು, ಶೋಭಾ ಅವರು ತಯಾರಿಸಿದ್ದ ಡ್ರೈ ಫ್ರೂಟ್ಸ್ ಲಡ್ಡು, ಮೊಳಕೆ ಕಾಳು ಚಾಟ್ಸ್ ಹಾಗೂ ಇನ್ನಿತರೆ ಮಹಿಳೆಯರು ನೀರು ಮಜ್ಜಿಗೆ, ಹೆಸರು ಬೇಳೆ, ಬೆಲ್ಲದ ಪಾನಕ, ಕೋಸಂಬರಿ, ಚನ್ನಾ ಮಸಾಲ, ಮೊಳಕೆ ಕಾಳು ನೆರೆದವರ ಬಾಯಿಯಲ್ಲಿ ನೀರೂರಿಸುವಂತೆ ಮಾಡಿತು.

ಸ್ಪರ್ಧೆಯಲ್ಲಿ ಕರಿನಂಜನಪುರ ಶಾರದಾ ಪ್ರಥಮ, ಶಾಯಿದಬಾನು ಮತ್ತು ಮೌಸಿಮಾ ದ್ವೀತಿಯ, ಸರಸ್ವತಿ ತೃತೀಯ ಹಾಗೂ ವಸಂತ ಅಂಬಳೆ, ಶೋಭಾ, ವಿಜಯಲಕ್ಷ್ಮೀ, ನೀಲಮ್ಮ, ಬೀಬಿ ಸಬೀನಾ ಸಮಾಧಾನಕರ ಬಹುಮಾನ ಪಡೆದುಕೊಂಡರು. ತೀರ್ಪುಗಾರರಾಗಿ ಶಿಕ್ಷಕಿಯರಾದ ಸುಮನಾ ಕುಮಾರಿ, ಬಿ.ಸವಿತಾ, ಆಯಿಷಾ ಖಾನಂ, ಗಾಯಿತ್ರಿ, ಶಾಮ ಸುಂದರಿ, ಶಾರದಾ ಭಾಗವಹಿಸಿದ್ದರು.