ಯಾರು ಏನಂದ್ರು?: ಚಾ.ನಗರ ನಗರಸಭೆ ಚುನಾವಣೆ ಅಧ್ಯಕ್ಷ-ಉಪಾಧ್ಯಕ್ಷ ಚುನಾವಣೆಯಲ್ಲಿ ಕಾಂಗ್ರೆಸ್ ಸೋಲಿಸುವುದೋ ಅಥವಾ ಅಧ್ಯಕ್ಷ ಸ್ಥಾನದ ಅಭ್ಯರ್ಥಿ ರಾಜಪ್ಪನನ್ನು ಸೋಲಿಸುವುದೋ ನನ್ನ ಉದ್ದೇಶವಾಗಿರಲಿಲ್ಲ. ಇದಕ್ಕೆ ನಮ್ಮ ಶಾಸಕರೇ ಮುಖ್ಯ ಕಾರಣ ಎಂದು ಚುನಾವಣೆಗೆ ಗೈರಾಗಿದ್ದ ನಗರಸಭೆ ಕಾಂಗ್ರೆಸ್ ಸದಸ್ಯ ಆರ್.ಪಿ.ನಂಜುಂಡಸ್ವಾಮಿ ದೂರಿದ್ದಾರೆ.
‘ವಿಜಯವಾಣಿ’ಯೊಂದಿಗೆ ಮಾತನಾಡಿದ ಅವರು, ನಮ್ಮ ಕೆಲಸ-ಕಾರ್ಯಗಳು ಶಾಸಕರ ಮಟ್ಟದಲ್ಲಿ ಆಗುತ್ತಿರಲಿಲ್ಲ. ವಿಶ್ವಾಸಯುತವಾಗಿ ನಡೆಸಿಕೊಳ್ಳಲಿಲ್ಲ, ಜತೆಗೆ ಕರೆದುಕೊಂಡು ಹೋಗಲಿಲ್ಲ. ಹಿಂದಿನ ಎರಡು ಅವಧಿಗಳಿಗಿಂತ ಈ ಅವಧಿಯಲ್ಲಿ ನನ್ನ ವಾರ್ಡ್ಗೆ ಸರ್ಕಾರದಿಂದ ಸರಿಯಾಗಿ ಅನುದಾನವೂ ಬರಲಿಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.
ಇಂದಿಗೂ ನನ್ನ ವಾರ್ಡ್ನಲ್ಲಿ ಮೂಲಸೌಕರ್ಯಗಳ ಕೊರತೆ ಕಾಡುತ್ತಿದೆ. ಈ ವಿಚಾರವಾಗಿ ಶಾಸಕರನ್ನು ಕೇಳಿಕೊಂಡಾಗಲೂ ಅವರು ಕನಿಷ್ಠ ಪಕ್ಷ ಬಾಂಧವ್ಯದ ಮಾತುಗಳನ್ನೂ ಆಡುತ್ತಿರಲಿಲ್ಲ. ಅವರ ಯಾವ ಭೇಟಿಯೂ ಖುಷಿಯಿಂದ ಕೂಡಿರಲಿಲ್ಲ. ನಮ್ಮ ಶಾಸಕರಿಂದ ನಮ್ಮ ಕೆಲಸ ಆಯ್ತು ಎಂದು ಯಾವತ್ತೂ ಅನಿಸಿಲ್ಲ. ಎರಡು ಅವಧಿಯಲ್ಲಿ ಅವರ ಜತೆಗೆ ನಿಂತು ಚುನಾವಣೆಯಲ್ಲಿ ಗೆಲ್ಲಿಸಿದ್ದೇವೆ. ಆದರೆ, ಒಂದು ಸಲವೂ ನನ್ನನ್ನು ಸರಿಯಾಗಿ ನಡೆಸಿಕೊಳ್ಳಲಿಲ್ಲ. ಎಂಪಿ ಚುನಾವಣೆ ಸಂದರ್ಭದಲ್ಲೂ ಸರಿಯಾಗಿ ನಡೆಸಿಕೊಳ್ಳಲಿಲ್ಲ ಎಂದು ದೂರಿದರು.
ಕಳೆದ ಸಲ ನಗರಸಭೆ ಚುಕ್ಕಾಣಿ ಹಿಡಿಯಲು ಸಾಧ್ಯವಾಗಲಿಲ್ಲ. ಈ ಸಲವಾದರೂ ಭದ್ರಬುನಾದಿ ಹಾಕಿ ಎಂದು ಸಭೆಯೊಂದರಲ್ಲಿ ಶಾಸಕರಿಗೆ ಸಲಹೆ ನೀಡಿದರೆ ಅವರು, ‘ನೀವು ಗೆಲ್ಲದಿದ್ದರೆ ನನ್ನ ಕಿರೀಟ ಬಿದ್ದು ಹೋಗುತ್ತಾ’..ಎಂದುಬಿಟ್ಟರು. ಹೀಗಾಗಿ ಇದಕ್ಕೆಲ್ಲ ಕಾಂಗ್ರೆಸ್ ಪಕ್ಷ ಅಥವಾ ರಾಜಪ್ಪ ಕಾರಣರಲ್ಲ, ಶಾಸಕರೇ ನೇರ ಹೊಣೆ. ಇದನ್ನೆಲ್ಲ ಪಕ್ಷ ಅರ್ಥ ಮಾಡಿಕೊಂಡು ಗೌರವಯುತವಾಗಿ ನಡೆಸಿಕೊಂಡರೆ ಪಾರ್ಟಿಯಲ್ಲೇ ಇರುತ್ತೇನೆ. ಪಕ್ಷ ಏನಾದರೂ ನಿರ್ದಾಕ್ಷಿಣ್ಯವಾಗಿ ಕ್ರಮವಹಿಸಿದರೆ ಏನು ಮಾಡುವುದಕ್ಕೆ ಆಗಲ್ಲ. ನಾನೂ ಕಾನೂನು ಸಮರ ಮಾಡಬೇಕಾಗುತ್ತದೆ ಎಂದು ತಿಳಿಸಿದ್ದಾರೆ.
ಚುನಾವಣೆಯಲ್ಲಿ ಗೈರಾಗಿದ್ದ ಸದಸ್ಯೆ ನೀಲಮ್ಮ ಮಾತನಾಡಿ, ನಾವು ಗೈರಾಗುವುದಕ್ಕಾಗಿ ಬಿಜೆಪಿಯವರ ಬಳಿ ಹಣ ತೆಗೆದುಕೊಂಡಿಲ್ಲ. ಈ ರೀತಿ ದುಡ್ಡು ಮಾಡುವುದಿದ್ದರೆ ಹಳೆಯ ಮನೆಯಲ್ಲೇ ಇಂದಿಗೂ ವಾಸ ಮಾಡುತ್ತಿರಲಿಲ್ಲ. ಕಾಂಗ್ರೆಸ್ ಪಕ್ಷಕ್ಕೆ ಪ್ರಾಮಾಣಿಕವಾಗಿ ಇದ್ದೇವೆ. ನಮಗೆ ವ್ಯಕ್ತಿಗಿಂತ ಪಕ್ಷ ದೊಡ್ಡದು ಎಂದು ಹೇಳಿದ್ದಾರೆ.
ನಾನು ಮತ್ತು ನನ್ನ ಅಣ್ಣ ಮಹದೇವಯ್ಯ ಸೇರಿ ಒಟ್ಟು 3 ಬಾರಿ ನಗರಸಭೆ ಚುನಾವಣೆಯಲ್ಲಿ ಗೆದ್ದಿದ್ದೇವೆ. ನಿಷ್ಠೆಯಿಂದ ಪಕ್ಷಕ್ಕಾಗಿ ದುಡಿದರೂ ನಮ್ಮ ಮನವಿಗಳನ್ನು ಪರಿಗಣಿಸುತ್ತಿರಲಿಲ್ಲ. ವಾರ್ಡ್ನಲ್ಲಿ ಶಿಥಿಲಗೊಂಡಿದ್ದ ನೀರಿನ ಟ್ಯಾಂಕ್ ಒಡೆದು ಹಾಕಲಾಯಿತು. ನಾನು ಡಿಸಿ ಮತ್ತು ಶಾಸಕ ಸಿ.ಪುಟ್ಟರಂಗಶೆಟ್ಟಿ ಅವರಿಗೆ ಮನವಿ ಕೊಟ್ಟು ವಾಟರ್ ಟ್ಯಾಂಕ್ ಬೇಕು ಎಂದು ಕೋರಿದ್ದೆ. ಗ್ರಾಮ ದೇವತೆ ದೇಗುಲವಿರುವ ರಸ್ತೆ ಅಭಿವೃದ್ಧಿಗೆ ಅನುದಾನ ಕೋರಿದೆ. ಶಾಸಕರು ಸರಿಯಾಗಿ ಸ್ಪಂದಿಸಲಿಲ್ಲ. ವಾರ್ಡ್ನ ಪ್ರಗತಿಗೆ ಸಹಕಾರ ನೀಡದೆ, ಮೂಲಸೌಕರ್ಯಗಳನ್ನು ಒದಗಿಸಿಕೊಡದೆ ಇರುವುದಕ್ಕೆ ಬೇಸರವಾಗಿದೆ ಎಂದಿದ್ದಾರೆ.
ಚುನಾವಣೆ ದಿನ ನಾನು ಎಲ್ಲೂ ಹೋಗಿರಲಿಲ್ಲ. ನನ್ನ ಅಣ್ಣ, ನಗರಸಭೆ ಮಾಜಿ ಸದಸ್ಯ ಮಹದೇವಯ್ಯಗೆ ಮಧುಮೇಹ ಹೆಚ್ಚಾಗಿ ಇಲ್ಲಿನ ಖಾಸಗಿ ಆಸ್ಪತ್ರೆಗೆ ದಾಖಲಾಗಿದ್ದರು. ಅವರನ್ನು ನೋಡಿಕೊಳ್ಳುತ್ತಿದ್ದೆ. ಆಸ್ಪತ್ರೆಯಲ್ಲಿದ್ದ ಕಾರಣ ಬೇರೆಯವರಿಗೆ ಕಿರಿಕಿರಿ ಆಗಬಾರದು ಎಂದು ೆನ್ ಸ್ವಿಚ್ ಆ್ ಮಾಡಿದ್ದೆ. ನಾವು ಪಕ್ಷಕ್ಕೆ ಪ್ರಾಮಾಣಿಕವಾಗಿ ದುಡಿದಿದ್ದೇವೆ. ಈ ಚುನಾವಣೆ ಸಂದರ್ಭದಲ್ಲಿ ನಮಗೆ ತೊಂದರೆ ಇದ್ದಿದ್ದಕ್ಕೆ ತಟಸ್ಥರಾಗಿದ್ದೆವು ಎಂದು ಪಕ್ಷ ಪರಿಗಣಿಸಿದರೆ ಉತ್ತಮ. ಇಲ್ಲದಿದ್ದರೆ ಇಲ್ಲ ಎಂದು ತಿಳಿಸಿದ್ದಾರೆ.
