ಜಿಲ್ಲೆಯ ಕೆಎಸ್ಆರ್ಟಿ ವಿಭಾಗದ ವ್ಯಾಪ್ತಿಯಲ್ಲಿ ಬರುವ ಕೊಳ್ಳೇಗಾಲ ಡಿಪೋದಿಂದ ಪ್ರತಿದಿನ ಬೆಳಿಗ್ಗೆ 8.15 ಗಂಟೆಗೆ ಕೊಳ್ಳೇಗಾಲ ಬಸ್ ನಿಲ್ದಾಣದಿಂದ ಯಳಂದೂರು, ಸಂತೇಮರಹಳ್ಳಿ, ಚಾಮರಾಜನಗರ, ತೆರಕಣಾಂಬಿ, ಗುಂಡ್ಲುಪೇಟೆ, ಮೇಲುಕಾಮನಹಳ್ಳಿ, ಬಂಡೀಪುರ, ಗೂಡ್ಲೂರು ಮಾರ್ಗವಾಗಿ ಊಟಿಗೆ ಸಾರಿಗೆ ಬಸ್ ತೆರಳುತ್ತಿತ್ತು. ಅದೇ ಮಾರ್ಗವಾಗಿ ಸಂಜೆ 7.30 ಕ್ಕೆ ಕೊಳ್ಳೇಗಾಲಕ್ಕೆ ಬರುತ್ತಿದ್ದ ಅಂತರರಾಜ್ಯ ಬಸ್ ಕಳೆದ ತಿಂಗಳಿಂದಲೂ ಸ್ಥಗಿತಗೊಳಿಸಲಾಗಿದೆ. ಪರಿಣಾಮವಾಗಿ ಈ ಸಾರಿಗೆ ಬಸ್ಅನ್ನೇ ಅವಲಂಬಿಸಿದ್ದ ಕೊಳ್ಳೇಗಾಲ, ಹನೂರು, ಯಳಂದೂರು, ಚಾಮರಾಜನಗರ ಭಾಗದ ಕೂಲಿ ಕಾರ್ಮಿಕರು, ವ್ಯಾಪಾರ ವ್ಯವಹಾರ ಮಾಡುವವರು ಹಾಗೂ ಇನ್ನಿತರೆ ಪ್ರಯಾಣಿಕರಿಗೆ ಸಾಕಷ್ಟು ಸಮಸ್ಯೆ ಉಂಟಾಗುತ್ತಿದೆ. ತಮಿಳುನಾಡಿನ ಜನರು ವ್ಯಾಪಾರ ಮತ್ತು ಇನ್ನಿತರೆ ಕೆಲಸ ಕಾರ್ಯಗಳಿಗಾಗಿ ಚಾಮರಾಜನಗರ ಭಾಗಕ್ಕೆ ಬರಲು ಈ ಅಂತರರಾಜ್ಯ ಸಾರಿಗೆ ಬಸ್ನ್ನೇ ಅವಲಂಭಿಸಿದ್ದರು. ಅವರಿಗೂ ಕೂಡ ನಿತ್ಯವೂ ಸಮಸ್ಯೆ ಎದುರಾಗಿದೆ.
