ರೈತರಿಂದಲೇ ಅರಿಶಿಣವನ್ನು ಖರೀದಿಸಿ, ಹೆಚ್ಚು ಬೆಲೆ ಇರುವ ಸಂದರ್ಭದಲ್ಲಿ ರೈತರಿಗೆ ಮಾರಾಟ ಮಾಡುವಾಗ ಗುಣಮಟ್ಟದ ಬಿತ್ತನೆ ಅರಿಶಿಣ ದೊರೆಯುವುದಿಲ್ಲ ಎಂಬ ಮಾತುಗಳು ಕೇಳಿ ಬರುತ್ತಿದೆ. ಈ ನಿಟ್ಟಿನಲ್ಲಿ ಕೃಷಿ ವಿಜ್ಞಾನ ಕೇಂದ್ರ ಹಾಗೂ ರೈತ ಉತ್ಪಾದನಾ ಸಂಸ್ಥೆಗಳು ಉತ್ತಮವಾದ ಬಿತ್ತನೆ ಬೀಜ ವಿತರಣೆಗೆ ಮುಂದಾಗಿದೆ. ಆದರೆ ಕೆಲವು ರೈತರು ಬೇರೆ ಕಡೆಗಳಿಂದ ಅರಿಶಿಣ ಖರೀದಿಸಿ, ರೋಗ ಬರುವುದು, ಇಳುವರಿ ಕುಂಠತವಾಗುವುದು ಹಾಗೂ ಇನ್ನಿತರೆ ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ. ಈ ಸಮಸ್ಯೆಗಳಿಗೆ ಉತ್ತರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಬಿತ್ತನೆ ಅರಿಶಿಣ ಖರೀದಿಯಲ್ಲಿ ರೈತರು ಅನುಸರಿಸಬೇಕಾದ ಕ್ರಮಗಳ ಕುರಿತು, ಅಧಿಕಾರಿಗಳು, ಕೃಷಿ ವಿಜ್ಞಾನಿ, ರೈತ ಮುಖಂಡರು ಹಾಗೂ ಅರಿಶಿಣ ಬೆಳೆಗಾರರಿಂದ ಅಭಿಪ್ರಾಯ ಸಂಗ್ರಹಿಸಲಾಗಿದೆ.
