ಹಕ್ಕುಪತ್ರ ಸಮಸ್ಯೆ
ಕೊಳ್ಳೇಗಾಲ ನಗರಸಭೆ ಎಂದು ಘೋಷಣೆಯಾಗಿ ಹಲವು ವರ್ಷಗಳೇ ಕಳೆದಿದೆ. 31 ವಾರ್ಡ್ಗಳಿವೆ. ಇದಕ್ಕೂ ಮುನ್ನ ಊರೊಟ್ಟಿನ ಕಾಲದಿಂದಲೂ ಇಲ್ಲಿ ಜನರು ವಾಸವಿದ್ದಾರೆ. ಆದರೆ, ಜನರಿಗೆ ತಾವು ವಾಸ ಮಾಡುವ ಮನೆಗಳಿಗೆ ದಾಖಲೆಗಳಿಲ್ಲ. ಹಕ್ಕು ಪತ್ರ, ಇ-ಸ್ವತ್ತುಗಳಿಲ್ಲದೆ ಸರ್ಕಾರದ ಯೋಜನೆಗಳಿಂದ ವಂಚಿತರಾಗಿದ್ದಾರೆ. ಇತ್ತೀಚೆಗಷ್ಟೆ ಮಾಜಿ ಶಾಸಕ ಎನ್.ಮಹೇಶ್ ಸಾರಥ್ಯದಲ್ಲಿ ನಗರಸಭೆ ಖಾತಾ ಆಂದೋಲನ ಕಾರ್ಯಕ್ರಮ ನಡೆಸಿ ಜನರ ಮನೆ ಮನೆಗೆ ತೆರಳಿ ಇ-ಸ್ವತ್ತು ನೀಡುವ ಭರವಸೆ ಹುಟ್ಟಿಸಿದರು. ಆದರೆ, ಕೆಲ ದಿನಗಳಲ್ಲೇ ಈ ಆಂದೋಲನ ಸ್ಥಗಿತಗೊಂಡು ಜನರನ್ನು ದಿಕ್ಕೆಡುವಂತೆ ಮಾಡಿದೆ.
ಆಟೋ ಚಾಲಕರ ಅಳಲು: ಪಟ್ಟಣದಲ್ಲಿ ಹತ್ತಾರು ಆಟೋ ಸಂಘ ಇದೆ. ಆದರೆ, ಆಟೋ ಚಾಲಕರಿಗೆ ಅಧಿಕೃತ ಆಟೋ ನಿಲ್ದಾಣ ವ್ಯವಸ್ಥೆಯಿಲ್ಲ. ನೆರಳಿನ ವ್ಯವಸ್ಥೆಯಿಲ್ಲ. ಮೂಲ ಸೌಕರ್ಯವಿಲ್ಲ ಎಂದು ಅಳಲು ತೋಡಿಕೊಳ್ಳುತ್ತಾರೆ. ಇತ್ತೀಚೆಗೆ ಉದ್ಘಾಟನೆಗೊಂಡ ಕೆಎಸ್ಆರ್ಟಿಸಿ ಬಸ್ ನಿಲ್ದಾಣ ಪಕ್ಕವೂ ಸುಸಜ್ಜಿತ ಆಟೋ ನಿಲ್ದಾಣಕ್ಕೆ ವ್ಯವಸ್ಥೆ ಕಲ್ಪಿಸದಿರುವುದು ಆಟೋ ಚಾಲಕರಿಗೆ ಬೇಸರ ಮೂಡಿಸಿದೆ.
ಸರ್ಕಾರಿ ಆಸ್ಪತ್ರೆ ಮೇಲ್ದರ್ಜೆ ಅತ್ಯಗತ್ಯ: ಕೊಳ್ಳೇಗಾಲ ಉಪವಿಭಾಗ ಆಸ್ಪತ್ರೆಯಲ್ಲಿ ಮತ್ತಷ್ಟೂ ಸೌಲಭ್ಯಗಳು ಸಿಗಬೇಕು ಎನ್ನುವುದು ಜನರ ಬೇಡಿಕೆಯಾಗಿದೆ. ರೇಡಿಯೋಲಾಜಿಸ್ಟ್ ತಜ್ಞರು ಹಾಗೂ ಸ್ಕ್ಯಾನಿಂಗ್ ಯಂತ್ರ ಇಲ್ಲದೆ ಬಡ ರೋಗಿಗಳು ತತ್ತರಿಸುತ್ತಿದ್ದಾರೆ. ಖಾಸಗಿ ಸ್ಕ್ಯಾನಿಂಗ್ಗಳ ಸೇವೆ ಪಡೆಯಲು ಹೆಚ್ಚಿನ ಹಣ ಕಟ್ಟಲು ಸಾಧ್ಯವಾಗುತ್ತಿಲ್ಲ. ಹನೂರು ಹಾಗೂ ಕೊಳ್ಳೇಗಾಲ ಭಾಗದ ಜನರು ಆಸ್ಪತ್ರೆಯನ್ನು ಅವಲಂಬಿಸುವುದರಿಂದ ರಕ್ತನಿಧಿ ಕೇಂದ್ರ ಹಾಗೂ ಆಸ್ಪತ್ರೆಯಲ್ಲೇ ಕ್ಯಾಂಟೀನ್ ತೆರೆದರೆ ಅನುಕೂಲವಾಗಲಿದೆ.
ಕೈಗಾರಿಗೆ ಒತ್ತು: ವ್ಯಾಪಾರಿ ಕೇಂದ್ರವಾಗಿರುವ ಕೊಳ್ಳೇಗಾಲ ರೇಷ್ಮೆ ನಗರಿ ಎಂಬ ಖ್ಯಾತಿ ಪಡೆದಿದೆ. ಆದರೆ, ಹಂಪಾಪುರ ಹತ್ತಿರ ರೇಷ್ಮೆ ಕಾರ್ಖಾನೆ ಸ್ಥಗಿತಗೊಂಡಿದೆ. ಇದನ್ನು ಮರುಸ್ಥಾಪನೆ ಮಾಡಿದರೆ ಸ್ಥಳೀಯರಿಗೆ ಉದ್ಯೋಗ ಸೃಷ್ಟಿಯಾಗಲಿದೆ. ಕೈಗಾರಿಕೆಯ ಗಂಧ ಗಾಳಿಯೇ ಅರಿಯದ ಕೊಳ್ಳೇಗಾಲಕ್ಕೆ ಕೈಗಾರಿಕೆ ಸ್ಥಾಪನೆಗೆ ಒತ್ತು ನೀಡಬೇಕಿದೆ.
ಜನ ಸಂಪರ್ಕ ಸಭೆ: ಜನ ಸಾಮಾನ್ಯರ ಕಷ್ಟ ಹಾಗೂ ಬೇಡಿಕೆ ತಿಳಿಯಲು ತಿಂಗಳಿಗೊಮ್ಮೆಯಾದರೂ ಶಾಸಕರು ಕುಂದುಕೊರತೆ ಸಭೆ ನಡೆಸಿದರೆ ಸಾಕಷ್ಟು ಅಭಿವೃದ್ಧಿ ಕೆಲಸಕ್ಕೆ ಸಹಕಾರ ಆಗಬಹುದು. ಜನರ ನಾಡಿ ಮಿಡಿತ ತಿಳಿಯುತ್ತದೆ ಎಂಬುದು ಪ್ರಜ್ಞಾವಂತ ಮಾತು.
