ಹನೂರು ತಾಲೂಕಿನ ರಾಮಾಪುರಹೋಬಳಿಯ ಮಾರ್ಟಳ್ಳಿ, ಶೆಟ್ಟಹಳ್ಳಿ, ಕುರಟ್ಟಿಹೊಸೂರು, ರಾಮಾಪುರ, ಕೌದಳ್ಳಿ, ಮಹದೇಶ್ವರಬೆಟ್ಟ ಗ್ರಾಮಪಂಚಾಯಿತಿ ವ್ಯಾಪ್ತಿಯ ವಡಕೆಹಳ್ಳ ಗ್ರಾಮಗಳಲ್ಲಿ ಕಳೆದ 20ವರ್ಷಗಳಿಂದ ಸಮರ್ಪಕ ಮಳೆಬೀಳದ ಕಾರಣ, 1200 ಅಡಿ ಕೊಳವೆಬಾವಿ ಕೊರೆದರೂ, ನೀರು ಸಿಗುತ್ತಿಲ್ಲ. ಅಂತರ್ಜಲ ಕುಸಿದಿರುವ ಪರಿಣಾಮ ಇಲ್ಲಿನ ಕೃಷಿಕುಟುಂಬಗಳು ಉದ್ಯೋಗ ಅರಸಿ, ನೆರೆರಾಜ್ಯ, ನೆರೆಜಿಲ್ಲೆಗಳತ್ತ ವಲಸೆಹೋಗಿದ್ದಾರೆ. ಕಾವೇರಿನದಿಯಿಂದ ದಂಟಳ್ಳಿ ಮಾರ್ಗವಾಗಿ ಏತನೀರಾವರಿ ಸೌಲಭ್ಯ ಕಲ್ಪಿಸಿದರೆ, ಅಂತರ್ಜಲ ಹೆಚ್ಚುತ್ತದೆ. ಈಗಾಗಲೇ ಕಾವೇರಿನ್ಯಾಯಮಂಡಳಿ ತನ್ನ ಅಂತಿಮತೀರ್ಪಿನಲ್ಲಿ 63.83 ಟಿಎಂಸಿ ನೀರನ್ನು ಬಳಸಿಕೊಳ್ಳುವಂತೆ ತಿಳಿಸಿದೆ. 2009-10 ನೇ ಸಾಲಿನಲ್ಲಿ ರಾಜ್ಯಸರ್ಕಾರ ಜಿಲ್ಲೆಯ ಕೆರೆಕಟ್ಟೆಗಳಿಗೆ ನೀರುತುಂಬಿಸುವ ಸಲುವಾಗಿ ಸಾಕಷ್ಟು ಅನುದಾನನೀಡಿದೆ ಎಂದರು.
