ಕುಮಾರ ಎಲೆಕ್ಟ್ರಿಕಲ್ ರಸ್ತೆಯಲ್ಲಿ ಸಂಚಾರ ಕಷ್ಟಕಷ್ಟ

ಡಾ.ಬಿ.ಆರ್.ಅಂಬೇಡ್ಕರ್ ರಸ್ತೆಯಿಂದ ಚಿನ್ನದ ಅಂಗಡಿ ಬೀದಿಗೆ ಸಂಪರ್ಕ ಬೆಸೆಯುವ ರಸ್ತೆಯಲ್ಲಿ ತೆರೆದಿರುವ ಬಟ್ಟೆ ಅಂಗಡಿಗಳು, ಹೂವಿನ ಅಂಗಡಿ, ಪೂಜಾ ಸಾಮಗ್ರಿಗಳ ಅಂಗಡಿಗಳು ರಸ್ತೆ ಜಾಗವನ್ನೇ ಆವರಿಸಿಕೊಂಡು ವ್ಯಾಪಾರ ವಹಿವಾಟು ನಡೆಸುತ್ತಿವೆ. ಇದರಿಂದಾಗಿ ವಾಹನ ದಟ್ಟಣೆ, ಜನ ದಟ್ಟಣೆ ಹೆಚ್ಚಾಗುತ್ತಿದೆ.  ಹಬ್ಬದ ದಿನಗಳಲ್ಲಿ ಈ ರಸ್ತೆಯಲ್ಲಿ ಸಂಚರಿಸಲು ಹರಸಾಹಸ ಪಡಬೇಕಿದೆ. ಇನ್ನೂ ವ್ಯಾಪಾರ ವಹಿವಾಟಿಗೆ ಬರುವ ಜನರು ತಮ್ಮ ಬೈಕ್, ಕಾರುಗಳನ್ನು ರಸ್ತೆ ಅರ್ಧಕ್ಕೆ ನಿಲುಗಡೆ ಮಾಡುವುದರಿಂದ ಸಂಚಾರಕ್ಕೆ ಬಹಳ ತೊಂದರೆಯಾಗಿದೆ.

ರಸ್ತೆಗೆ ಅಂಗಡಿ-ಮುಂಗಟ್ಟು ವ್ಯಾಪಾರ ವಹಿವಾಟನ್ನು ವಿಸ್ತರಣೆ ಮಾಡಿರುವುದರಿಂದ ತೊಂದರೆ ಆಗುತ್ತದೆ. ಅಲ್ಲದೆ, ತಳ್ಳುವ ಗಾಡಿಗಳ ವ್ಯಾಪಾರಿಗಳು ನಿಲ್ಲುವುದರಿಂದ ರಸ್ತೆ ಮಾರ್ಗದ ಸಂಚಾರ ಕಷ್ಟವಾಗಿದೆ. ಈ ಸಮಸ್ಯೆ ನಿನ್ನೆ ಮೊನ್ನೆಯದಲ್ಲ. ನಗರಸಭೆ ಅಧಿಕಾರಿಗಳು ರಸ್ತೆ ಜಾಗದಲ್ಲಿ ಅಂಗಡಿ-ಮುಂಗಟ್ಟು ವಿಸ್ತರಿಸಿ ವ್ಯಾಪಾರಕ್ಕಿಳಿದವರ ಮೇಲೆ ಕ್ರಮವಹಿಸಿಲ್ಲ. ಜನರು ಸಮಸ್ಯೆ ಕಂಡರೂ ಕಾಣದ ರೀತಿ ಇರುವುದರಿಂದ ಸಾರ್ವಜನಿಕರು ಅಕ್ರೋಶ ಹೊರಹಾಕುತ್ತಿದ್ದಾರೆ.