ವಾಹನಗಳ ಅಡ್ಡಗಟ್ಟುತ್ತಿದ್ದ ಸಲಗಕ್ಕೆ ಹುಡುಕಾಟ

ಪ್ರಮುಖ ಮುಖ್ಯಾಂಶಗಳು

• ಬಂಡೀಪುರದ ರಸ್ತೆಯಲ್ಲಿ ದಾಳಿ ಮಾಡುತ್ತಿರುವ ಆನೆ
• ವರದಿ ಬಂದ ಬಳಿಕ ಸೆರೆ ಕಾರ್ಯಾಚರಣೆ

ಗುಂಡ್ಲುಪೇಟೆ:

ಕಳೆದ ಎರಡು ಮೂರು ತಿಂಗಳಿಂದ ಬಂಡೀಪುರದ ರಸ್ತೆಯಲ್ಲಿ ತರಕಾರಿ-ಹಣ್ಣುಗಳನ್ನು ತಿನ್ನಲು ಲಾರಿಗಳನ್ನು ಅಡ್ಡಗಟ್ಟುತ್ತಿರುವ ಸಲಗನ ಹಿಡಿಯಲು ಅರಣ್ಯಾಧಿಕಾರಿಗಳು ಮಾಹಿತಿ ಸಂಗ್ರಹಿಸುತ್ತಿದ್ದಾರೆ.

ಏಕಾಏಕಿ ರಸ್ತೆಗೆ ಇಳಿಯುವ ಆನೆ ನಡುರಸ್ತೆಯಲ್ಲಿ ಸಾಗುವ ಮೂಲಕ ವಾಹನಗಳು ಮುಂದೆ ಸಾಗದಂತೆ ಮಾಡುತ್ತಿದೆ. ತಮ್ಮತ್ತಲೇ ನೇರವಾಗಿ ಮುನ್ನುಗ್ಗಿ ಬರುವ ಆನೆಯನ್ನು ಕಂಡು ಚಾಲಕರು ಗಲಿಬಿಲಿಯಾಗುತ್ತಿದ್ದಾರೆ. ಆನೆಯಿಂದ ಪಾರಾಗಲು ರಿವರ್ಸ್ ಸಾಗುವ ಟೆಂಪೋಗಳನ್ನು ಅಟ್ಟಿಸಿಕೊಂಡು ಬರುವ ಸಲಗ, ದಂತದಿಂದ ಹಗ್ಗವನ್ನು ಕಿತ್ತುಹಾಕುವ ರಭಸಕ್ಕೆ ವಾಹನಗಳು ಜೋರಾಗಿ ಅಲುಗಾಡುತ್ತವೆ. ಇದರಿಂದ ಟೆಂಪೋ ಮಗುಚಿಕೊಳ್ಳುವ ಭೀತಿಯಿಂದ ಚಾಲಕರು ಆತಂಕಕ್ಕೊಳಗಾಗುತ್ತಿದ್ದಾರೆ.

ಬೆಳಗ್ಗೆ 6 ಗಂಟೆಗೆ ಚೆಕ್ ಪೋಸ್ಟ್ ತೆರೆದು ವಾಹನಗಳ ಸಂಚಾರ ಆರಂಭವಾಗುತ್ತಿದ್ದಂತೆ ಅರಣ್ಯ ಸಿಬ್ಬಂದಿ ಗಸ್ತು ನಡೆಸುತ್ತಾ ಆನೆಯನ್ನು ರಸ್ತೆಗೆ ಬರದಂತೆ ಕಾಡಿಗೆ ಅಟ್ಟಿದರೂ ಚಾಲಾಕಿ ಆನೆ ಮತ್ತೊಂದು ಕಡೆಯಿಂದ ಬರುತ್ತಿದೆ. ಎಲ್ಲಿ ಆನೆ ದಾಳಿ ಮಾಡುವುದೋ ಎಂಬ ಆತಂಕದಿಂದಲೇ ಚಾಲಕರು ವಾಹನ ಚಲಾಯಿಸುತ್ತಿದ್ದಾರೆ. ಈ ಆನೆಯನ್ನು ಚಾಲಕರು ಬಂಡೀಪುರ ಟ್ಯಾಕ್ಸ್ ಕಲೆಕ್ಟರ್ ಎಂದು ಕರೆಯುತ್ತಿದ್ದರೆ, ತರಕಾರಿ ಟೆಂಪೋಗಳ ಚಾಲಕರು ತರಕಾರಿ ರಾಜ ಎಂದು ನಾಮಕರಣ ಮಾಡಿದ್ದಾರೆ. ಹಾಗಾಗಿ ಆನೆ ಸೆರೆ ಹಿಡಿದು ಬೇರೆಡಿ ಬಿಡುವಂತೆ ಸಾರ್ವಜನಿಕರಿಂದ ಒತ್ತಾಯವೂ ಕೇಳಿ ಬಂದಿದೆ.