ಸಿಗದ ತುಂತುರು ನೀರಾವರಿ ಸೌಲಭ್ಯ

ಸೂಕ್ಷ್ಮ ನೀರಾವರಿ ಯೋಜನೆಯಡಿ ದೊರೆಯುವ ತುಂತುರು ನೀರಾವರಿ ಯೋಜನೆಯನ್ನು ಪಡೆಯಲು 2025-26ನೇ ಸಾಲಿನಲ್ಲಿ ಕೊಳ್ಳೇಗಾಲ ಕಸಬಾ ಹೋಬಳಿಯ ಸುಮಾರು 60 ರೈತರು ಅನುಮೋದನೆ ಪಡೆದ ಕಂಪನಿಗಳಿಗೆ ಹಣವನ್ನು ಆರ್‌ಟಿಜಿಎಸ್ ಮಾಡಿದರಾದರೂ ಈವರೆಗೂ ಸೌಲಭ್ಯ ಪಡೆಯಲು ಸಾಧ್ಯವಾಗಿಲ್ಲ.

ಸರ್ಕಾರದ ಸಹಾಯಧನ ಬಿಡುಗಡೆಯಾಗದ ಕಾರಣ ಕೃಷಿ ಇಲಾಖೆ ವರ್ಕ್ ಆರ್ಡರ್ ನೀಡಿಲ್ಲ. ಇದರಿಂದ ತುಂತುರು ನೀರಾವರಿ ಯೋಜನೆ ರೈತರ ಕೈಸೇರಿಲ್ಲ. ಈ ಸಮಸ್ಯೆ ಕೊಳ್ಳೇಗಾಲ ಕಸಬಾ ಮತ್ತು ಪಾಳ್ಯ ಹೋಬಳಿಯಲ್ಲಿ ಹೆಚ್ಚಾಗಿದ್ದು, ಹನೂರು ತಾಲೂಕು ವ್ಯಾಪ್ತಿಯಲ್ಲಿರುವ ಹನೂರು, ಲೊಕ್ಕನಹಳ್ಳಿ, ರಾಮಪುರ ಹೋಬಳಿಯಲ್ಲೂ ಇದೆ. ಕೃಷಿ ಅಧಿಕಾರಿಗಳ ನಿರ್ಲಕ್ಷ್ಯದಿಂದ ಈ ಸಮಸ್ಯೆ ಉಂಟಾಗಿದೆ ಎಂಬುದು ರೈತರ ಆಕ್ರೋಶಕ್ಕೆ ಕಾರಣವಾಗಿದೆ. ಸುಮಾರು ಮೂರ್ನಾಲ್ಕು ತಿಂಗಳ ಹಿಂದೆಯೇ ಹಣ ಕಟ್ಟಿರುವ ರೈತರು ಸ್ಪ್ರಿಂಕ್ಲರ್‌ಗಳನ್ನು ಎದುರು ನೋಡುವಂತಾಗಿದೆ. ಬೇಸಿಗೆ ಸಂದರ್ಭದಲ್ಲಿ ಕೃಷಿಗೆ ಕಾಡುವ ನೀರಿನ ಚಿಂತೆಗೆ ಪರಿಹಾರವಾಗುವ ಸ್ಪ್ರಿಂಕ್ಲರ್‌ಗಳು ಸಕಾಲಕ್ಕೆ ರೈತರಿಗೆ ದೊರೆಯದಂತಾಗಿದ್ದು, ಸರ್ಕಾರದ ಮಹತ್ವಾಕಾಂಕ್ಷೆ ಯೋಜನೆಗೆ ಅರ್ಥವಿಲ್ಲದಂತಾಗಿದೆ.

ಕೊಳ್ಳೇಗಾಲ ಮತ್ತು ಹನೂರು ತಾಲೂಕು ವ್ಯಾಪ್ತಿಯಲ್ಲಿ ಐದು ಹೋಬಳಿಗಳಿದ್ದು, 2025-26 ನೇ ಸಾಲಿನಲ್ಲಿ ಕೊಳ್ಳೇಗಾಲ ಕಸಬಾ ಹೋಬಳಿಯಲ್ಲಿ ಸಾಮಾನ್ಯ 79, ಪ.ಜಾ 29, ಪ.ಪಂ 10 ಸೇರಿದಂತೆ ಒಟ್ಟು 118 ರೈತರಿಗೆ ತುಂತುರು ನೀರಾವರಿ ಸೌಲಭ್ಯವನ್ನು ವಿತರಿಸಲಾಗಿದೆ. ಅಂತೆಯೇ ಪಾಳ್ಯ ಹೋಬಳಿಯಲ್ಲಿ ಸಾಮಾನ್ಯ 121, ಪ.ಜಾ 33, ಪ.ಪಂ 17 ಒಟ್ಟು 171, ಹನೂರು ಹೋಬಳಿಯಲ್ಲಿ ಸಾಮಾನ್ಯ 273, ಪ.ಜಾ 47, ಪ.ಪಂ 28 ಒಟ್ಟು 349, ಲೊಕ್ಕನಹಳ್ಳಿ ಹೋಬಳಿಯಲ್ಲಿ ಸಾಮಾನ್ಯ 399, ಪ.ಜಾ 55, ಪ.ಪಂ 21 ಸೇರಿದಂತೆ ಒಟ್ಟು 475, ರಾಮಪುರ ಹೋಬಳಿಯಲ್ಲಿ ಸಾಮಾನ್ಯ 364, ಪ.ಜಾ 36, ಪ.ಪಂ 7 ಒಟ್ಟು 407 ಜನರಿಗೆ ವಿತರಿಸಲಾಗಿದೆ. ಐದು ಹೋಬಳಿಗಳಿಂದ ಒಟ್ಟಾರೆ ಸಾಮಾನ್ಯ 1,236, ಪ.ಜಾ 200, ಪ.ಪಂ 84 ಒಟ್ಟು ಒಟ್ಟು 1520 ರೈತರಿಗೆ ಸ್ಪ್ರಿಂಕ್ಲರ್ ವಿತರಣೆ ಮಾಡಲಾಗಿದೆ. ಕೃಷಿ ಇಲಾಖೆ ಮಾಹಿತಿಯಂತೆ ಕೊಳ್ಳೇಗಾಲದ ಕಸಬಾ, ಪಾಳ್ಯ ಹೋಬಳಿಗೆ ಕಡಿಮೆ ಪ್ರಮಾಣದಲ್ಲಿ ವಿತರಣೆಯಾಗಿದೆ.

ಸೂಕ್ಷ್ಮ ನೀರಾವರಿ ಯೋಜನೆಯಡಿ 63 ಎಂ.ಎಂ 1 ಹೆಕ್ಟೇರ್‌ಗೆ 2,666 ರೂ.ಗಳನ್ನು ರೈತ ಪಾವತಿಸಿದರೆ ಸರ್ಕಾರದಿಂದ 19,429 ರೂ.ಸಹಾಯಧನ ಸೇರಿದಂತೆ ಒಟ್ಟು 22.095 ರೂ. ಆಗಲಿದೆ. ಅಂತೆಯೆ 63 ಎಂಎಂ 2 ಹೆಕ್ಟೇರ್‌ಗೆ ಒಬ್ಬ ಫಲಾನುಭವಿಗೆ 3657 ರೂ., ಸಹಾಯಧನ 19,429 ರೂ. ಸೇರದಂತೆ ಒಟ್ಟು 31,707 ರೂ., 75 ಎಂಎಂ 1 ಹೆಕ್ಟೇರ್‌ಗೆ ಒಬ್ಬ ಫಲಾನುಭವಿಗೆ 3,014 ರೂ., ಸಹಾಯಧನ 21,775 ರೂ. ಸೇರಿದಂತೆ ಒಟ್ಟು 24,789 ರೂ., 75 ಎಂ ಎಂ 2 ಹೆಕ್ಟೇರ್‌ಗೆ ಒಬ್ಬ ರೈತ 4182 ರೂ., ಸರ್ಕಾರ 31,191 ರೂ. ಸೇರಿದಂತೆ ಒಟ್ಟು 35,373 ರೂ. ಪಾವತಿಯಾಗಿ ತುಂತುರು ನೀರಾವರಿ ಸೌಲಭ್ಯ ದೊರೆಯಲಿದೆ.

ಬೇಸಿಗೆ ಆರಂಭಗೊಂಡಿದ್ದು ಮಳೆಯೂ ಕಡಿಮೆಯಾಗಿದೆ. ಸಂದಿಗ್ಧ ಸಮಯದಲ್ಲಿ ತುಂತುರು ನೀರಾವರಿ ಸೌಲಭ್ಯ ನೀಡಿದ್ದರೆ ಒಳಿತಾಗುತ್ತಿತ್ತು. ಲಭ್ಯವಿರುವ ನೀರನ್ನು ಹಿತಮಿತವಾಗಿ ಬಳಸಿಕೊಂಡು ಕೃಷಿ ಮಾಡಲಾಗುತ್ತಿತ್ತು. ಆದರೆ, ಸಕಾಲಕ್ಕೆ ಸ್ಪ್ರಿಂಕ್ಲರ್ ಸೌಲಭ್ಯ ಸಿಗದ ಕಾರಣ ಉದ್ದು, ಅಲಸಂದೆ, ಹೆಸರು ಕಾಳು ಮತ್ತು ತರಕಾರಿ ಬೆಳೆಯಲು ತೊಂದರೆಯಾಗಿದೆ ಎಂಬುದು ರೈತರ ದೂರು.