ಪಚ್ಚೆದೊಡ್ಡಿ ಸರ್ಕಾರಿ ಶಾಲೆಗೆ ಕಾಡಾನೆ ದಾಳಿ

ಮಲೆಮಹದೇಶ್ವರ ವನ್ಯಜೀವಿ ಧಾಮದ ವ್ಯಾಪ್ತಿಯಲ್ಲಿನ ಈ ಶಾಲೆಯಲ್ಲಿ 5ನೇ ತರಗತಿವರೆಗೆ ಶಿಕ್ಷಣ ನೀಡಲಾಗುತ್ತಿದೆ. ಆದರೆ, ಸಮೀಪದಲ್ಲಿಯೇ ಅರಣ್ಯ ಪ್ರದೇಶವಿರುವುದರಿಂದ ಕಳೆದ ವರ್ಷ ಕಾಡಾನೆಯೊಂದು ಶಾಲೆಗೆ ಲಗ್ಗೆ ಇಟ್ಟು ಗೇಟ್ ಹಾಗೂ ಕಾಂಪೌಂಡ್‌ಗೆ ಹಾನಿ ಮಾಡಿತ್ತು. ಜತೆಗೆ ಕಳೆದ 2 ತಿಂಗಳ ಹಿಂದೆಯೂ ಕಾಂಪೌಂಡ್ ಹಾಗೂ ನೀರಿನ ಪರಿಕರ ಹಾನಿಗೊಳಗಾಗಿ ಗ್ರಾಪಂ ವತಿಯಿಂದ ರಿಪೇರಿ ಮಾಡಲಾಗಿತ್ತು. ಇದೀಗ ಕಾಡಾನೆ ಮತ್ತೆ ದಾಳಿ ನಡೆಸಿದ್ದು, ಗೇಟ್ ಮುರಿದು ಶಾಲಾವರಣಕ್ಕೆ ಪ್ರವೇಶಿಸಿ ದಾಂಧಲೆ ನಡೆಸಿದೆ. ಅದೃಷ್ಟವಶಾತ್ ರಾತ್ರಿ ವೇಳೆಯಾದ್ದರಿಂದ ಮಕ್ಕಳು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

ಪರಿಹಾರಕ್ಕೆ ಒತ್ತಾಯ: ಕಾಡಾನೆ ಈವರೆಗೂ 3 ಬಾರಿ ಶಾಲೆಗೆ ಲಗ್ಗೆ ಇಟ್ಟು ಕಾಂಪೌಂಡ್ ಹಾಗೂ ಪರಿಕರಗಳನ್ನು ನಾಶಪಡಿಸಿದೆ. ಈ ಬಗ್ಗೆ ಗಮನಕ್ಕೆ ತಂದರೂ ರಿಪೇರಿ ಮಾಡಿಕೊಡಲು ಅರಣ್ಯ ಇಲಾಖೆಯ ಅಧಿಕಾರಿಗಳು ಹಿಂದೇಟು ಹಾಕುತ್ತಿದ್ದಾರೆ. ಇದರಿಂದ ವಿದ್ಯಾರ್ಥಿಗಳಿಗೆ ಆತಂಕದ ಜತೆಗೆ ಸಮಸ್ಯೆ ಉಂಟಾಗುತ್ತಿದೆ. ಆದ್ದರಿಂದ ಅರಣ್ಯಾಧಿಕಾರಿಗಳು ಹಾನಿಗೊಳಗಾಗಿರುವ ಶಾಲಾ ಗೇಟ್ ಹಾಗೂ ನೀರಿನ ಪರಿಕರಗಳನ್ನು ರಿಪೇರಿ ಮಾಡಿಸಬೇಕು. ಜತೆಗೆ ಶಾಲೆ ಹಾಗೂ ಗ್ರಾಮಕ್ಕೆ ಲಗ್ಗೆ ಇಡುತ್ತಿರುವ ಕಾಡಾನೆಗೆ ಕಡಿವಾಣ ಹಾಕುವಂತೆ ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.