ಹಿಮವದ್ ಗೋಪಾಲಸ್ವಾಮಿ ಬೆಟ್ಟಕ್ಕೆ ಪ್ರವಾಸಿಗರ ದಂಡು

ಕಾಡಿನಿಂದ ಹುಲಿಗಳು ಗ್ರಾಮಗಳತ್ತ ದಾಳಿ ನಡೆಸುತ್ತಿರುವ ಹಿನ್ನೆಲೆಯಲ್ಲಿ ಅರಣ್ಯ ಇಲಾಖೆ ಬಂಡೀಪುರದಲ್ಲಿ ಸಫಾರಿಗೆ ತಾತ್ಕಾಲಿಕ ನಿರ್ಬಂಧ ಹೇರಿದೆ. ಇದರಿಂದ ಹೆಚ್ಚಿನ ಪ್ರವಾಸಿಗರು ಹಿಮವದ್ ಗೋಪಾಲಸ್ವಾಮಿ ಬೆಟ್ಟದತ್ತ ಮುಖಮಾಡಿದ್ದಾರೆ. ಚಂಡಮಾರುತದ ಪರಿಣಾಮ ಕಳೆದ 3-4 ದಿನಗಳಿಂದ ಹಿಮವದ್ ಗೋಪಾಲಸ್ವಾಮಿ ಬೆಟ್ಟದಲ್ಲಿ ಮಂಜಿನ ಚಾದರ ದಟ್ಟವಾಗುತ್ತಿದೆ. ಬೆಟ್ಟ ಹಾಗೂ ದೇವಾಲಯದ ಆವರಣವೆಲ್ಲಾ ಮಂಜಿನಿಂದ ಆವರಿಸಿದ್ದು ಅಕ್ಕಪಕ್ಕದವರಿಗೂ ಒಬ್ಬರ ಮುಖ ಮತ್ತೊಬ್ಬರಿಗೆ ಕಾಣದಷ್ಟು ಹಿಮಾವೃತಗೊಂಡಿದೆ. ಹಿಮದ ಜತೆಗೆ ತುಂತುರು ಮಳೆ ಬೀಳುತ್ತಿರುವುದು ವಿಶೇಷ ಅನುಭವ ನೀಡುತ್ತಿದೆ. ಚುಮುಚುಮು ಚಳಿ ಆನಂದ ಉಂಟು ಮಾಡುತ್ತಿದ್ದು ಪ್ರವಾಸಿಗರನ್ನು ತನ್ನತ್ತ ಸೆಳೆಯುತ್ತಿದೆ.