ನೀರಿನ ತೊಂಬೆಗಳನ್ನು ಶುಚಿಗೊಳಿಸಿ

ಪಟ್ಟಣದಲ್ಲಿ ಬಹುತೇಕ ಕಡೆ ನೀರಿನ ತೊಂಬೆಗಳಿದ್ದರೂ ಕೂಡ ಇಲ್ಲಿ ಕೆಲವು ತೊಂಬೆಗಳಿಗೆ ಸಂಪರ್ಕವೇ ಕಲ್ಪಿಸಿಲ್ಲ. ಇರುವ ಏಳೆಂಟು ತೊಂಬೆಗಳಲ್ಲಿ ನೀರು ಶೇಖರಣೆ ಮಾಡಲಾಗುತ್ತದೆ. ಆದರೆ ಇದು ಅಶುಚಿತ್ವದಿಂದ ಕೂಡಿದೆ. ಇಲ್ಲಿನ ನೀರು ಕುಡಿಯಲು ಅಥವಾ ಬೇರೆ ಕೆಲಸಗಳಿಗೆ ಉಪಯೋಗಿಸಲು ಯೋಗ್ಯವಾಗಿಲ್ಲ. ಪಟ್ಟಣದಲ್ಲಿ ಇದಕ್ಕೆ ನೀರನ್ನು ಬಹುತೇಕ ಕೊಳವೆ ಬಾವಿಗಳಿಂದಲೇ ತುಂಬಿಸಲಾಗುತ್ತದೆ. ಈ ನೀರು ಗಡುಸಾಗಿರುವುದರಿಂದ ಇಲ್ಲಿನ ನೀರಿನ ತೊಂಬೆಗಳು ಬೇಗ ಪಾಚಿ ಕಟ್ಟುತ್ತದೆ. ಈಗ ಬೇಸಿಗೆ ಬರುತ್ತಿದೆ. ಈ ನೀರನ್ನು ಕೆಲವರು ಕುಡಿಯಲೂ ಕೂಡ ಬಳಸುತ್ತಾರೆ. ಜಾನುವಾರುಗಳಿಗೆ ಕುಡಿಯಲು ಬಳಕೆ ಮಾಡಲಾಗುತ್ತದೆ. ಹಾಗಾಗಿ ಇದರಲ್ಲಿ ವಿಷಕಾರಿ ಅಂಶಗಳು ದೇಹ ಹೊಕ್ಕಿ ರೋಗ ರುಜಿನಗಳಿಗೆ ತುತ್ತಾಗುವ ಸಾಧ್ಯತೆ ಹೆಚ್ಚಾಗಿದೆ.

ಈ ತೊಂಬೆಗಳನ್ನು ಶುಚಿಗೊಳಿಸಿ ಹಲವು ತಿಂಗಳುಗಳೇ ಕಳೆದಿದ್ದು ಕೂಡಲೇ ಇದನ್ನು ಶುಚಿಗೊಳಿಸಿ ಸಾರ್ವಜನಿಕರಿಗೆ ಅನುಕೂಲ ಮಾಡಿಕೊಡಬೇಕು ಎಂದು ಪಟ್ಟಣದ ಮಹದೇವಸ್ವಾಮಿ, ಅನಿಲ್, ಕುಮಾರ, ಸ್ವಾಮಿ ಸೇರಿದಂತೆ ಅನೇಕರು ಆಗ್ರಹಿಸಿದ್ದಾರೆ.