2 ಸಾವಿರ ಜನರಿಗೆ ಚೈನ್​ಲಿಂಕ್ ಧೋಖಾ; ಶೇ.25 ಲಾಭಾಂಶದ ಆಮಿಷ, ಸಿಸಿಬಿ ಬಲೆಗೆ ಬಿದ್ದ ವಂಚಕ

ಬೆಂಗಳೂರು: ರಾಜಧಾನಿ ಬೆಂಗಳೂರಿನಲ್ಲಿ ಮತ್ತೊಂದು ಚೈನ್​ಲಿಂಕ್ ಕಂಪನಿಯ ಧೋಖಾ ಬೆಳಕಿಗೆ ಬಂದಿದೆ. ಕಚೇರಿ ತೆರೆಯದೆ ಆನ್​ಲೈನ್​ನಿಂದಲೇ ಅಮಾಯಕರಿಗೆ ಬಲೆ ಬೀಸಿ 2 ಸಾವಿರ ಜನರಿಂದ ಕೋಟ್ಯಂತರ ರೂ. ಸಂಗ್ರಹಿಸಿ ವಂಚಿಸಿರುವ ಈ ಬೃಹತ್ ಪ್ರಕರಣ ಸಿಸಿಬಿ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ. ಪ್ರಕರಣದ ಪ್ರಮುಖ ಆರೋಪಿ ಡಿ.ಎಸ್.ರಂಗನಾಥ್ ಸಿಸಿಬಿ ಬಲೆಗೆ ಬಿದ್ದಿದ್ದು, ಇನ್ನೂ ಹಲವರಿಗೆ ಶೋಧ ನಡೆಸಲಾಗಿದೆ.

ರಂಗನಾಥ್ ಇತರರ ಜತೆ ಸೇರಿಕೊಂಡು ಆನ್​ಲೈನ್​ನಲ್ಲಿ ಡಿಜಿಟೆಕ್​ವಾರ್ಕ್ ಎಂಬ ಕಂಪನಿ ತೆರೆದಿದ್ದ. ಕಚೇರಿ ಇಲ್ಲದ ಈ ಕಂಪನಿ ಬಗ್ಗೆ ಆನ್​ಲೈನ್​ನಲ್ಲೇ ಜಾಹೀರಾತು ಕೊಟ್ಟು ಬಲೆ ಬೀಸುತ್ತಿದ್ದ. ಶೇ.25 ಲಾಭಾಂಶದ ಆಮಿಷವೊಡ್ಡಿ ಹಣ ಹೂಡಿಕೆ ಮಾಡಿಸಿಕೊಂಡು ಸದಸ್ಯತ್ವ ನೀಡಲಾಗುತ್ತಿತ್ತು. ಈ ಬಗ್ಗೆ ಖಚಿತ ಮಾಹಿತಿ ಪಡೆದು, ಸ್ವಯಂ ದೂರು ದಾಖಲಿಸಿಕೊಂಡು ತನಿಖೆ ಕೈಗೊಂಡಿರುವುದಾಗಿ ಸಿಸಿಬಿ ಅಧಿಕಾರಿಗಳು ತಿಳಿಸಿದ್ದಾರೆ.

15 ಸಾವಿರ ರೂ. ಹೂಡಿಕೆ ಮಾಡಿ ಸದಸ್ಯತ್ವ ಪಡೆದರೆ 2021ರ ಡಿಸೆಂಬರ್​ನಲ್ಲಿ 1 ಲಕ್ಷ ರೂ. ಲಾಭಾಂಶ ಕೊಡುತ್ತೇವೆ. 2022ರಲ್ಲಿ 5 ಲಕ್ಷ ರೂ., 2023ರಲ್ಲಿ 12 ಲಕ್ಷ ರೂ., 2025ರಲ್ಲಿ 25 ಲಕ್ಷ ರೂ. ಕೊಡುವುದಾಗಿ ನಂಬಿಸುತ್ತಿದ್ದ. ಇನ್ನೂ ಹೆಚ್ಚಿನ ಬಡ್ಡಿ ಬೇಕಾದರೆ 1 ಲಕ್ಷ ರೂ. ಹೂಡಿಕೆ ಮಾಡಿದರೆ 2025ರ ಜನವರಿಗೆ 3 ಕೋಟಿ ರೂ. ಲಾಭಾಂಶ ಕೊಡುವುದಾಗಿ ಆಸೆ ತೋರಿಸಿದ್ದ. ವಾಟ್ಸ್​ಆಪ್, ಯೂಟ್ಯೂಬ್, ಇತರ ಸಾಮಾಜಿಕ ಜಾಲತಾಣದಲ್ಲಿ ಮೀಟಿಂಗ್ ಕರೆದು ಪ್ರಚಾರ ಮಾಡುತ್ತಿದ್ದ. ಒಟ್ಟಾರೆ 2 ಸಾವಿರ ಜನರಿಂದ ಕೋಟ್ಯಂತರ ರೂ. ಹೂಡಿಕೆ ಮಾಡಿಸಿಕೊಂಡಿದ್ದಾನೆ.

ಚೈನ್​ಲಿಂಕ್ ಜಾಲ: ಸದಸ್ಯತ್ವ ಪಡೆದ ವ್ಯಕ್ತಿಗೆ ಯೂಸರ್ ನೇಮ್ ಪಾಸ್​ವರ್ಡ್ ನೀಡಿ ಏಜೆಂಟ್​ಗಳಾಗಿ ಮಾಡುತ್ತಿದ್ದ. ಆನಂತರ ತಮ್ಮ ಎಡ-ಬಲ ಸದಸ್ಯರನ್ನು ನೋಂದಾಯಿಸಿದರೆ ಶೇ.25 ಕಮಿಷನ್ ಹಾಗೂ ತಾವು ಸದಸ್ಯತ್ವ ಮಾಡಿಸಿದ ವ್ಯಕ್ತಿಗಳು ಹೊಸಬರನ್ನು ಕರೆತಂದರೆ ಅವರ ಕಡೆಯಿಂದ ಶೇ.1 ಕಮಿಷನ್ ಕೊಡುವ ಆಮಿಷವೊಡ್ಡಿದ್ದ.

ಕ್ರಿಪ್ಟೋದಲ್ಲಿ ಹೂಡಿಕೆ: ಸಾರ್ವಜನಿಕರಿಂದ ಸಂಗ್ರಹಿಸಿದ್ದ ಕೋಟ್ಯಂತರ ರೂ. ಹಣವನ್ನು ಕ್ರಿಪ್ಟೋ ಕರೆನ್ಸಿಯಾದ ಟ್ರೋನ್ ಕಾಯಿನ್​ನಲ್ಲಿ ಹೂಡಿಕೆ ಮಾಡುತ್ತಿದ್ದ. ಆನಂತರ ತನ್ನ ಕಂಪನಿ ಹೆಸರಿನಲ್ಲಿಯೇ ಡಿಟಿಎಂ ಟೋಕನ್ ಎಂದು ರೂಪಿಸಿ ಹೂಡಿಕೆದಾರರಿಗೆ ಕೊಟ್ಟು ಸರ್ಕಾರಕ್ಕೆ ತೆರಿಗೆ ವಂಚಿಸುತ್ತಿದ್ದ. ಆರೋಪಿಯ ಬ್ಯಾಂಕ್ ಖಾತೆ ವಿವರ ಮತ್ತು ಚರಾಸ್ತಿ, ಸ್ಥಿರಾಸ್ತಿ ಜಪ್ತಿ ಮಾಡುವತ್ತ ಸಿಸಿಬಿ ಅಧಿಕಾರಿಗಳು ಕಾರ್ಯಾಚರಣೆ ಮುಂದುವರಿಸಿದ್ದಾರೆ.

https://www.vijayavani.net/snake-within-ksrtc-bus-drivers-are-in-fear/

https://www.vijayavani.net/almost-7-5-million-vaccine-doses-given-today/