ಯೋಜನೆಯಲ್ಲಿ ಮೊದಲ ಹಂತದ ನೆರವಾಗಿ ಕಳೆದ ಜುಲೈನಲ್ಲಿ ಕೇಂದ್ರ ಸರ್ಕಾರ, 60 ಸಾವಿರ ಮನೆಗಳ ನಿರ್ಮಾಣ ಪೂರ್ಣಗೊಳಿಸಲು 8,700 ಕೋಟಿ ರೂ. ನೀಡಲು ಒಪ್ಪಿಗೆ ಸೂಚಿಸಿತು. ಬೃಹತ್ ನಗರಗಳಾದ ದೆಹಲಿ ಎನ್ಸಿಆರ್, ಮುಂಬೈ, ಬೆಂಗಳೂರು, ಚೆನ್ನೈ, ಪುಣೆ, ಎರಡನೇ ಪ್ರಮುಖ ನಗರಗಳಾದ ಕರ್ನಾಲ್, ಪಾಣಿಪತ್, ಲಖನೌ, ಸೂರತ್, ಡೆಹ್ರಾಡೂನ್, ಕೋಟ, ನಾಗಪುರ, ಕೈಪುರ, ನಾಸಿಕ್, ವಿಶಾಖಪಟ್ಟಣ, ಚಂಡೀಗಢ ಮುಂತಾದ ಪ್ರದೇಶಗಳ 81 ವಸತಿ ಯೋಜನೆಗಳಲ್ಲಿ ಈ ಮನೆಗಳಿದ್ದು, ಅಂತಿಮ ಹಂತದ ಹಣದ ಕೊರತೆಯಾಗಿ ಸ್ಥಗಿತವಾಗಿದ್ದವು. ಹಣಕಾಸು ಸಚಿವ ನಿರ್ಮಲಾ ಸೀತಾರಾಮನ್ ಅಕ್ಟೋಬರ್ 5ಕ್ಕೆ ತಿಳಿಸಿದಂತೆ, 33 ಯೋಜನೆಗಳಿಗೆ ಹಣ ಬಿಡುಗಡೆ ಮಾಡಲು ಅಂತಿಮ ಒಪ್ಪಿಗೆ ನೀಡಲಾಗಿದೆ. 4,197 ಕೋಟಿ ರೂ. ಹೂಡಿಕೆಯಿಂದಾಗಿ 25,048 ಮನೆಗಳ ನಿರ್ಮಾಣ ಮುಕ್ತಾಯವಾಗುತ್ತವೆ. ಅಂತಿಮ ಒಪ್ಪಿಗೆ ಪಡೆದ 33 ಸೇರಿ ಇಲ್ಲಿವರೆಗೆ ಒಟ್ಟು 123 ಯೋಜನೆಗಳಿಗೆ ಕೇಂದ್ರ ಸರ್ಕಾರ ಒಪ್ಪಿಗೆ ನೀಡಿದೆ. ಈ ಯೋಜನೆಗಳಿಗೆ 12,079 ಕೋಟಿ ರೂ. ಹೂಡಿಕೆಯಾಗಲಿದ್ದು, 81,308 ಮನೆಗಳು ಪೂರ್ಣಗೊಂಡು ಗ್ರಾಹಕರಿಗೆ ಲಭಿಸುತ್ತವೆ.
