ಗಂಗಾಪಾನ-ಸ್ನಾನ ಪುಣ್ಯದ ಕಾರ್ಯ...

ಉಡುಪಿ ಶ್ರೀಕೃಷ್ಣ ಮಠದ ಮಧ್ವ ಸರೋವರದ ತಟದಲ್ಲಿರುವ ಗಂಗಾ ಭಾಗೀರಥಿ ಗುಡಿಯ ಶತಮಾನೋತ್ಸವ ಹಾಗೂ ಗಂಗಾ ಜಯಂತಿ ಹಿನ್ನೆಲೆಯಲ್ಲಿ ಜೂನ್​ 5ರಂದು ಬೆಳಗ್ಗೆ ಗಂಗಾ ಸ್ನಾನದ ಬಳಿಕ ಆಶೀರ್ವಚನ ನೀಡಿದರು.

ಶತಮಾನೋತ್ಸವದ ನಿಮಿತ್ತ ಸರೋವರದ ತಟದಲ್ಲಿ ಪರ್ಯಾಯ ಶ್ರೀಗಳ ಉಪಸ್ಥಿತಿಯಲ್ಲಿ ಶ್ರೀಕೃಷ್ಣನಿಗೆ ಅಷ್ಟಾವಧಾನ, ತೊಟ್ಟಿಲ ಸೇವೆ ನಡೆಯಿತು. ಅದಮಾರು ಮಠದ ಹಿರಿಯ ಶ್ರೀ ವಿಶ್ವಪ್ರಿಯ ತೀರ್ಥ ಶ್ರೀಪಾದರು ಸಾನ್ನಿಧ್ಯ ವಹಿಸಿ, ಇಂದಿನ ಶ್ರೀಕೃಷ್ಣನ ತೊಟ್ಟಿಲ ಸೇವೆಯು ಮಗಳ ಮನೆಗೆ ತಂದೆ ಬಂದಂತಾಗಿದೆ ಎಂದರು.

ಮಠದ ವಿದ್ವಾಂಸ ಬಿ.ಗೋಪಾಲ ಆಚಾರ್ಯ, ಮಧ್ವ ಸರೋವರದಲ್ಲಿ ಗಂಗಾ ಸ್ನಾನದ ಮಹತ್ವ ತಿಳಿಸಿದರು. ಪುತ್ತಿಗೆ ಮಠದ ದಿವಾನ ನಾಗರಾಜ ಆಚಾರ್ಯ, ಅಂತಾರಾಷ್ಟ್ರೀಯ ಕಾರ್ಯದರ್ಶಿ ಪ್ರಸನ್ನ ಆಚಾರ್ಯ, ಶ್ರೀಗಳ ಕಾರ್ಯದರ್ಶಿ ರತೀಶ ತಂತ್ರಿ ಹಾಗೂ ನೂರಾರು ಭಕ್ತರು ಪಾಲ್ಗೊಂಡಿದ್ದರು.

ಸಪ್ತ ಮೋಕ್ಷ ಕ್ಷೇತ್ರಗಳಲ್ಲೊಂದಾದ ಉಡುಪಿ ಶ್ರೀಕೃಷ್ಣ ಮಠದಲ್ಲಿರುವ ಮಧ್ವ ಸರೋವರವು ಗಂಗಾ ಸಾನ್ನಿಧ್ಯಯುಕ್ತವಾಗಿದೆ. ಶ್ರೀಮದಾನಂದ ತೀರ್ಥ ಭಗವತ್ಪಾದರಿಂದ ಆಹೂತಳಾಗಿ ಗಂಗಾ ದೇವಿಯು ಇಲ್ಲಿಗೆ ಆಗಮಿಸಿದ್ದಾಳೆ. ಮಧ್ವಾಚಾರ್ಯರ ಅಪ್ರತಿಮ ತಪಸ್ಸಿನ ದ್ಯೋತಕವಾಗಿ 12 ವರ್ಷಕ್ಕೊಮ್ಮೆ ಮಧ್ವ ಸರೋವರದಲ್ಲಿ ಗಂಗೋದ್ಭವ ಆಗುತ್ತದೆ ಎನ್ನುವುದು ಅಪರೋಕ್ಷ ಜ್ಞಾನಿಗಳಿಂದ ಪ್ರತ್ಯಕ್ಷ ದೃಷ್ಟವಾದ ವಿಚಾರವಾಗಿದೆ. 1925ರಲ್ಲಿ ಅದಮಾರು ಮಠದ ವಿಬುಧಪ್ರಿಯ ತೀರ್ಥ ಶ್ರೀಪಾದರ ಪರ್ಯಾಯದ ಅವಧಿಯಲ್ಲಿ ಮಧ್ವ ಸರೋವರದಲ್ಲಿ ಗಂಗೋದ್ಭವದ ದಿವ್ಯ ಸಂಸ್ಮರಣೆಗಾಗಿ ಸರೋವರದ ತಟದಲ್ಲಿ ಗಂಗಾ ಭಾಗೀರಥಿ ಗುಡಿ ನಿರ್ಮಿಸಿದ್ದರು. ಆ ಗುಡಿಗೀಗ ಶತಮಾನ ತುಂಬಿದ ಹಿನ್ನೆಲೆಯಲ್ಲಿ ಪರ್ಯಾಯ ಪುತ್ತಿಗೆ ಸುಗುಣೇಂದ್ರ ಶ್ರೀ, ಸುಶ್ರೀಂದ್ರ ಶ್ರೀ ಉಪಸ್ಥಿತಿಯಲ್ಲಿ ಮಧ್ವ ಸರೋವರದಲ್ಲಿ ಸಂಕಲ್ಪ ಪೂರ್ವಕ ಧಾರ್ಮಿಕ ವಿಧಾನದೊಂದಿಗೆ ಗಂಗಾ ಸ್ನಾನ ನೆರವೇರಿತು.