ವಿಧಾನಸಭಾ ಚುನಾವಣೆಗೂ ಮುನ್ನ ಜಿಲ್ಲೆಯಲ್ಲಿ ನಡೆದ ಪ್ರಜಾಧ್ವನಿ ಸಮಾವೇಶದಲ್ಲಿ ಕಾಂಗ್ರೆಸ್ಸಿಗರು, ಜಿಲ್ಲೆಯ ಜನರ ಭಾವನಾತ್ಮಕವಾಗಿ ಮುಟ್ಟುವುದರ ಜತೆಗೆ ರೈತರ ವಿಚಾರದಲ್ಲಿ ತೋರಿದ ಪ್ರೀತಿ ಕಾವೇರಿ ನೀರಿನ ವಿಚಾರದಲ್ಲಿ ಕಂಡುಬರುತ್ತಿಲ್ಲ. ಅದರಲ್ಲಿಯೂ ಡಿಕೆಶಿ ವಿರುದ್ಧ ಕಾವೇರಿ ಕಣಿವೆಯ ಒಕ್ಕಲಿಗ ಸಮುದಾಯದಲ್ಲಿಯೇ ಅಸಮಾಧಾನ ತರುತ್ತಿದೆ. ಇದಕ್ಕೆ ಕಾರಣವೂ ಇದೆ. ಕಾವೇರಿ ನೀರಿನ ವಿಚಾರದಲ್ಲಿ ರೈತರು ಹಾಗೂ ಹೋರಾಟಗಾರರ ಆಗ್ರಹಕ್ಕೆ ವ್ಯತಿರಿಕ್ತ ಹೇಳಿಕೆ ನೀಡುತ್ತಿರುವುದು. ಪ್ರಮುಖವಾಗಿ ಮೇಕೆದಾಟು ಪಾದಯಾತ್ರೆ ವಿಚಾರದಲ್ಲಿ ಕೇಂದ್ರದತ್ತ ಬೊಟ್ಟು ಮಾಡುತ್ತಿರುವುದು ಆಕ್ಷೇಪಕ್ಕೆ ಕಾರಣವಾಗಿದೆ. ಚುನಾವಣೆಗೆ ಮುನ್ನ ಸಮುದಾಯದ ಬೆಂಬಲ ಕೋರುವಾಗ ತೋರಿದ ಆಸಕ್ತಿ, ಕಾವೇರಿ ನೀರು ಹಾಗೂ ಮೇಕೆದಾಟು ವಿಚಾರದಲ್ಲಿ ತೋರುತ್ತಿಲ್ಲ ಎನ್ನುವುದನ್ನು ಬಿಡಿಸಿ ಹೇಳಬೇಕಿಲ್ಲ.
