ಅಂದಹಾಗೆ, ಜಾತಿ ಜನಗಣತಿ ಹೊಸ್ತಿಲಲ್ಲೇ ಸಚಿವ ಸಂಪುಟದಲ್ಲಿ ಭಿನ್ನಮತ ಭುಗಿಲೆದ್ದಿರುವ ಪರಿಣಾಮ ಸೆ.22ರಂದು ಆರಂಭವಾಗಬೇಕಿದ್ದ ಸಮೀಕ್ಷೆ ಮೇಲೆ ಕರಿಛಾಯೆ ಆವರಿಸಿದೆ. ಸಮೀಕ್ಷೆಗೆ ಗೊತ್ತುಪಡಿಸಿದ ಜಾತಿಗಳ ಪಟ್ಟಿ ವಿಚಾರದಲ್ಲಿನ ಎರಡು ಪ್ರಮುಖ ಗೊಂದಲ ಜ್ವಾಲೆಯ ರೂಪ ಪಡೆದು ಆಡಳಿತ ಪಕ್ಷದ ನೆಮ್ಮದಿಯನ್ನೇ ಕದಡಿದೆ. ಗುರುವಾರದ ಬೆಳವಣಿಗೆಯಲ್ಲಿ ಗೊಂದಲ ಮತ್ತು ಪರ-ವಿರೋಧ ಚರ್ಚೆಗೆ ಸಚಿವ ಸಂಪುಟ ಸಭೆ ವೇದಿಕೆಯಾಯಿತು. ಕೆಲವರು ಸಮೀಕ್ಷೆ ನಿಗದಿತ ಅವಧಿಯಲ್ಲೇ ನಡೆಯಬೇಕೆಂದು ಪಟ್ಟು ಹಿಡಿದರೆ ವಿರೋಧದ ದನಿ ತೀವ್ರತೆ ಪಡೆದಿತ್ತು. ಅಂತಿಮವಾಗಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಸಚಿವರ ತಂಡಕ್ಕೆ ಒಮ್ಮತದ ಪರಿಹಾರ ಸೂತ್ರ ಕಂಡುಕೊಳ್ಳಲು ಜವಾಬ್ದಾರಿ ನೀಡಿದರು. ಆದರೆ, ಸಚಿವರ ತಂಡದಲ್ಲೂ ಮಾತು ವಿಕೋಪಕ್ಕೆ ತಿರುಗಿ ಕೊನೆಗೆ ಎರಡು ಸೂತ್ರ ಸಿದ್ಧವಾಯಿತು. ಅಂತಿಮ ವಿವೇಚನೆ ಸಿಎಂಗೆ ಬಿಡಲಾಯಿತು. ತಡರಾತ್ರಿವರೆಗೆ ಸಿಎಂ ಅಧಿಕೃತ ನಿವಾಸದಲ್ಲಿ ಪ್ರಮುಖ ಸಚಿವರು, ಹಿಂದುಳಿದ ವರ್ಗಗಳ ಆಯೋಗದ ಅಧ್ಯಕ್ಷರು, ಕಾರ್ಯದರ್ಶಿ ಸಭೆ ನಡೆಸಿ ಸಾಧಕ ಬಾಧಕದ ಬಗ್ಗೆ ಚರ್ಚಿಸಿದರು.
