ಮಡಿಕೇರಿ, ವಿರಾಜಪೇಟೆ ಹಾಗೂ ಪೊನ್ನಂಪೇಟೆ ತಾಲೂಕಿನಲ್ಲಿ ಪರಿಸ್ಥಿತಿ ಸಾಕಷ್ಟು ಭಿನ್ನವಾಗಿದೆ. ಇಲ್ಲಿ ಒಂಟಿ ಮನೆಗಳ ಸಂಖ್ಯೆಯೇ ಹೆಚ್ಚು. ಒಂದು ಮನೆಯಿಂದ ಮತ್ತೊಂದು ಮನೆಗೆ ಕಿಲೋಮೀಟರ್ಗೂ ಹೆಚ್ಚು ದೂರ ಕ್ರಮಿಸಬೇಕಾದ ಪ್ರದೇಶವೂ ಇದೆ. ಕಾಫಿ ತೋಟ ಸೇರಿದಂತೆ ತಮ್ಮ ಸ್ವಂತ ಜಮೀನುಗಳಲ್ಲಿ ಮನೆ ಕಟ್ಟಿಕೊಂಡಿರುವವರ ಸಂಖ್ಯೆಯೇ ಈ ವ್ಯಾಪ್ತಿಯಲ್ಲಿ ಹೆಚ್ಚಾಗಿ ಕಂಡುಬರುತ್ತದೆ. ಒಂದು ಗ್ರಾಮದಲ್ಲಿ ಸಾಮಾನ್ಯವಾಗಿ ನೂರು ಮನೆಗಳು ಇದ್ದರೆ ಅವು ನೂರು ಕಡೆಗಳಲ್ಲಿ ಹರಡಿರುತ್ತದೆ.
ಜಿಲ್ಲೆಯ ಕೆಲವೊಂದು ಗ್ರಾಮ ಪಂಚಾಯಿತಿಗಳ ವ್ಯಾಪ್ತಿ ಸುಮಾರು ೧೫ ಸಾವಿರಕ್ಕೂ ಅಧಿಕ ಎಕರೆ ಪ್ರದೇಶದ ವ್ಯಾಪ್ತಿ ಹೊಂದಿರುತ್ತವೆ. ಆದರೆ ೧೦೦೦-೧೧೦೦ ಕುಟುಂಬಗಳು ಇಲ್ಲಿಬ ವಾಸ ಮಾಡುತ್ತಿರುತ್ತದೆ. ಇದರಿಂದಲೇ ಮನೆಗಳ ದಟ್ಟಣೆ ಎಷ್ಟು ಕಡಿಮೆ ಇರುತ್ತದೆ ಎನ್ನುವುದನ್ನು ಊಹಿಸಿಕೊಳ್ಳಬಹುದು. ತೋಟ, ಗದ್ದೆಗಳಲ್ಲಿ ಮಾತ್ರವಲ್ಲದೆ ಬೆಟ್ಟ-ಗುಡ್ಡಗಳ ಮೇಲಿರುವ ಸ್ವಂತ ಜಾಗಗಳಲ್ಲಿ ಮನೆಗಳನ್ನು ಕಟ್ಟಿಕೊಂಡು ವಾಸ ಮಾಡುವವರೂ ಇಲ್ಲಿದ್ದಾರೆ. ಕೆಲವು ಮನೆಗಳಂತೂ ವಾಹನ ಕೂಡ ಹೋಗಲು ಆಗದ ಕಡಿದಾದ ಪ್ರದೇಶದಲ್ಲಿ ಇರುತ್ತದೆ.
