ದೇಶದಲ್ಲೇ ಹೆಚ್ಚು ಓಟಗಾರರಿರುವ ಕೇಂದ್ರ ಮಣಿಪಾಲ

ಡಾ. ಗಿರೀಶ್​ ಆರ್​. ಮೆನನ್​ ಅಭಿಪ್ರಾಯ | ಆ.15ರ ಕೆನರಾ ಮೆರಾಥಾನ್​ ಅನಾವರಣ

ವಿಜಯವಾಣಿ ಸುದ್ದಿಜಾಲ ಉಡುಪಿ
ಮೆರಾಥಾನ್​ನಲ್ಲಿ ಪಾಲ್ಗೊಳ್ಳುವುದರಿಂದ ಸದೃಢ ದೇಹ ಹಾಗೂ ಆರೋಗ್ಯ ಲಭಿಸುತ್ತದೆ. ನನಗೆ ತಿಳಿದಂತೆ ಮಣಿಪಾಲವು ದೇಶದಲ್ಲೇ ಹೆಚ್ಚು ಓಟಗಾರರಿರುವ ಕೇಂದ್ರವಾಗಿದೆ. ಆಗಸ್ಟ್​ 15ರಂದು ನಡೆಯುವ ಕೆನರಾ ಮೆರಾಥಾನ್​ ಕಾರ್ಯಕ್ರಮವು ಮಣಿಪಾಲ ಮೆರಾಥಾನ್​ ಎಂದು ಖ್ಯಾತಿ ಪಡೆಯುವಂತಾಗಲಿ ಎಂದು ಕೆಎಂಸಿಯ ನ್ಯೂರೋಲಾಜಿ ವಿಭಾಗದ ಮುಖ್ಯಸ್ಥ ಡಾ. ಗಿರೀಶ್​ ಆರ್​. ಮೆನನ್​ ಆಶಯ ವ್ಯಕ್ತಪಡಿಸಿದರು.

ಮಣಿಪಾಲದ ಕೆನರಾ ಇನ್​ಸ್ಟಿಟ್ಯೂಟ್​ ಆ್​ ಮೆನೇಜ್ಮೆಂಟ್​ನಲ್ಲಿ ಸೋಮವಾರ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಕೆನರಾ ಬ್ಯಾಂಕ್​ನ 119ನೇ ಸ್ಥಾಪಕ ದಿನಾಚರಣೆ ಹಿನ್ನೆಲೆಯಲ್ಲಿ ಆ.15ರಂದು ಆಯೋಜಿಸಿರುವ ಕೆನರಾ ಮೆರಾಥಾನ್​-2024 ಅನಾವರಣ ಮತ್ತು ರಕ್ತದಾನ ಶಿಬಿರ ಸಭೆಯಲ್ಲಿ ಮಾತನಾಡಿದರು.

ಯಶ ಕಾಣಲಿ

2014ರಲ್ಲಿ ಮಣಿಪಾಲದ ಅಥ್ಲೀಟ್​ಗಳೊಂದಿಗೆ ಸಣ್ಣ ಪ್ರಮಾಣದಲ್ಲಿ ಇಂತಹ ಕಾರ್ಯಕ್ರಮ ಆಯೋಜಿಸಿದ್ದೆವು. ನಂತರ ವಿಶ್ವವಿದ್ಯಾನಿಲಯದೊಂದಿಗೆ, ಸಿಂಡಿಕೇಟ್​ ಬ್ಯಾಂಕ್​ನೊಂದಿಗೆ ಮೆರಾಥಾನ್​ ಆರಂಭಿಸಿದವು. ಬಳಿಕ ಸಾಧ್ಯವಾಗಿರಲಿಲ್ಲ. ಮುಂದೆ ನಡೆಯಲಿರುವ ಈ ಕಾರ್ಯಕ್ರಮ ಯಶ ಕಾಣಲಿ ಎಂದು ಶುಭ ಹಾರೈಸಿದರು.

ಸಂಪೂರ್ಣ ಸಹಕಾರ

ಡಾ.ದೀಪಕ್​ ರಾಮ್​ ಬಾಯರಿ ಮಾತನಾಡಿ, ನಮ್ಮ ಸಂಸ್ಥೆಯು ಮಣಿಪಾಲ ಎಂಡ್​ ಪಾಯಿಂಟ್​ನಲ್ಲಿ ಕೆನರಾ ಬ್ಯಾಂಕ್​ನೊಂದಿಗೆ ಯಶಸ್ವಿಯಾಗಿ ಕ್ರಿಕೆಟ್​ ಪಂದ್ಯಾಟ ಆಯೋಜಿಸಿದ್ದೆವು. ಮುಂದಿನ ದಿನಗಳಲ್ಲಿ ನಮ್ಮ ಸಂಪೂರ್ಣ ಸಹಕಾರ ಇರಲಿದೆ ಎಂದರು.

ಸರ್ಕ್​ಲ್​ ಆಫೀಸ್​ ಮಣಿಪಾಲದ ಸಿಜಿಎಂ ಜಯಪ್ರಕಾಶ್​, ಜಿಟಿಪಿಸಿ ಮಣಿಪಾಲದ ಜಿಎಂ ಆರ್​.ಕೃಷ್ಣಪ್ರಸಾದ್​, ಡಿಜಿಎಂ ಜಿಟಿಪಿಸಿ ಉಪಸ್ಥಿತರಿದ್ದರು. ಕೆನರಾ ಮೆರಾಥಾನ್​- 2024ರ ಕುರಿತು ಸಚಿನ್​ ಶೆಟ್ಟಿ ಪ್ರಾಸ್ತಾವಿಕವಾಗಿ ಮಾತನಾಡಿದರು.

ಸೂರಜ್​ ಉಪ್ಪೂರು, ವಿಶಾಲ್​ ಸಿಂಗ್​, ದುರ್ಗಾ ಪ್ರಸಾದ್​, ರಿಯಾಜ್​, ನರಸಿಂಹ ಮೂರ್ತಿ, ನಿಲೇಶ್​ ಗಾಯಿಕ್ವಾಡ್​ ಸಂಘಟಿಸಿದರು. ಶಿವಾನಿ ಎಂ. ಕಾರ್ಯಕ್ರಮ ನಿರೂಪಿಸಿದರು.