ಹಾವೇರಿ: ಮಳೆ ಕೈಕೊಟ್ಟಿದ್ದರಿಂದ ಜಿಲ್ಲೆಯ ಬಹುತೇಕ ಜಲಮೂಲಗಳಾದ ನದಿ, ಕೆರೆಗಳು ಬತ್ತುತ್ತಿವೆ. ನಾಲ್ಕೈದು ವರ್ಷಗಳಿಂದ ಏರುಗತಿಯಲ್ಲಿದ್ದ ಅಂತರ್ಜಲ ದಿಢೀರ್ ಕುಸಿತ ಕಂಡಿದೆ. ಪರಿಣಾಮ ಜಿಲ್ಲೆಯ ಹಲವು ನಗರ, ಗ್ರಾಮಗಳಲ್ಲಿ ಕುಡಿಯುವ ನೀರಿಗೆ ಹಾಹಾಕಾರ ಉಂಟಾಗಿದೆ. ಈ ನಡುವೆ ಜಿಲ್ಲೆಯ 145 ಹಳ್ಳಿಗಳಿಗೆ ಬರದ ಭೀತಿ ಎದುರಾಗಿದೆ.
ಕಳೆದ ಹಲವು ತಿಂಗ ಳಿಂದ ಜಿಲ್ಲೆಯಲ್ಲಿ ಉತ್ತಮ ಮಳೆ ಯಾಗಿಲ್ಲ. ಎರಡು ತಿಂಗಳಿಂದ ಬಿಸಿ ಲಿನ ಪ್ರಖರತೆ ಹೆಚ್ಚಾಗಿದ್ದು, ತಾಪ ಮಾನ ಗರಿಷ್ಠ 38 ಡಿಗ್ರಿ ಸೆಲ್ಸಿಯಸ್ ಗಡಿ ದಾಟಿದ ವರದಿಯಾಗಿದೆ. ಇದರಿಂದಾಗಿ ಜಿಲ್ಲೆಯ ವರದಾ, ತುಂಗಭದ್ರಾ ಸೇರಿದಂತೆ ಅನೇಕ ಕೆರೆ, ಕಟ್ಟೆಗಳು ಬರಿದಾಗಿವೆ. ಕೆಲವೆಡೆ ಬೋರ್ವೆಲ್ಗಳಲ್ಲೂ ನೀರು ಬರುತ್ತಿಲ್ಲ. ಈ ಮೂಲವನ್ನೇ ನಂಬಿದ್ದ ನಗರಗಳು, ಹಳ್ಳಿಗಳಲ್ಲಿ ನೀರಿಗೆ ಹಾಹಾಕಾರ ಶುರುವಾಗಿದೆ. ಅನೇಕ ಕಡೆಗಳಲ್ಲಿ 15, 20, 25 ದಿನಗಳಿಗೊಮ್ಮೆ ಕುಡಿಯುವ ನೀರು ಪೂರೈಸಲಾಗುತ್ತಿದೆ.
ಮುಂಗಾರು ಮಳೆಯ ಮಾನ್ಸೂನ್ ಕೂಡ ತಡವಾಗುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ. ಮುಂಗಾರು ಮಳೆಯೂ ಕೈಕೊಟ್ಟಿದ್ದೇ ಆದಲ್ಲಿ ಪರಿಸ್ಥಿತಿ ಭೀಕರವಾಗಲಿದೆ. ಈ ನಿಟ್ಟಿನಲ್ಲೂ ಜಿಲ್ಲಾಡಳಿತ ಸೂಕ್ತ ಸಿದ್ಧತೆ ಮಾಡಿಕೊಳ್ಳಬೇಕಿದೆ. 145 ಗ್ರಾಮಗಳಲ್ಲಿ ಬರ ಉದ್ಬವಿಸಬಹುದು ಎಂದು ಗ್ರಾಮೀಣ ಕುಡಿಯುವ ನೀರು ಮತ್ತು ನೈರ್ಮಲ್ಯ ಇಲಾಖೆ ಪಟ್ಟಿ ಸಿದ್ಧಪಡಿಸಿದೆ. ಬ್ಯಾಡಗಿ ತಾಲೂಕಿನ 20 ಹಳ್ಳಿಗಳು, ಹಾನಗಲ್ಲನ 31 ಗ್ರಾಮ, ಹಾವೇರಿಯ 25 ಗ್ರಾಮ, ಹಿರೇಕೆರೂರನ 27 ಗ್ರಾಮ, ರಟ್ಟಿಹಳ್ಳಿಯ 12, ರಾಣೆಬೆನ್ನೂರಿನ 11, ಸವಣೂರಿನ 6 ಹಾಗೂ ಶಿಗ್ಗಾಂವಿಯ 13 ಗ್ರಾಮಗಳಲ್ಲಿ ಬರ ಉಂಟಾಗುವ ಮುನ್ಸೂಚನೆ ಇದೆ ಎಂದು ಅಂದಾಜಿಸಲಾಗಿದೆ. ಈಗಾಗಲೇ 17 ಖಾಸಗಿ ಬೋರ್ವೆಲ್ಗಳನ್ನು ಬಾಡಿಗೆ ಪಡೆದು ಅದರಿಂದಲೂ ನೀರು ಪೂರೈಸಲಾಗುತ್ತಿದೆ ಎಂದು ಗ್ರಾಮೀಣ ಕುಡಿಯುವ ನೀರು ಮತ್ತು ನೈರ್ಮಲ್ಯ ವಿಭಾಗದ ಕಾರ್ಯನಿರ್ವಾಹಕ ಇಂಜಿನಿಯರ್ ಜಯರಾಮ ನಾಯಕ ‘ವಿಜಯವಾಣಿ’ಗೆ ತಿಳಿಸಿದ್ದಾರೆ.
