ರುದ್ರಮ್ಮ ಒಂಭತ್ತು ವರ್ಷಗಳಿಂದ ಅನಾಥಾಶ್ರಮ ನಡೆಸುತ್ತಿದ್ದರೂ ಇದುವರೆಗೂ ಯಾರೊಬ್ಬರ ಬಳಿಯೂ ನೆರವಿಗಾಗಿ ಕೈಚಾಚಿದವರಲ್ಲ. ಕುಟುಂಬಕ್ಕೆ ಸೇರಿದ ಎರಡು ಮನೆಗಳಲ್ಲೇ ಒಂದು ಮನೆಯನ್ನು ಅನಾಥಾಶ್ರಮವಾಗಿ ಪರಿವರ್ತಿಸಿ ಅಲ್ಲೇ ತಾವೂ ವಾಸವಾಗಿದ್ದರು. ಇನ್ನೊಂದು ಮನೆಯನ್ನು ಬಾಡಿಗೆ ನೀಡಿ, ಅದರ ಆದಾಯದಲ್ಲಿ ಆಶ್ರಮ ನಿರ್ವಹಣೆ ಮಾಡುತ್ತಿದ್ದರು. ವೃದ್ಧಾಶ್ರಮ ನಿರ್ವಹಣೆಗೆ ಪತಿಯ ಪಿಂಚಣಿ ಮೊತ್ತ, ಮನೆ ಬಾಡಿಗೆ ಹಣ ಸಾಕಾಗದಿದ್ದಾಗ ಇದ್ದ 100 ಗ್ರಾಂ ಬಂಗಾರವನ್ನು ಹಂತಹಂತವಾಗಿ ಮಾರಿ ಅನಾಥಾಶ್ರಮ ವಾಸಿಗಳಿಗೆ ತೊಂದರೆಯಾಗದಂತೆ ನೋಡಿಕೊಂಡರು. ಅನಾಥಾಶ್ರಮದಲ್ಲಿ ಜನರ ಸಂಖ್ಯೆ ಹೆಚ್ಚಾಗಿ ಮನೆಯಲ್ಲೇ ನಿರ್ವಹಿಸುವುದು ಕಷ್ಟವಾದಾಗ ಪಟ್ಟಣ ಪಂಚಾಯಿತಿಯವರು ಇತ್ತೀಚೆಗೆ ಸಮುದಾಯ ಭವನ ನೀಡಿ ನೆರವಾಗಿದ್ದಾರೆ. ಸದ್ಯ ಅನಾಥಾಶ್ರಮವನ್ನು ಸಮುದಾಯ ಭವನಕ್ಕೆ ಸ್ಥಳಾಂತರಿಸಿರುವ ರುದ್ರಮ್ಮ, ತಮ್ಮ ಎರಡು ಮನೆಗಳನ್ನು ಮಾರಿ, ಬರುವ ಹಣವನ್ನು ಬ್ಯಾಂಕಿನಲ್ಲಿಟ್ಟು ಬಡ್ಡಿ ಹಣದಲ್ಲಿ ಅನಾಥಾಶ್ರಮ ನಡೆಸುವ, ಜೊತೆಗೆ ವರ್ಷಕ್ಕಿಬ್ಬರು ಬಡವಿದ್ಯಾರ್ಥಿಗಳಿಗೆ ನೆರವಾಗಲು ಯೋಜನೆ ಹಾಕಿಕೊಂಡಿದ್ದಾರೆ.
