ಸಚಿವ ಸಂಪುಟ ಪುನಾರಚನೆ ನಿರೀಕ್ಷೆ : ವರಿಷ್ಠರ ಭೇಟಿಗೆ ಕಾಯುತ್ತಿರುವ ಸಿಎಂ - ಬಿಜೆಪಿಯಲ್ಲಿ ಗರಿಗೆದರಿದ ಚಟುವಟಿಕೆಗಳು

ಬೆಂಗಳೂರು : ಉಪ ಚುನಾವಣೆಯಲ್ಲಿ ಭರ್ಜರಿ ಗೆಲುವು ಸಾಧಿಸಿದ ಹಿನ್ನೆಲೆಯಲ್ಲಿ ಸಚಿವ ಸಂಪುಟ ಪುನಾರಚನೆಗೆ ಕಾಲ ಕೂಡಿ ಬರುವ ದಿನಗಳು ಹತ್ತಿರ ಬಂದಂತೆ ಬಿಜೆಪಿಯಲ್ಲಿ ರಾಜಕೀಯ ಚಟುವಟಿಕೆಗಳು ಬಿರುಸುಗೊಂಡಿವೆ. ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಅವರು ಸಂಪುಟ ಪುನಾರಚನೆ ಬಗ್ಗೆ ಮಾತನಾಡಿದ ಬೆನ್ನ ಹಿಂದೆಯೇ ಅನೇಕ ಸಚಿವಾಕಾಂಕ್ಷಿಗಳು ಅವರನ್ನು ಭೇಟಿ ಮಾಡಿ ಒತ್ತಡ ಹಾಕಿದ್ದಾರೆ.

ಮುಖ್ಯಮಂತ್ರಿ ಅವರನ್ನು ಶಾಸಕರಾದ ಮುರುಗೇಶ ನಿರಾಣಿ, ರಾಜೂಗೌಡ, ಎಂ.ಪಿ.ರೇಣುಕಾಚಾರ್ಯ, ಬೆಳ್ಳಿ ಪ್ರಕಾಶ್, ಶಿವರಾಜ ಪಾಟೀಲ್ ಬುಧವಾರ ಭೇಟಿ ಮಾಡಿದ್ದರು. ಸಿಎಂ ಭೇಟಿ ಮಾಡದ ಅನೇಕ ಹಿರಿಯ ಶಾಸಕರು ತಾವೂ ಸಚಿವಸ್ಥಾನದ ಆಕಾಂಕ್ಷಿ ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಕರೆ ಕಾಯುತ್ತಿರುವ ಸಿಎಂ: ಯಡಿಯೂರಪ್ಪ ಈಗಾಗಲೇ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ.ನಡ್ಡಾ ಜತೆ ದೂರವಾಣಿಯಲ್ಲಿ ಮಾತನಾಡಿದ್ದಾರೆ. ವರಿಷ್ಠರಿಂದ ಕರೆ ಬಂದ ಕೂಡಲೇ ದೆಹಲಿಗೆ ತೆರಳಿ ಚರ್ಚೆ ನಡೆಸಿ ಒಪ್ಪಿಗೆ ಪಡೆಯಲಿದ್ದಾರೆ ಎಂದು ಹೇಳಲಾಗುತ್ತಿದೆ.

ಮೊದಲ ಬಾರಿಗೆ ಅಭಿನಂದನೆ: ಯಡಿಯೂರಪ್ಪ ಅವರು ಮುಖ್ಯಮಂತ್ರಿ ಆದಾಗಲೂ ಪ್ರಧಾನಿ ನರೇಂದ್ರ ಮೋದಿ ಟ್ವೀಟ್ ಮಾಡಿ ಅಭಿನಂದಿಸಿರಲಿಲ್ಲ. ಹಿಂದೆ ಉಪಚುನಾವಣೆ ಗೆದ್ದಾಗ ಸಹ ಟ್ವೀಟ್ ಮಾಡಿರಲಿಲ್ಲ. ಮಂಗಳವಾರ 2 ಕ್ಷೇತ್ರಗಳಲ್ಲಿ ಗೆದ್ದ ಕೂಡಲೇ ಮೊದಲಿಗೆ ಟ್ವೀಟ್ ಮೂಲಕ ಅಭಿನಂದಿಸಿದ್ದು ಮೋದಿ. ಆದ್ದರಿಂದ ಯಡಿಯೂರಪ್ಪಗೆ ಸಂಪುಟ ಪುನಾರಚನೆಗೆ ಅನುಮತಿ ಸಿಗಬಹುದೆಂಬ ವಿಶ್ವಾಸ ಇಮ್ಮಡಿಯಾಗಿದೆ.

ಪುನಾರಚನೆ ಹೇಗೆ?: ಲಭ್ಯ ಮಾಹಿತಿ ಪ್ರಕಾರ, ವಿಸ್ತರಣೆಗಿಂತ ಪುನಾರಚನೆ ಬಗ್ಗೆಯೇ ಯಡಿಯೂರಪ್ಪರಿಗೆ ಒಲವಿದೆ. ಹಾಲಿ ಸಂಪುಟದಲ್ಲಿ ಇರುವವರಲ್ಲಿ 3 ರಿಂದ 4 ಸಚಿವರನ್ನು ಕೈಬಿಟ್ಟು 10 ಜನರನ್ನು ಸೇರಿಸಿಕೊಳ್ಳುವುದು ಅವರ ಉದ್ದೇಶವೆನ್ನಲಾಗಿದೆ. ಸಿ.ಟಿ.ರವಿ ರಾಜೀನಾಮೆ ಸೇರಿ ಸದ್ಯ ಏಳು ಸ್ಥಾನಗಳು ಖಾಲಿ ಇವೆ. ಸಂಪುಟದಲ್ಲಿ ಇರುವ ವಲಸಿಗರಿಗೆ ಯಾರಿಗೂ ಕೊಕ್ ನೀಡುವುದಿಲ್ಲ. ಬದಲಾಗಿ ಪಕ್ಷದಿಂದ ಸೇರ್ಪಡೆಯಾಗಿರುವ ಕೆಲ ಸಚಿವರನ್ನು ಮಾತ್ರ ಕೈ ಬಿಡಲಾಗುತ್ತದೆ ಎಂದು ಹೇಳಲಾಗಿದೆ.

ಜಲಸಂಪನ್ಮೂಲ ಸಚಿವ ರಮೇಶ್ ಜಾರಕಿಹೊಳಿ ನಿವಾಸದಲ್ಲಿ ಸಚಿವಾಕಾಂಕ್ಷಿಗಳು ಬುಧವಾರ ಸಭೆ ನಡೆಸಿದರು. ರೇಣುಕಾಚಾರ್ಯ, ಮುರುಗೇಶ ನಿರಾಣಿ, ಪೂರ್ಣಿಮಾ, ಬೆಳ್ಳಿ ಪ್ರಕಾಶ್, ರಾಜೂಗೌಡ, ಶಂಕರಪಾಟೀಲ್ ಮುನೇನಕೊಪ್ಪ, ಎಚ್.ವಿಶ್ವನಾಥ್ ಸೇರಿ 15ಕ್ಕೂ ಹೆಚ್ಚು ಜನ ಸಭೆಯಲ್ಲಿದ್ದರು. ಸಂಪುಟ ಪುನಾರಚನೆಗೆ ಸಿಎಂ ಮೇಲೆ ಒತ್ತಡ ಹಾಕಬೇಕು, ಕೆಲ ನಿಷ್ಕ್ರಿಯ ಸಚಿವರನ್ನು ಕೈಬಿಡಬೇಕು ಎಂಬುದು ಸೇರಿ ಕೆಲವೊಂದು ಮಹತ್ವದ ಚರ್ಚೆಗಳು ನಡೆದವು ಎನ್ನಲಾಗಿದೆ. ಸಚಿವಾಸ್ಥಾನದ ಆಕಾಂಕ್ಷಿಗಳ ಮನವಿ ಆಲಿಸಿರುವ ರಮೇಶ್ ಜಾರಕಿಹೊಳಿ, ಮುಖ್ಯಮಂತ್ರಿ ಅವರೊಂದಿಗೆ ಚರ್ಚೆ ನಡೆಸುವ ಭರವಸೆ ನೀಡಿದರೆಂದು ಮೂಲಗಳು ಖಚಿತಪಡಿಸಿವೆ.

ಯೋಗೇಶ್ವರ್ ಬಗ್ಗೆ ಒತ್ತಡ ಬೇಡ

ವಿಧಾನಪರಿಷತ್ ಸದಸ್ಯ ಸಿ.ಪಿ.ಯೋಗೇಶ್ವರ್ ಅವರನ್ನು ಸಂಪುಟಕ್ಕೆ ಸೇರಿಸುವಂತೆ ಒತ್ತಡ ತರಬಾರದು ಎಂದು ಅನೇಕ ಶಾಸಕರು ರಮೇಶ್ ಜಾರಕಿಹೊಳಿ ಮೇಲೆ ಒತ್ತಡ ಹೇರಿದರೆನ್ನಲಾಗಿದೆ. ಶಾಸಕರ ಒತ್ತಡಕ್ಕೆ ಮಣಿದ ಜಾರಕಿಹೊಳಿ ಈ ನಿಟ್ಟಿನಲ್ಲಿ ಯಾವುದೇ ಪ್ರಯತ್ನ ಮಾಡುವುದಿಲ್ಲವೆಂಬ ಭರವಸೆ ನೀಡಿದರೆಂದು ಮೂಲಗಳು ಖಚಿತಪಡಿಸಿವೆ.

https://www.vijayavani.net/govt-tightens-rules-for-ngos-intending-to-receive-funds-from-abroad/