81 ವರ್ಷದ ವೃದ್ಧನಿಗೆ ಸಿಎಬಿಜಿ ಶಸ್ತ್ರಚಿಕಿತ್ಸೆ

ವಿಜಯವಾಣಿ ಸುದ್ದಿಜಾಲ ಧಾರವಾಡ

ಇಲ್ಲಿನ ಸತ್ತೂರಿನ ಎಸ್​ಡಿಎಂ ನಾರಾಯಣ ಹೃದಯಾಲಯದಲ್ಲಿ 81 ವರ್ಷದ ಹೈರಿಸ್ಕ್​ ರೋಗಿಗೆ ಕೊರೊನರಿ ಆರ್ಟರಿ ಬೈಪಾಸ್​ ಗ್ರಾಫ್ಟ್ (ಸಿಎಬಿಜಿ) ಶಸ್ತ್ರ ಚಿಕಿತ್ಸೆಯನ್ನು ಇತ್ತೀಚೆಗೆ ಯಶಸ್ವಿಯಾಗಿ ನೆರವೇರಿಸಲಾಗಿದೆ.

ಉತ್ತರ ಕನ್ನಡ ಜಿಲ್ಲೆ ಶಿರಸಿಯ ರಾಜೇಂದ್ರ ಭಟ್​ (ಹೆಸರು ಬದಲಾಯಿಸಲಾಗಿದೆ) ತೀವ್ರ ತರಹದ ಕೊರೊನರಿ ಸಿಂಡ್ರೋಮ್​ (ಎಸಿಎಸ್​) ಮತ್ತು ಟ್ರಿಪಲ್​ ವೆಸೆಲ್​ ಡಿಸೀಸ್​ (ಇದು ಜೀವಕ್ಕೆ ಅಪಾಯಕಾರಿ ಹೃದಯದ ಗಂಭೀರ ಸ್ಥಿತಿ. ಹೃದಯಕ್ಕೆ ರಕ್ತ ಪೂರೈಸುವ 3 ಪ್ರಮುಖ ರಕ್ತನಾಳಗಳಲ್ಲಿ ಅಡಚಣೆ ಉಂಟಾಗಿ ಪರಿಚಲನೆ ಸ್ತಬ್ದಗೊಳ್ಳುತ್ತದೆ) ನಿಂದ ಬಳಲುತ್ತಿದ್ದರು. ಚಿಕಿತ್ಸೆಗಾಗಿ ಎಸ್​ಡಿಎಂ ನಾರಾಯಣ ಹೃದಯಾಲಯಕ್ಕೆ ದಾಖಲಾಗಿದ್ದರು.

ಹಿರಿಯ ಹೃದ್ರೋಗ ತಜ್ಞ ಡಾ. ರಘುಪ್ರಸಾದ ಎಸ್​. ತಪಾಸಣೆ ನಡೆಸಿ ಡಾ. ಸಾಯಿ ಸೂರಜ್​ ಅವರಿಗೆ ಶಿಫಾರಸ್ಸು ಮಾಡಿದ್ದರು. ಡಾ. ಸಾಯಿಸೂರಜ್​ ಹಾಗೂ ತಂಡ ರೋಗಿಯ ತಪಾಸಣೆ ನಡೆಸಿ, ಹೃದಯದ ನೋವು ಕಡಿಮೆ ಮಾಡಿ ಸಿಎಬಿಜಿ ಶಸ್ತ್ರಚಿಕಿತ್ಸೆ ನೇರವೇರಿಸಿದ್ದಾರೆ.

ರೋಗಿಯ ವಯಸ್ಸು ಮತ್ತು ಡಯಾಬಿಟಿಸ್​ನ ಕಾರಣದಿಂದ ಶಸ್ತ್ರಚಿಕಿತ್ಸೆ ಜಟಿಲವಾಗಿತ್ತು. ಆದರೂ ನಮ್ಮ ತಂಡದ ಸಹಕಾರದಿಂದ ಯಶಸ್ವಿಯಾಗಿ ಶಸ್ತ್ರಚಿಕಿತ್ಸೆ ನೆರವೇರಿಸಿದ್ದು, ರೋಗಿಗೆ ಅತ್ಯುತ್ತಮ ನರ್ಸಿಂಗ್ ಸೇವೆ ಹಾಗೂ ಫಿಜಿಯೋಥೆರಪಿ ನೀಡಲಾಗಿದೆ. ಕೆಲ ದಿನಗಳ ಹಿಂದಷ್ಟೇ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದು, ಅವರ ಆರೋಗ್ಯದಲ್ಲಿ ಸುಧಾರಣೆ ಕಂಡಿದೆ ಎಂದು ಡಾ. ಸಾಯಿ ಸೂರಜ್​ ತಿಳಿಸಿದ್ದಾರೆ.

ಎಸ್​ಡಿಎಂ ನಾರಾಯಣ ಹಾರ್ಟ್​ ಕೇರ್​ನ ಚಿಕಿತ್ಸೆ ಕುರಿತು ಅಭಿಪ್ರಾಯ ತಿಳಿಸಿರುವ ರಾಜೇಂದ್ರ ಭಟ್​, ವೈದ್ಯರು ನನ್ನ ಜೀವ ಉಳಿಸಿದ್ದಾರೆ. ಎಲ್ಲ ವೈದ್ಯರು ಹಾಗೂ ಸಿಬ್ಬಂದಿ ತಂಡಕ್ಕೆ ಕೃತಜ್ಞತೆ ತಿಳಿಸಿದ್ದಾರೆ.