ಇನ್ನು ಭಟ್ಕಳ ಕಡೆ ಸಾಗುವ ಪ್ರಯಾಣಿಕರ ಪಾಡು ಹೇಳತೀರದು. ಅಂಗಡಿ, ಬೇಕರಿ ಮುಂಭಾಗದಲ್ಲಿ ನಿಂತು ಬಸ್ಸಿಗಾಗಿ ಕಾಯಬೇಕಿದೆ. ಒಂದು ಕಡೆ ರಥಬೀದಿ, ಇನ್ನೊಂದೆಡೆ ಅಂಡರ್ಪಾಸ್ ಇದರ ನಡುವೆ ಸರ್ವೀಸ್ ರಸ್ತೆಯಲ್ಲಿ ವಾಹನ ಜಂಜಾಟದ ನಡುವೆ ಬಸ್ಗಾಗಿ ಕಾಯಬೇಕು. ಉಳಿದ ಪ್ರದೇಶಗಳಿಗೆ ಹೋಲಿಸಿದರೆ ತಾಲೂಕು ಕೇಂದ್ರವಾದ ಬೈಂದೂರಿನಲ್ಲಿ ಬಸ್ ತಂಗುದಾಣ ಅತ್ಯಂತ ಅವಶ್ಯ. ಐದಕ್ಕೂ ಅಧಿಕ ಫ್ರೌಢಶಾಲೆ, ಪದವಿ ಹಾಗೂ ಪ್ರಥಮ ದರ್ಜೆ ಕಾಲೇಜು, ಕುಂದಾಪುರ, ಭಟ್ಕಳ ಸೇರಿ ಪ್ರತಿದಿನ ಎರಡು ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಸಂಚರಿಸುತ್ತಾರೆ. ಇದರ ನಡುವೆ ಹಳ್ಳಿಗಳಿಂದ ಬರುವ ರೈತರು, ದೂರದೂರಿನಿಂದ ಬರುವ ಜನಸಾಮಾನ್ಯರು, ನೂರಾರು ನೌಕರರು ರಸ್ತೆ ಬದಿಯಲ್ಲೆ ಕಾಯಬೇಕು.
