ಮಂಗಳೂರಿನ ಬಿಜೈ ಬಳಿ ಕಂಪ್ಯೂಟರ್ ಹಾರ್ಡ್ವೇರ್ಗೆ ಸಂಬಂಧಿಸಿದ ‘ಜಿಆರ್ಬಿ ಇನ್ಪೋಟೆಕ್’ ಎಂಬ ಸಂಸ್ಥೆ ನಡೆಸುತ್ತಿದ್ದ ರವೀಂದ್ರ ಪೂಜಾರಿ, ಕ್ರಿಸ್ಮಸ್ ರಜೆ ನಿಮಿತ್ತ ಅಜ್ಜಿಕಲ್ಲಿನಲ್ಲಿರುವ ತಮ್ಮ ಮನೆಗೆ ಬಂದಿದ್ದರು. ಮನೆಯ ಸುತ್ತ ನೆಟ್ಟಿದ್ದ ಅಡಕೆ ಮರಗಳಲ್ಲಿ ಹಣ್ಣಾಗಿದ್ದ ಅಡಕೆಯನ್ನು ಅವರು ಅಲ್ಯೂಮಿನಿಯಂ ಕೊಕ್ಕೆ ಬಳಸಿ ಕೊಯ್ಯಲು ಮುಂದಾಗಿದ್ದರು. ಈ ಸಂದರ್ಭ ಅಲ್ಯೂಮಿನಿಯಂ ಕೊಕ್ಕೆ ಮೇಲ್ಭಾಗದಲ್ಲಿ ಹಾದು ಹೋಗಿದ್ದ ಎಚ್.ಟಿ.ವಿದ್ಯುತ್ ಲೈನಿಗೆ ಸ್ಪರ್ಶಿಸಿದೆ. ಪರಿಣಾಮ ಕೊಕ್ಕೆ ಮೂಲ ವಿದ್ಯುತ್ ಪ್ರವಹಿಸಿ ಆಘಾತಕ್ಕೆ ಒಳಗಾದ ಅವರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಸಂಪ್ಯ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಅವರು ತಂದೆ, ತಾಯಿ, ತೆಗ್ಗು ಸರ್ಕಾರಿ ಶಾಲೆ ಶಿಕ್ಷಕಿಯಾಗಿರುವ ಪತ್ನಿ, ಒಂದು ವರ್ಷದ ಮಗುವನ್ನು ಅಗಲಿದ್ದಾರೆ.
