ಕಾರು ಅಡ್ಡಗಟ್ಟಿ ಉದ್ಯಮಿಯ ದರೋಡೆ

ಮಂಗಳೂರು: ಬೆನ್ನತ್ತಿಕೊಂಡು ಬಂದಿದ್ದ ತಂಡವೊಂದು ಸಿನಿಮೀಯ ರೀತಿಯಲ್ಲಿ ಉದ್ಯಮಿಯ ಕಾರನ್ನು ಅಡ್ಡಗಟ್ಟಿ ಕಾರು ಸಹಿತ ಲಕ್ಷಾಂತರ ರೂ. ಮೌಲ್ಯದ ಚಿನ್ನಾಭರಣವಿದ್ದ ಬ್ಯಾಗನ್ನು ಹೊತ್ತೊಯ್ದು ದರೋಡೆಗೈದ ಘಟನೆ ಮಂಗಳೂರಿನ ಕೂಳೂರು ಸಮೀಪದ ಬೈಕಂಪಾಡಿ ರಾ.ಹೆ. 66ರಲ್ಲಿ ಸೋಮವಾರ ಸಂಭವಿಸಿದೆ.

ಅವರ ಸ್ವಿಫ್ಟ್‌ ಕಾರನ್ನು ಕೂಡ ಅಪಹರಿಸಲಾಗಿದೆ. ಕೇರಳದ ಪಯ್ಯನ್ನೂರು ಮೂಲದ ಉದ್ಯಮಿ ವಿಕಾಸ್‌ ಅವರನ್ನು ದರೋಡೆಗೈಯ್ಯಲಾಗಿದ್ದು, ಅವರು ಮಹಾರಾಷ್ಟ್ರದ ಸಾಂಗ್ಲಿಯಲ್ಲಿ ಬಂಗಾರದ ಉದ್ಯಮವನ್ನು ನಡೆಸುತ್ತಿದ್ದರು. ಅವರು ತನ್ನ ಪತ್ನಿ ಮತ್ತು ಮಗುವಿನೊಂದಿಗೆ ಸಾಂಗ್ಲಿಯಿಂದ ಪಯ್ಯನ್ನೂರಿಗೆ ಕಾರಿನಲ್ಲಿ ಹೋಗುತ್ತಿದ್ದಾಗ ಇನ್ನೋವಾ ಸಹಿತ ಮೂರು ಕಾರುಗಳಲ್ಲಿ ಬಂದಿದ್ದ ತಂಡ ಮುಂಜಾನೆ 2.15ರ ಸುಮಾರಿಗೆ ಬೈಕಂಪಾಡಿಯ ಜಂಕ್ಷನ್‌ನಲ್ಲೇ ಇರುವ ದ್ವಾರ ಹೊಟೇಲಿನ ಮುಂಭಾಗದ ಹೆದ್ದಾರಿಯಲ್ಲಿ ಕಾರನ್ನು ಅಡ್ಡಗಟ್ಟಿದ್ದಾರೆ. ಬೆದರಿಕೆ ಹಾಕಿ ವಿಕಾಸ್‌ ಅವರನ್ನು ಕಾರಿನಿಂದ ಇಳಿಸಿ ದರೋಡೆಕೋರರಲ್ಲಿ ಕೆಲವರು ಕಾರಿನೊಂದಿಗೆ ವಿಕಾಸ್‌ ಅವರ ಪತ್ನಿ, ಮಗುವನ್ನು ಅಪಹರಿಸಿ ಪ್ರಯಾಣಿಸುವಾಗ ಕಾರಿನಲ್ಲಿದ್ದ ಚಿನ್ನಾಭರಣವಿದ್ದ ಬ್ಯಾಗನ್ನು ಕಿತ್ತುಕೊಂಡು ಪಣಂಬೂರು ಬೀಚ್‌ ರಸ್ತೆಯಲ್ಲಿ ವಿಕಾಸ್‌ ಅವರ ಪತ್ನಿ, ಮಗುವನ್ನು ಬಿಟ್ಟು ಅವರ ಸ್ವಿಫ್ಟ್‌ ಕಾರನ್ನು ಕೂಡ ಅಪಹರಿಸಿಕೊಂಡು ಹೋಗಿದ್ದಾರೆ. ಪ್ರಾಥಮಿಕ ಮಾಹಿತಿಗಳ ಪ್ರಕಾರ 180 ಗ್ರಾಂ ಚಿನ್ನಾಭರಣವಿತ್ತು ಎನ್ನಲಾಗುತ್ತಿದೆ.

ಆಶ್ಚರ್ಯಕರ ಸಂಗತಿ ಎಂದರೆ ದರೋಡೆಕೋರರು ಬ್ಯಾಗನ್ನು ತೆಗೆದುಕೊಂಡಿದ್ದಾರೆಯೇ ವಿನಾ, ಅಪಹೃತ ವಿಕಾಸ್‌ ಪತ್ನಿಯ ಕತ್ತಿನಲ್ಲಿದ್ದ ಯಾವುದೇ ಬಂಗಾರಕ್ಕೆ ಕೈಹಾಕಿಲ್ಲ.

ದರೋಡೆಗೈಯುವ ವೇಳೆಯಲ್ಲಿ ಹೆದ್ದಾರಿಯಲ್ಲಿ ಹಲವು ವಾಹನಗಳೂ ಸಾಗುತ್ತಿದ್ದವು. ಆದರೆ ದರೋಡೆಕೋರರು ಯಾವುದೇ ಭಯವಿಲ್ಲದೇ ಜಂಕ್ಷನ್‌ನಲ್ಲಿಯೇ ಕೃತ್ಯವೆಸಗಿರುವುದನ್ನು ನೋಡಿದರೆ ಅವರು ವೃತ್ತಿಪರ ಕಳ್ಳರೇ ಆಗಿರುವ ಸಾಧ್ಯತೆ ಇದೆ.

ಸುರತ್ಕಲ್‌ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಕಮಿಷನರ್‌ ಸೂಚನೆಯಂತೆ ವಿಶೇಷ ತಂಡಗಳು ಆರೋಪಿಗಳ ಪತ್ತೆಗಾಗಿ ಕಾರ್ಯಾಚರಣೆಗೆ ಇಳಿದಿದ್ದು, ಕಾರ್ಯಪ್ರವೃತ್ತವಾಗಿದೆ. ವಿವಿಧ ಹೊಟೇಲು, ಲಾಡ್ಜ್‌, ಪ್ರಮುಖವಾಗಿ ಟೋಲ್‌ಗೇಟ್‌ ಸಿಸಿ ಕೆಮರಾಗಳ ಪರಿಶೀಲನೆಯಲ್ಲಿ ಪೊಲೀಸರು ತೊಡಗಿಕೊಂಡಿದ್ದು, ಪ್ರಕರಣ ಕ್ಷಿಪ್ರವಾಗಿ ಭೇದಿಸುವ ವಿಶ್ವಾಸವನ್ನು ಮಂಗಳೂರು ನಗರದ ಪೊಲೀಸ್‌ ಕಮಿಷನರ್‌ ಸು˜ರ್‌ ಕುಮಾರ್‌ ರೆಡ್ಡಿ ವ್ಯಕ್ತಪಡಿಸಿದ್ದಾರೆ.

ಕೇರಳದವರಾದರೂ ವಿಕಾಸ್‌ ಸಾಂಗ್ಲಿಯಲ್ಲಿ ಜುವೆಲರಿ ಅಂಗಡಿ ಹೊಂದಿದ್ದರು. ಅವರು ಅಲ್ಲಿಂದ ಹೊರಡುವಾಗ ಕಾರಿನಲ್ಲಿ ಚಿನ್ನಾಭರಣ ಸಾಗಿಸುತ್ತಿದ್ದಾರೆ ಎನ್ನುವ ಮಾಹಿತಿ ದರೋಡೆಕೋರರಿಗೆ ಸಿಕ್ಕಿರಬಹುದು. ಅವರಿಗೆ ಪರಿಚಯದವರು ಅಥವಾ ಪರಿಚಯದವರಿಂದ ಮಾಹಿತಿ ಪಡೆದು ತಂಡವಾಗಿ ಕಾರ್ಯಾಚರಣೆಗೆ ಇಳಿದಿರುವ ಸಾಧ್ಯತೆ ಇದೆ. ಸಾಂಗ್ಲಿಯಿಂದಲೇ ಅವರ ಕಾರನ್ನು ಫಾಲೋ ಮಾಡಿಕೊಂಡು ಬಂದಿರುವ ಸಾಧ್ಯತೆಯೇ ಹೆಚ್ಚಿದೆ. 180 ಗ್ರಾಂ ಚಿನ್ನಕ್ಕಾಗಿ ಮೂರು ಕಾರುಗಳನ್ನು ಬಳಸಿ ದರೋಡೆ ಮಾಡಿರಲಿಕ್ಕಿಲ್ಲ. ಬ್ಯಾಗಿನಲ್ಲಿ ಚಿನ್ನಾಭರಣದ ಮಾಹಿತಿ ದರೋಡೆಕೋರರಿಗೆ ಸಿಗುವಾಗ ಅದರಲ್ಲಿ ದೊಡ್ಡ ಮಟ್ಟದ ಚಿನ್ನಾಭರಣ ಇರಬಹುದು ಎಂದುಕೊಂಡು ಮೂರು ಕಾರುಗಳಲ್ಲಿ ಬಂದಿರಬಹುದು.