ಬಸ್​ಗಳು ಫುಲ್ ರಷ್

ಹುಬ್ಬಳ್ಳಿ: ಶಕ್ತಿ ಯೋಜನೆಯಡಿ ಮಹಿಳೆಯರಿಗೆ ರಾಜ್ಯ ಸರ್ಕಾರ ಉಚಿತ ಬಸ್ ಪ್ರಯಾಣಕ್ಕೆ ಅನುಕೂಲ ಕಲ್ಪಿಸಿದ ಹಿನ್ನೆಲೆಯಲ್ಲಿ ನಗರದಲ್ಲಿ ಸಾರಿಗೆ ಸಂಸ್ಥೆಯ ಬಸ್​ಗಳು ರಷ್ ಆಗಿದ್ದವು. ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯ ನಗರ ಸಾರಿಗೆಯಲ್ಲಿ ಸೋಮವಾರ 17,154 ಮಹಿಳೆಯರು (2,11,263 ರೂ.), ಗ್ರಾಮಾಂತರ ವಿಭಾಗದಲ್ಲಿ 11,780 ಮಹಿಳೆಯರು (5,07,411 ರೂ.) ಪ್ರಯಾಣ ಮಾಡಿದರು.

ಹು-ಧಾ ಅವಳಿ ನಗರ ಹೊರತಾಗಿಯೂ ಹೊರಗಿನ ಪ್ರದೇಶಗಳಲ್ಲಿ ಮಹಿಳೆಯರು ಪ್ರಯಾಣ ನಡೆಸಿದರು. ಈ ಮೊದಲು ಬಸ್​ಗಳು ಅಷ್ಟೊಂದು ಭರ್ತಿ ಕಂಡುಬರುತ್ತಿಲ್ಲ. ಕಂಡು ಬಂದಿದ್ದರೂ ಪುರುಷರು ಮತ್ತು ಮಹಿಳೆಯರು ಸಮ ಪ್ರಮಾಣದಲ್ಲಿ ಸಂಚರಿಸುತ್ತಿದ್ದರು. ಆದರೆ, ಶಕ್ತಿ ಯೋಜನೆ ಜಾರಿಯಾಗುತ್ತಿದ್ದಂತೆ ಮಹಿಳೆಯರು ಅದರಲ್ಲೂ ಯುವತಿಯರು ಹೆಚ್ಚಾಗಿ ಬಸ್​ಗಳಲ್ಲಿ ಓಡಾಡುತ್ತಿರುವುದ ಕಂಡುಬರುತ್ತಿದೆ.

ಬಸ್​ಗಳು ಭರ್ತಿ ಆಗುತ್ತಿರುವ ಹಿನ್ನೆಲೆಯಲ್ಲಿ ಬಸ್​ನೊಳಗೆ ಹಿಂದುಗಡೆ ಹೋಗಿ ಟಿಕೆಟ್ ತೆಗೆದುಕೊಳ್ಳಲು ಜನರಿಗೆ ಸಾಧ್ಯವಾಗುತ್ತಿಲ್ಲ. ಬಸ್ ಹತ್ತುವ ಬಾಗಿಲಲ್ಲಿಯೇ ನಿಂತು ನಿರ್ವಾಹಕರು ಪುರುಷರಿಗೆ ಟಿಕೆಟ್ ಕೊಡುತ್ತಿದ್ದರು. ಬಸ್​ಗಳ ಭರ್ತಿ ಹಿನ್ನೆಲೆಯಲ್ಲಿ ನಿರ್ವಾಹಕರಿಗೆ ತಲೆನೋವು ತರಿಸಿದೆ. ಹು-ಧಾ ಅವಳಿ ನಗರದಲ್ಲಿ ಸಂಚರಿಸುತ್ತಿರುವ ಬಿಆರ್​ಟಿಎಸ್ ಚಿಗರಿ ಬಸ್​ಗಳು ಖಾಲಿ ಓಡುತ್ತಿದ್ದವು.