ಕಾಂಪೌಂಡ್​ಗೆ ಬಸ್​ ಡಿಕ್ಕಿಯಾಗಿ ಗಾಯ

ಹೊಸೂರು: ಹೊಸೂರಿನ ದರ್ಗಾ ಬಳಿ ಬೆಂಗಳೂರು&ಕೃಷ್ಣಗಿರಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಚಲಿಸುತ್ತಿದ್ದ ಖಾಸಗಿ ಬಸ್​ನ ಮುಂದಿನ ಟಯರ್​ ಸ್ಫೋಟಗೊಂಡು ಬಸ್​ ಹೆದ್ದಾರಿ ಬದಿಯ ಕಾಂಪೌಂಡ್​ಗೆ ಡಿಕ್ಕಿಯಾಗಿ 10ಕ್ಕೂ ಹೆಚ್ಚು ಪ್ರಯಾಣಿಕರು ಗಾಯಗೊಂಡಿದ್ದಾರೆ. ಬಸ್​ ತಡೆಗೋಡೆ ಮುರಿದು ಎರಡು ಸರ್ವೀಸ್​ ರಸ್ತೆಗಳನ್ನು ದಾಟಿ ಕಾರ್ಖಾನೆಯ ಕಾಂಪೌಂಡ್​ಗೆ ಡಿಕ್ಕಿಯಾಗಿದೆ. ಬೆಂಗಳೂರಿನ ಕಲಾಸಿಪಾಳ್ಯ ಬಸ್​ ನಿಲ್ದಾಣದಿಂದ ಹೊಸೂರಿಗೆ ಬರುತ್ತಿದ್ದು, ಚಾಲಕ ಮಣಿ, ಕಂಡಕ್ಟರ್​ ಮುನಿರಾಜ್​ ಸರಿ ಬಸ್​ನಲ್ಲಿ 25ಕ್ಕೂ ಹೆಚ್ಚು ಪ್ರಯಾಣಿಕರು ಇದ್ದರು. ಗಾಯಾಳುಗಳನ್ನು ರಸಿ ಹೊಸೂರು ಸರ್ಕಾರಿ ಆಸ್ಪತ್ರೆಗೆ ಕಳುಹಿಸಲಾಗಿದೆ.

ಆರ್​ಟಿಒ ಮಹಿಳಾ ಇನ್​ಸ್ಪೆಕ್ಟರ್​ಗೆ ಲೈಂಗಿಕ ಕಿರುಕುಳ?

ನೆಲಮಂಗಲ: ಸಾರಿಗೆ ಕಚೇರಿಯಲ್ಲಿ ಪ್ರಾದೇಶಿಕ ಸಾರಿಗೆ ಅಧಿಕಾರಿಯೊಬ್ಬರು ಮಹಿಳಾ ಅಧಿಕಾರಿಗೆ ಲೈಂಗಿಕ ಕಿರುಕುಳ ನೀಡಿರುವ ಅರೋಪ ತಡವಾಗಿ ಬೆಳಕಿಗೆ ಬಂದಿದೆ. ಬೆಂಗಳೂರು ಉತ್ತರ ತಾಲೂಕಿನ ಗೌಡಹಳ್ಳಿ ಬಳಿಯ ಸಾರಿಗೆ ಕಚೇರಿಯಲ್ಲಿ ಪ್ರಾದೇಶಿಕ ಸಾರಿಗೆ ಕಚೇರಿ ಅಧಿಕಾರಿಯಾಗಿರುವ ರಾಜಕುಮಾರ್​ ಅವರು ಲೈಂಗಿಕ ಕಿರುಕುಳ ನೀಡಿದ್ದಾರೆ ಎಂದು ಆರೋಪಿಸಿ ಕಚೇರಿಯ ಮಹಿಳಾ ಇನ್​ಸ್ಪೆಕ್ಟರ್​ ಮಾದನಾಯಕನಹಳ್ಳಿ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಇತ್ತ ಪ್ರಕರಣ ದಾಖಲಾಗುತ್ತಿದ್ದಂತೆ ರಾಜ್​ಕುಮಾರ್​ ಮೊಬೈಲ್​ ಆಫ್​ ಮಾಡಿಕೊಂಡು ತಲೆಮರೆಸಿಕೊಂಡಿದ್ದಾರೆ. ಪ್ರಕರಣ ದಾಖಲಿಸಿಕೊಂಡ ಮಾದನಾಯಕನಹಳ್ಳಿ ಪೊಲೀಸರು ಶೋಧ ಕಾರ್ಯ ಆರಂಭಿಸಿದ್ದಾರೆ. ರಾಜಕುಮಾರ್​ ನನ್ನನ್ನು ಕಚೇರಿಯ ಕೊಠಡಿಗೆ ಕರೆಸಿಕೊಂಡು ಬೆದರಿಕೆಯೊಡ್ಡಿ ನಾನು ಹಾಕಿಕೊಂಡಿದ್ದ ಜರ್ಕಿನ್​ಅನ್ನು ಬಲವಂತವಾಗಿ ಬಿಚ್ಚಿಸಿ ಅಸಭ್ಯವಾಗಿ ದಿಟ್ಟಿಸಿ ನೋಡಿದರು. ಈ ಹಿಂದೆಯೂ ನಾನು ಸಮವಸ್ತ್ರದಲ್ಲಿದ್ದಾಗ ಅನೇಕ ಬಾರಿ ಕೆಟ್ಟದಾಗಿ ದಿಟ್ಟಿಸಿ ನೋಡುತ್ತಿದ್ದರು. ಇದರಿಂದ ಮುಜುಗರಕ್ಕೀಡಾಗಿ ಕೆಲಸ ಬಿಡಲು ಯೋಚಿಸಿದ್ದು, ಬಳಿಕ ನನ್ನ ಪತಿ ಧೈರ್ಯ ತುಂಬಿ, ಜರ್ಕಿನ್​ ಹಾಕಿಕೊಂಡು ಹೋಗು ಎಂದು ಸಲಹೆ ನೀಡಿದ್ದರು. ಅದರಂತೆ ಜರ್ಕಿನ್​ ಹಾಕಿಕೊಂಡು ಬಂದರೂ ಅದನ್ನು ಬಿಚ್ಚಿಸಿ ಕೆಟ್ಟದಾಗಿ ನಡೆದುಕೊಳ್ಳುತ್ತಿದ್ದಾರೆ ಎಂದು ಆರ್​ಟಿಒ ಇನ್​ಸ್ಪೆಕ್ಟರ್​ ದೂರಿನಲ್ಲಿ ತಿಳಿಸಿದ್ದಾರೆ.

ಮಹಿಳಾ ಸಂಟನೆಗಳ ಆಕ್ರೋಶ : ಮಹಿಳಾ ಅಧಿಕಾರಿಗೆ ಲೈಂಗಿಕ ಕಿರುಕುಳ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ವೈರಲ್​ ಆಗಿದ್ದು, ಮಹಿಳಾ ಸಂಟನೆಗಳು ತೀವ್ರ ಆಕ್ರೋಶ ವ್ಯಕ್ತಪಡಿಸಿ ಅಧಿಕಾರಿ ರಾಜ್​ಕುಮಾರ್​ ಅವರನ್ನು ಬಂಧಿಸಿ ಕಾನೂನು ಕ್ರಮ ಕೈಗೊಳ್ಳಬೇಕು. ಇಲ್ಲವಾದಲ್ಲಿ ಕಚೇರಿಗೆ ಮುತ್ತಿಗೆ ಹಾಕಿ ಪ್ರತಿಭಟಿಸಲಾಗುವುದು ಎಂದು ಎಚ್ಚರಿಕೆ ನೀಡಿವೆ.