ಪ್ರಸ್ತುತ ಮಹಾನಗರದಲ್ಲಿ ಸುಮಾರು 5 ಸಾವಿರಕ್ಕಿಂತಲೂ ಹೆಚ್ಚಿನ ಸಂಖ್ಯೆಯ ಪ್ರಾಣಿಮಾಂಸ ಮಾರಾಟ ಮಳಿಗೆಗಳಿವೆ. ಇವುಗಳಲ್ಲಿ ಕುರಿ, ಕೋಳಿ, ಹಂದಿ, ಮೀನು ಹಾಗೂ ಬೀಫ್ ಮಳಿಗೆಗಳು ಸೇರಿದ್ದು, ಅರ್ಧದಷ್ಟು ಚಿಕನ್ ಸ್ಟಾಲ್ಗಳು ಕಾರ್ಯಾಚರಿಸುತ್ತಿವೆ. ಆದರೆ, ಹಲವು ಮಳಿಗೆಗಳು ಪಾಲಿಕೆಯಿಂದ ಪರವಾನಗಿ ಪಡೆಯದೆ ನಡೆಯುತ್ತಿವೆ ಎಂಬ ದೂರು ಕೇಳಿಬಂದಿದೆ. ಕಾರ್ಪೋರೇಷನ್ ಬಳಿಯೂ ಇಂತಹ ಮಳಿಗೆಗಳ ನಿಖರ ಸಂಖ್ಯೆ ಇಲ್ಲ. ಹಾಗಾಗಿ ಪ್ರಾಣಿಮಾಂಸದ ತ್ಯಾಜ್ಯ ವಿಲೇವಾರಿ ಹಳಿತಪ್ಪಿದೆ. ಹಲವು ಮಳಿಗೆದಾರರು ಮಾಂಸದ ತ್ಯಾಜ್ಯವನ್ನು ರಸ್ತೆಬದಿ, ಚರಂಡಿ, ರಾಜಕಾಲುವೆಗೆ ಬಿಸಾಡುವ ಪ್ರವೃತ್ತಿ ಬೆಳೆಸಿಕೊಂಡಿದ್ದಾರೆ. ಮಧ್ಯರಾತ್ರಿ ವೇಳೆ ಮೋರಿಗೆ ಸುರಿಯುವ ಕಾರಣ ತಪ್ಪಿತಸ್ಥರನ್ನು ಪತ್ತೆ ಹಚ್ಚಲು ಸಾಧ್ಯವಾಗುತ್ತಿಲ್ಲ. ಇದರಿಂದ ಪರಿಸರಕ್ಕೆ ಹಾನಿಯಾಗುತ್ತಿದ್ದು, ರೋಗ-ರುಜೀನಕ್ಕೂ ಆಸ್ಪದ ನೀಡಲಾಗಿದೆ.
