ಕಾರವಾರ: ಅಂಕೋಲಾ ತಾಲೂಕಿನ ಮಂಜಗುಣಿ-ಕುಮಟಾ ತಾಲೂಕಿನ ಗಂಗಾವಳಿ ನಡುವಿನ ಸೇತುವೆಯ ಕಾಮಗಾರಿಯನ್ನು ಶೀಘ್ರ ಪೂರ್ಣಗೊಳಿಸಿ ವಾಹನ ಸಂಚಾರಕ್ಕೆ ಮುಕ್ತಗೊಳಿಸುವಂತೆ ಆ ಭಾಗದ ಜನಪ್ರತಿನಿಧಿಗಳು, ಪ್ರಮುಖರು, ಅಪರ ಜಿಲ್ಲಾಧಿಕಾರಿ ಪ್ರಕಾಶ ರಜಪೂತ ಅವರಿಗೆ ಬುಧವಾರ ಮನವಿ ಮಾಡಿದ್ದಾರೆ.
ಬೇಲೆಕೇರಿಯಿಂದ ತದಡಿ ಬಂದರಿನವರೆಗೆ ಸಂಪರ್ಕಿಸುವ ಮಾರ್ಗವನ್ನು ರಾಜ್ಯ ಹೆದ್ದಾರಿ-304 ಎಂದು ಘೋಷಿಸಿ ಕರ್ನಾಟಕ ಸರ್ಕಾರದ ಲೋಕೋಪಯೋಗಿ ಸಚಿವಾಲಯವು ನವೆಂಬರ್ 6 ರಂದು ಆದೇಶ ಹೊರಡಿಸಿದೆ.
ಈ ಹೆದ್ದಾರಿಯು ಅಂಕೋಲಾ ಬೇಲೆಕೇರಿ ಗ್ರಾಮದ ಸರ್ವೇ ನಂಬರ್ 512 ಹಾಗೂ ಬಲಕ್ಕೆ 511 ಯಿಂದ ಪ್ರಾರಂಭವಾಗಿ ಅಗರ್ಕೊಪ್ಪ, ಅರ್ಗಾಕೇರಿ, ಕೊಗ್ರೆ, ಮಂಜಗೂಣಿ, ನಾಡು ಮಾಸ್ಕೇರಿ, ಮಾದನಚಿಟ್ಟೆ, ಗೋಕರ್ಣ, ನರಸಾಪುರ, ಕುಜನಿ, ಚೌಡಗೇರಿ ಕ್ರಾಸ್, ಸಾಣಿಕಟ್ಟಾ ಕ್ರಾಸ್ ತದಡಿ ಮುಖಾಂತರ ಸರ್ವೇ ನಂಬರ್ 1163/ಅ ಹಾಗೂ ಎಡಕ್ಕೆ ತದಡಿ ಬಂದರಿನಲ್ಲಿ ಕೊನೆಗೊಳ್ಳುತ್ತದೆ. ಅಂಕೋಲಾ ತಾಲೂಕಿನಲ್ಲಿ 13.58 ಕಿಮೀ ಸಂಚರಿಸಲಿದ್ದು, ಅಂಕೋಲಾ ಸೇರಿ ಒಟ್ಟು 22.79 ಕಿಮೀ ಹೆದ್ದಾರಿ ಎಂದು ಸರ್ಕಾರದ ಅಪರ ಮುಖ್ಯ ಕಾರ್ಯದರ್ಶಿ ಶಾಂತಕುಮಾರ್ ಕೆ. ಅವರು ಆದೇಶ ಹೊರಡಿಸಿದ್ದಾರೆ.
ಆದರೆ, ನಡುವೆ ಗಂಗಾವಳಿ ನದಿಗೆ ಮಂಜಗುಣಿ-ಗಂಗಾವಳಿ ನದಿಗೆ ಕರ್ನಾಟಕ ಗ್ರಾಮೀಣ ರಸ್ತೆ ಅಭಿವೃದ್ಧಿ ನಿಗಮದಿಂದ ಸುಮಾರು 32 ಕೋಟಿ ರೂ. ವೆಚ್ಚದಲ್ಲಿ ಸೇತುವೆ ಕಾಮಗಾರಿ ನಡೆಯುತ್ತಿದೆ. ಕಾಮಗಾರಿ ಪ್ರಾರಂಭವಾಗಿ 7 ವರ್ಷ ಕಳೆದರೂ ಮುಕ್ತಾಯವಾಗಿಲ್ಲ. ಸೇತುವೆ ಕಾಮಗಾರಿ ಮುಗಿದು ಗಂಗಾವಳಿ ಭಾಗದಲ್ಲಿ ಪಿಚ್ಚಿಂಗ್ ಕೆಲಸ ಸಹ ಮುಗಿಸಿದೆ. ಆದರೆ, ಮಂಜಗುಣಿ ಭಾಗದಲ್ಲಿ ಸೇತುವೆಗೆ ಸಂಪರ್ಕ ಕಲ್ಪಿಸುವ ಪಿಚ್ಚಿಂಗ್ ಕಾಮಗಾರಿ ಮುಗಿದಿಲ್ಲ. ಅದಕ್ಕೆ ಇನ್ನು ಹೆಚ್ಚುವರಿ ಅನುದಾನ ಮಂಜೂರಾಗಬೇಕು ಎನ್ನಲಾಗುತ್ತಿದೆ. ಆದರೆ, ಈಗ ಸಣ್ಣ ಕಾಲು ದಾರಿ ಮಾಡಿ ಬೈಕ್ ಹೋಗಲು ಅವಕಾಶ ಮಾಡಿಕೊಡಲಾಗಿದ್ದು, ನಿತ್ಯವೂ ಅಪಘಾತ ಸಂಭವಿಸುತ್ತಿದೆ.
