ಕಿತ್ತುಹೋದ ಉಡುಪಿಯ ಬ್ರಹ್ಮಗಿರಿ-ಅಜ್ಜರಕಾಡು ರಸ್ತೆ

ಡಾಂಬರೀಕರಣಗೊಂಡ 3 ತಿಂಗಳಲ್ಲೇ ಹಾನಿ | ದುರಸ್ತಿ ಮಾಡಲು ಜನರ ಆಗ್ರಹ

ವಿಜಯವಾಣಿ ಸುದ್ದಿಜಾಲ ಉಡುಪಿ
ನಗರದ ಪ್ರಮುಖ ರಸ್ತೆ ಹಾಗೂ ಜಿಲ್ಲಾಸ್ಪತ್ರೆಗೆ ತೆರಳುವ ಮಾರ್ಗದಲ್ಲಿ ರಸ್ತೆ ಕಿತ್ತುಹೋಗಿದ್ದು, ವಾಹನ ಸಂಚಾರಕ್ಕೆ ತೊಡಕಾಗುತ್ತಿದೆ. ನಗರದ ಬ್ರಹ್ಮಗಿರಿ ಸರ್ಕಲ್​ನಿಂದ ಅಜ್ಜರಕಾಡು ಸಮೀಪದ ಜಿಲ್ಲಾಸ್ಪತ್ರೆಯವರೆಗೂ ರಸ್ತೆಯಲ್ಲಿ ಹೊಂಡಗಳು ಬಿದ್ದು, ಬೈಕ್​ ಹಾಗೂ ಸಣ್ಣ ವಾಹನಗಳ ಸವಾರರಿಗೆ ತೊಂದರೆಯಾಗುತ್ತಿದೆ.

ಮೂರು ತಿಂಗಳ ಹಿಂದೆ ಡಾಂಬರೀಕರಣ ಮಾಡಿದ್ದ ರಸ್ತೆ ಇದಾಗಿದ್ದು, ತಿಂಗಳಿಂದ ಸುರಿಯುತ್ತಿರುವ ಮಳೆಯಿಂದಾಗಿ ಡಾಂಬರ್​ನ ಮೇಲ್ಪದರು ಸಂಪೂರ್ಣ ಕಿತ್ತು ಹೋಗಿದ್ದು, ಕೆಳಭಾಗದ ರಸ್ತೆ ಗೋಚರಿಸುತ್ತಲಿದೆ. ಇದು ಕಳಪೆ ಕಾಮಗಾರಿ ಎಂದು ಜನರು ಆರೋಪಿಸತೊಡಗಿದ್ದಾರೆ.

ಹರಡಿಕೊಂಡ ಜಲ್ಲಿ ಮಿಶ್ರಣ

ಬ್ರಹ್ಮಗಿರಿ ಸರ್ಕಲ್​ ಬಳಿ ರಸ್ತೆಗೆ ಹಾಕಿದ್ದ ಜಲ್ಲಿ ಮಿಶ್ರಣ ಕಿತ್ತುಹೋಗಿದ್ದರಿಂದ ಅವು ರಸ್ತೆಯಲ್ಲಿಯೇ ಹರಡಿಕೊಂಡಿದೆ. ಇದರ ಮೇಲೆಯೇ ಸಂಚರಿಸುವ ಅನಿವಾರ್ಯತೆ ಇರುವುದರಿಂದ ಅನೇಕ ಬೈಕ್​ ಸವಾರರು ಸ್ಕಿಡ್​ ಆಗಿ ಬಿದ್ದು ಗಾಯಗೊಳ್ಳುವಂತಾಗಿದೆ. ಜಿಲ್ಲಾಸ್ಪತ್ರೆಯ ಮಾರ್ಗವೂ ಆಗಿದ್ದರಿಂದ ಆಗಾಗ ಆಂಬುಲೆನ್ಸ್​ ಸಹ ಹರಡಿಕೊಂಡಿರುವ ಜೆಲ್ಲಿ ಮಿಶ್ರಣದ ಮೇಲೇಯೇ ಸಾಗುವುದರಿಂದ ಅಪಾಯ ಸಂಭವಿಸಬಹುದು ಎಂದು ಸಾರ್ವಜನಿಕರು ಆತಂಕ ವ್ಯಕ್ತಪಡಿಸಿದ್ದಾರೆ. ಕೂಡಲೇ ರಸ್ತೆ ರಿಪೇರಿ ಮಾಡುವಂತೆ ಒತ್ತಾಯಿಸಿದ್ದಾರೆ.