ಪಟಾಕಿ ಸಿಡಿದು ಬಾಲಕ ಸಾವು

ದೊಡ್ಡಬಳ್ಳಾಪುರ : ನಗರದ ಮುತ್ತೂರು ವಾರ್ಡ್​ನಲ್ಲಿ ಶುಕ್ರವಾರ ಗಣೇಶಮೂರ್ತಿ ವಿಸರ್ಜನಾ ಮೆರವಣಿಗೆ ಸಮಯದಲ್ಲಿ ರಸ್ತೆಯೂದ್ದಕ್ಕೂ ಮೆರವಣಿಗೆಗೆ ತರಲಾಗಿದ್ದ ಗಾಡಿಯ ಪವರ್​ ಲಿಫ್ಟರ್​ ವಾಹನದ ಇಂಜಿನ್​ ಮೇಲಿಟ್ಟಿದ್ದ ಪಟಾಕಿಗಳು ಸಿಡಿದು ಮುತ್ತೂರಿನ ತನುಷ್​ ರಾವ್​ (15) ಮೃತಪಟ್ಟು, ಪೊಲೀಸ್​ ಪೇದೆ ಸೇರಿ ಆರು ಮಂದಿ ಗಂಭೀರ ಗಾಯಗೊಂಡಿದ್ದಾರೆ. ಮುತ್ತೂರಿನ ಗಣೇಶ್​ (16) ಯೋಗೇಶ (15), ಚೇತನ್​ ಶಾವಿ (13), ಯುವಕ ಮುನಿರಾಜು (27) ಪವರ್​ ಲಿಫ್ಟ್​ ಚಾಲಕ ನಾಗರಾಜು (35) ಹಾಗೂ ಬಂದೋಬಸ್ತ್​ ಕರ್ತವ್ಯದಲ್ಲಿದ್ದ ಪೇದೆ ಜಾಕಿರ್​ ಹುಸೇನ್​ಗೆ ಗಾಯಗಳಾಗಿವೆ. ಎಲ್ಲರೂ ಮಣಿಪಾಲ್​ ಆಸ್ಪತ್ರೆ ಹಾಗೂ ಆದ್ಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. 10ಕ್ಕೂ ಹೆಚ್ಚು ಯುವಕರಿಗೆ ಗಾಯಗಳಾಗಿವೆ.

ಫ್ರೆಂಡ್ಸ್​ ವಿನಾಯಕ ಗ್ರೂಪ್​ನಿಂದ ಗಣೇಶ ವಿಸರ್ಜನೆಗೆಂದು ಟ್ರಾ$್ಯಕ್ಟರ್​ನಲ್ಲಿ ಮೆರವಣಿಗೆ ಬರುವಾಗ ಚಿಕ್ಕ ಕ್ರೇನ್​ ಬಿಸಿಯಾಗಿ, ಅದರ ಮೇಲೆ ಇಡಲಾಗಿದ್ದ ಪಟಾಕಿಗಳು ಏಕಾಏಕಿ ಸ್ಫೋಟಗೊಂಡು ಅವಡ ಸಂಭವಿಸಿದೆ. ಸ್ಥಳಕ್ಕೆ ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಸಿ.ಕೆ.ಬಾಬಾ, ಡಿವೈಎಸ್ಪಿ ರವಿ, ಇನ್​ಸ್ಪೆಕ್ಟರ್​ ಸಾದಿಕ್​ ಪಾಷಾ, ಅಮರೇಶ್​ಗೌಡ, ನವೀನ್​ ಕುಮಾರ್​ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಗಾಯಾಳುಗಳು ದಾಖಲಾಗಿರುವ ಆಸ್ಪತ್ರೆಗೆ ಭೇಟಿ ನೀಡಿ ಆರೋಗ್ಯ ವಿಚಾರಿಸಿದರು. ಮುತ್ತೂರಿನಾದ್ಯಂತ ಬಿಗಿ ಪೊಲೀಸ್​ ಬಂದೋಬಸ್ತ್​ ಏರ್ಪಡಿಸಲಾಗಿದೆ.