ಸಂಚಾರಕ್ಕೆ ಅಯೋಗ್ಯ ಗಡಿನಾಡ ರಸ್ತೆ

ಈಶ್ವರಮಂಗಲ: ಪುತ್ತೂರು ತಾಲೂಕಿನ ನೆಟ್ಟಣಿಗೆ ಮುಡ್ನೂರು ಗ್ರಾಮ ವ್ಯಾಪ್ತಿಯಲ್ಲಿ ಕರ್ನಾಟಕ ಕೇರಳ ಗಡಿಪ್ರದೇಶದಲ್ಲಿ ಹಾದು ಹೋಗುವ ಪಂಚೋಡಿ-ಕರ್ನೂರು-ಗಾಳಿಮುಖ ಅಂತಾರಾಜ್ಯ ಸಂಪರ್ಕ ರಸ್ತೆ ಸಂಪೂರ್ಣ ಹದಗೆಟ್ಟಿದೆ. ಈ ರಸ್ತೆಯಲ್ಲಿ ಸಂಚರಿಸುವ ನಾಗರಿಕರು ಸಂಕಷ್ಟಕ್ಕೀಡಾಗಿದ್ದಾರೆ.

ಇದು ಈ ಭಾಗದ ಪ್ರಮುಖ ಅಂತಾರಾಜ್ಯ ಸಂಪರ್ಕ ರಸ್ತೆಯೂ ಆಗಿದೆ. ಡಾಂಬರು ಎದ್ದುಹೋಗಿದ್ದು, ಜಲ್ಲಿ ಕಲ್ಲುಗಳು ರಸ್ತೆ ಬದಿಗೆ ಸರಿದು ರಾಶಿ ಬಿದ್ದಿವೆ. ಅಲ್ಲಲ್ಲಿ ಬೃಹತ್ ಗಾತ್ರದ ಹೊಂಡ- ಗುಂಡಿಗಳಾಗಿದೆ. ಕೆಲವಡೆ ರಸ್ತೆ ಸಂಪೂರ್ಣ ಕೆಸರುಮಯವಾಗಿದೆ. ಮಳೆಗಾಲದಲ್ಲಿ ರಾತ್ರಿ ಸಂಚಾರ ಅಪಾಯಕಾರಿಯಾಗಿ ಪರಿಣಮಿಸಿದೆ.

ಮಾಣಿ- ಮೈಸೂರು ಹೆದ್ದಾರಿಯ ಕಾವು ಎಂಬಲ್ಲಿಂದ ಈಶ್ವರಮಂಗಲ- ಕರ್ನೂರು ಮೂಲಕವಾಗಿ ಅತಿ ಕಡಿಮೆ ಅಂತರದಲ್ಲಿ ಜಾಲ್ಸೂರು- ಕಾಸರಗೋಡು ರಸ್ತೆಗೆ ಗಾಳಿಮುಖದಲ್ಲಿ ಸಂಪರ್ಕ ಕಲ್ಪಿಸುವ ಉಪಯುಕ್ತ ರಸ್ತೆ ಇದು. ಪ್ರಸ್ತುತ ಲಾಕ್‌ಡೌನ್ ಹಿನ್ನೆಲೆಯಲ್ಲಿ ಕರ್ನಾಟಕ- ಕೇರಳ ಗಡಿಭಾಗದ ಗಾಳಿಮುಖದಲ್ಲಿ ಬಂದ್ ಮಾಡಲಾಗಿದೆ. ಆದರೂ ಗಡಿಪ್ರದೇಶದ ಹೆಚ್ಚಿನ ಜನತೆ ಮತ್ತು ಕರ್ನೂರು ಭಾಗದ ಜನತೆ ನಿತ್ಯ ಅವಲಂಬಿಸಿಕೊಂಡಿದ್ದಾರೆ. ಆದರೆ ಪ್ರಸ್ತುತ ಈ ರಸ್ತೆ ಸಂಚಾರಕ್ಕೆ ಅಯೋಗ್ಯವಾಗಿರುವುದರಿಂದ ಈ ಗಡಿಭಾಗದ ಜನತೆ ಸಂಕಷ್ಟ ಅನುಭವಿಸಬೇಕಾಗಿ ಬಂದಿದೆ. ಗಡಿಪ್ರದೇಶದ ಜನತೆಗೆ ಅನಿವಾರ್ಯವಾದ ಈ ರಸ್ತೆಯನ್ನು ಆದಷ್ಟು ಶೀಘ್ರವಾಗಿ ಅಭಿವೃದ್ಧಿಗೊಳಿಸಲು ಸಂಬಂಧಪಟ್ಟವರು ಮುತುವರ್ಜಿ ವಹಿಸಬೇಕು ಎಂಬುವುದು ಕರ್ನೂರು, ಗಾಳಿಮುಖ ಭಾಗದ ಜನತೆಯ ಬೇಡಿಕೆ.