ಭಾರತರತ್ನ ಪ್ರಶಸ್ತಿ ಪಡೆದಿರುವ 48 ಗಣ್ಯರ ಹೆಸರನ್ನು 1 ನಿಮಿಷದಲ್ಲಿ ಹೇಳುತ್ತಾಳೆ, ಜೈನ ಧರ್ಮಕ್ಕೆ ಸಂಬಂಧಿಸಿದ ಭಜನೆ, ಡಿವಿಜಿ ಅವರ ಕಗ್ಗ, ಹನುಮಾನ್ ಚಾಲೀಸಾಗಳನ್ನು ನಿರರ್ಗಳವಾಗಿ ಪಠಿಸುತ್ತಾಳೆ. ಹೈಸ್ಕೂಲ್ ವಿದ್ಯಾರ್ಥಿಗಳಿಗೂ ಕಬ್ಬಿಣದ ಕಡಲೆ ಎನಿಸಿರುವ ಮಗ್ಗಿ ಇಶಾನಿ ಮಾತುಗಳಲ್ಲಿ ಮಹಾಕಾವ್ಯದಂತೆ ಬರುತ್ತಿದೆ. ಶಾಲೆಯ ಮಟ್ಟಿಲನ್ನೇ ತುಳಿಯದ ಈ ಅಸಾಧಾರಣ ಪ್ರತಿಭೆಗೆ ಸಂಕಲನ, ವ್ಯವಕಲನದ ಬಗ್ಗೆಯೂ ಮಾಹಿತಿಯಿದೆ, 13ನೇ ವಯಸ್ಸಿಗೆ ಐಎಎಸ್ ಪರೀಕ್ಷೆ ಬರೆಯಲು ಯುಪಿಎಸ್ಸಿಯಲ್ಲಿ ವಿಶೇಷ ಅವಕಾಶವಿದ್ದು ಅದನ್ನು ಬಳಸಿಕೊಂಡು ಮಗಳನ್ನು ಭಾರತೀಯ ನಾಗರೀಕ ಸೇವೆಗೆ ಕಳುಹಿಸುವ ಕನಸು ಪೋಷಕರಿಗಿದೆ. 7 ವರ್ಷದ ಬಾಲಕಿ 5 ಸಾವಿರ ಪ್ರಶ್ನೆಗಳಿಗೆ ಉತ್ತರಿಸಿರುವುದು ಈವರೆಗಿನ ಗಿನ್ನಿಸ್ ದಾಖಲೆಯಾಗಿದ್ದು ಅದನ್ನು ಬ್ರೇಕ್ ಮಾಡುವ ಸಾಮರ್ಥ್ಯ ಕಲ್ಪತರು ನಾಡಿನ ಇಶಾನಿಗಿದೆ.
