ಬದಲಾದ ಜೀವನ ಪದ್ಧತಿಯಿಂದ ಸಮಸ್ಯೆ: ವೈದ್ಯಕೀಯ ಸಂಘದ ಮಾಜಿ ಅಧ್ಯಕ್ಷೆ ಡಾ.ವಸುಮತಿರಾವ್ ಹೇಳಿಕೆ

ಮಂಡ್ಯ: ನಾವು ತಿನ್ನುತ್ತಿರುವ ಆಹಾರ ಹಾಗೂ ಮಲಗುತ್ತಿರುವ ಸಮಯ ಸರಿಯಾಗಿಲ್ಲ. ಇದರಿಂದಾಗಿ ದೇಹದ ಎಲ್ಲ ಅಂಗಗಳು ಸರಿಯಾದ ರೀತಿಯಲ್ಲಿ ಕೆಲಸ ಮಾಡುವುದಿಲ್ಲ. ಪರಿಣಾಮ ಇತ್ತೀಚಿನ ದಿನಗಳಲ್ಲಿ ರಕ್ತದೊತ್ತಡ, ಮಧುಮೇಹ, ಥೈರಾಡ್ ಸಮಸ್ಯೆ ಎದುರಿಸುತ್ತಿದ್ದೇವೆ ಎಂದು ಭಾರತೀಯ ವೈದ್ಯಕೀಯ ಸಂಘದ ಮಾಜಿ ಅಧ್ಯಕ್ಷೆ ಡಾ.ವಸುಮತಿರಾವ್ ಆತಂಕ ವ್ಯಕ್ತಪಡಿಸಿದರು.

ನಗರದ ಗಾಂಧಿಭವನದಲ್ಲಿ ಪಟ್ಟಣಗೆರೆ ರಂಗನಾಥಶಾಸ್ತ್ರಿ ಕೃಷ್ಣವೇಣಮ್ಮ ಮೆಮೋರಿಯಲ್ ಟ್ರಸ್ಟ್ ಮತ್ತು ಮಹಾತ್ಮಗಾಂಧಿ ಸ್ಮಾರಕ ಟ್ರಸ್ಟ್ ಸಹಯೋಗದಲ್ಲಿ ಆಯೋಜಿಸಿದ್ದ ಪಾರ್ಶ್ವವಾಯು ತಡೆ ಹಾಗೂ ಚಿಕಿತ್ಸೆ ಕುರಿತ ಸಂವಾದ, ಅಪೋಲೋ ಆಸ್ಪತ್ರೆಯ ಹಿರಿಯ ನರರೋಗ ತಜ್ಞ ಡಾ.ಪಿ.ಎಂ.ಸೂರ್ಯನಾರಾಯಣ ಶರ್ಮ ಅವರ ‘ಪಾರ್ಶ್ವವಾಯುವಿನಿಂದ ಚೈತನ್ಯದೆಡೆಗೆ’ ವೈದ್ಯ ಸಾಹಿತ್ಯದ ಪುಸ್ತಕದ ಪರಿಚಯ ಸಮಾರಂಭದಲ್ಲಿ ಮಾತನಾಡಿದರು.

ಬದಲಾದ ನಮ್ಮ ಜೀವನ ಪದ್ಧತಿ ಹಾಗೂ ಆಹಾರ ಸೇವನೆಯಿಂದಾಗಿ ಮನುಷ್ಯ ಹಲವು ರೀತಿಯ ಆರೋಗ್ಯ ಸಮಸ್ಯೆ ಕಾಣಿಸಿಕೊಳ್ಳುತ್ತಿದೆ. 22-23ರ ಯುವಜನರಲ್ಲೂ ಬಿ.ಪಿ, ಶುಗರ್ ಕಾಯಿಲೆ ಬಂದಿರುವುದನ್ನು ಗಮನಿಸಿದ್ದೇವೆ. 20 ವರ್ಷದಲ್ಲೇ ಏಕೆ ಈ ಕಾಯಿಲೆಗಳು ಬರುತ್ತಿವೆ ಎಂಬುದರ ಬಗ್ಗೆಯೂ ಸಾಕಷ್ಟು ಸಂಶೋಧನೆಗಳೂ ನಡೆದಿವೆ. ನಾವು ಜಂಕ್‌ಫುಡ್‌ನ್ನು ಹೆಚ್ಚಿಗೆ ಸೇವಿಸುತ್ತಿದ್ದೇವೆ. ಅದರಲ್ಲಿ ಫೈಬರ್ ಇರುವುದಿಲ್ಲ. ಸೇವಿಸಿದ ಆಹಾರದಷ್ಟು ಪ್ರಮಾಣದಲ್ಲಿ ನಾವು ವ್ಯಾಯಾಮವನ್ನು ಮಾಡುವುದಿಲ್ಲ. ಇದರಿಂದಾಗಿ ಇಂತಹ ಸಮಸ್ಯೆಯನ್ನು ಕಾಣಬಹುದಾಗಿದೆ ಎಂದು ವಿವರಿಸಿದರು.

ಜಪಾನಿನ ಓಕಿನೋವಾ ಎಂಬ ಗ್ರಾಮದಲ್ಲಿರುವ ಜನ ಸುಮಾರು 110 ರಿಂದ 120 ವರ್ಷಗಳ ಕಾಲ ಬದುಕುತ್ತಿದ್ದಾರೆ. ಈ ಬಗ್ಗೆ ಹಲವಾರು ಸಂಶೋಧನೆಗಳೂ ನಡೆದಿವೆ. ದಿನಕ್ಕೆ ಐದಾರು ಬಾರಿ ಹಣ್ಣು ಮತ್ತು ತರಕಾರಿಗಳನ್ನು ಸೇವಿಸುತ್ತಾರೆ. ಅವರು ಎಲ್ಲಿಗೇ ಹೋಗಬೇಕಾದರೂ ನಡೆದುಕೊಂಡೇ ಹೋಗುತ್ತಾರೆ. ನಾವು ಪಕ್ಕದ ರಸ್ತೆಗೆ ಹೋಗಬೇಕಾದರೂ ವಾಹನವನ್ನೇ ಅವಲಂಬಿಸುತ್ತೇವೆ. ಇದರಿಂದ ಆರೋಗ್ಯ ಸಮಸ್ಯೆಯನ್ನು ಎದುರಿಸುವಂತಾಗಿದೆ ಎಂದು ಹೇಳಿದರು.

ಮಿಮ್ಸ್ ಪ್ರಾಂಶುಪಾಲ ಡಾ.ಪಿ.ಎಸ್.ತಮ್ಮಣ್ಣ ಕಾರ್ಯಕ್ರಮ ಉದ್ಘಾಟಿಸಿದರು. ಪುಸ್ತಕದ ಲೇಖಕ ನರರೋಗ ತಜ್ಞ ಡಾ.ಪಿ.ಎಂ. ಸೂರ್ಯನಾರಾಯಣ ಶರ್ಮ, ರಾಜ್ಯ ಒಕ್ಕಲಿಗರ ಸಂಘದ ನಿರ್ದೇಶಕ ಅಶೋಕ್ ಜಯರಾಂ, ಸಾಹಿತಿ ಡಾ.ಪ್ರದೀಪ್‌ಕುಮಾರ್ ಹೆಬ್ರಿ, ಕಸಾಪ ಮಾಜಿ ಅಧ್ಯಕ್ಷ ಪ್ರೊ.ಜಿ.ಟಿ.ವೀರಪ್ಪ, ಟ್ರಸ್ಟಿನ ಅಧ್ಯಕ್ಷ ಪಿ.ಆರ್.ಜಗನ್ನಾಥ ಶರ್ಮ, ಅಪೋಲೋ ಆಸ್ಪತ್ರೆಯ ಮಾರುಕಟ್ಟೆ ವಿಭಾಗದ ಮುಖ್ಯಸ್ಥ ಗೋಪಿ, ಮಾರ್ಗದರ್ಶಕಿ ಬಿ.ಎಸ್.ಜಯಲಕ್ಷ್ಮಮ್ಮ ಇತರರಿದ್ದರು.