ಶಿರೂರು ಗುಡ್ಡ ಕುಸಿತದ ವೇಳೆ ನಾಪತ್ತೆಯಾಗಿದ್ದ 11 ಜನರ ಪೈಕಿ 8 ಜನರ ದೇಹಗಳು ಮೊದಲ 10 ದಿನಗಳಲ್ಲಿ ಪತ್ತೆಯಾಗಿದ್ದವು. ಮೂವರ ಸುಳಿವಿರಲಿಲ್ಲ. ಇದರಿಂದ 95 ಲಕ್ಷ ಖರ್ಚು ಮಾಡಿ ಗೋವಾದಿಂದ ಬಾರ್ಜ್ ಹಾಗೂ ಡ್ರಜ್ಜಿಂಗ್ ಯಂತ್ರವನ್ನು ತರಿಸಿ ಗಂಗಾವಳಿ ನದಿಯ ಆಳದಲ್ಲಿ ಕಾರ್ಯಾಚರಣೆ ನಡೆಸಲಾಯಿತು. ಈ ಸಂದರ್ಭದಲ್ಲಿ ಒಂದು ಬೆಂಜ್ ಲಾರಿ ಹಾಗೂ ಅದರಲ್ಲಿ ಕೇರಳದ ಚಾಲಕನ ಅರ್ಜುನ್ ಮೃತ ದೇಹ ಪತ್ತೆಯಾಗಿತ್ತು. ಡಿಎನ್ಎ ಪರೀಕ್ಷೆಯ ಮೂಲಕ ದೇಹ ಅರ್ಜುನ್ ಅವರದ್ದೇ ಎಂಬುದೂ ಖಚಿತವಾಗಿತ್ತು. ಆದರೆ, ಸ್ಥಳೀಯ ಜಗನ್ನಾಥ ನಾಯ್ಕ ಹಾಗೂ ಲೋಕೇಶ ನಾಯ್ಕ ಇನ್ನೂ ನಾಪತ್ತೆಯಾಗಿದ್ದು, ಅವರ ಅಸ್ತಿಯನ್ನಾದರೂ ತಂದು ಕೊಡಿ ಎಂದು ಕುಟುಂಬದವರು ಗೋಗರೆಯುತ್ತಿದ್ದಾರೆ. ಅಲ್ಲದೇ, ಇಬ್ಬರು ದುರ್ಘಟನೆಯಲ್ಲಿ ಮೃತಪಟ್ಟಿರುವುದು ದಾಖಲಾತಿಯಂತೆ ಖಚಿತವಾಗದ ಕಾರಣ ಅವರ ಕುಟುಂಬಗಳಿಗೆ ಕೇಂದ್ರ ಹಾಗೂ ರಾಜ್ಯ ಸರ್ಕಾರದಿಂದ ಘೋಷಿತ ಪರಿಹಾರವನ್ನೂ ನೀಡಲು ಸಾಧ್ಯವಾಗುತ್ತಿಲ್ಲ.
ಸೆ.30 ರಂದು ಎರಡು ಅಸ್ತಿಗಳು ಸಿಕ್ಕಿದ್ದು, ಡಿಎನ್ಎ ಪರೀಕ್ಷೆಯಿಂದ ಮಾತ್ರ ಅವು ಯಾರ ಅಸ್ತಿಗಳು ಎಂಬುದನ್ನು ಖಚಿತಪಡಿಸುಬಹುದಾಗಿದೆ. ಜಗನ್ನಾಥ ನಾಯ್ಕ ಅವರದ್ದೋ..? ಲೋಕೇಶ ನಾಯ್ಕ ಅವರದ್ದೋ..? ಅಥವಾ ದೇಹದ ಮೇಲ್ಭಾಗ ಮಾತ್ರ ಸಿಕ್ಕಿದ್ದ ತಮಿಳುನಾಡಿನ ಟ್ಯಾಂಕರ್ ಚಾಲಕನದ್ದೋ..? ಎಂಬುದು ಈಗ ಡಿಎನ್ಎ ಪರೀಕ್ಷೆ ಮಾಡಲಾಗುತ್ತಿದೆ. ಇದರಿಂದ ಈ ಪರೀಕ್ಷೆಯ ಬಗ್ಗೆಯೇ ಎಲ್ಲರ ಲಕ್ಷ÷್ಯ ನೆಟ್ಟಿದೆ. ಹಾಗೊಮ್ಮೆ ಮೂಳೆಗಳು ಯಾರವು ಎಂಬುದು ಡಿಎನ್ಎಯಲ್ಲಿ ಖಚಿತವಾಗದೇ ಹೋದರೆ 95 ಲಕ್ಷದ ಕಾರ್ಯಾಚರಣೆ ವ್ಯರ್ಥವಾಗಲಿದೆ. ಮಾತ್ರವಲ್ಲ ನಾಪತ್ತೆಯಾದವರ ಕುಟುಂಬಗಳಿಗೆ ಪರಿಹಾರ ನೀಡಲೂ ತಾಂತ್ರಿಕ ಸಮಸ್ಯೆ ಉಂಟಾಗಲಿದೆ.
