ಮಂಗಳೂರು: ಅಸೌಖ್ಯದಿಂದಿರುವ ವೃದ್ಧ ಬಡ ದಂಪತಿ, ಮುರಿದು ಬೀಳಬಹುದಾದ ಮನೆಯ ಮಾಡು, ಸರಿಪಡಿಸಲು ಅಡ್ಡಿಯಾದ ಮನೆಯ ಗೋಡೆಗೆ ಅಳವಡಿಸಿದ ವಿದ್ಯುತ್ ಕಂಬ.
ಇದು ಬೋಂದೆಲ್ ಚರ್ಚ್ ಹಿಂಬದಿ ಭಟ್ರಕೋಡಿ ಎಂಬಲ್ಲಿರುವ ಮರಿಗೌಡ (76) ಹಾಗೂ ಕಮಲಾ (65) ದಂಪತಿಯ ಮನೆಯ ದುಸ್ಥಿತಿ. ಈ ಕುಟುಂಬ ಸುಮಾರು 50 ವರ್ಷಗಳಿಂದ ಇಲ್ಲಿ ಒಂದೂವರೆ ಸೆಂಟ್ಸ್ ಜಾಗದಲ್ಲಿ ಸಣ್ಣದಾದ ಮನೆಯೊಂದರಲ್ಲಿ ವಾಸವಿದೆ. ವೃದ್ಧರಿಬ್ಬರೂ ವಯೋ ಸಹಜ ಆರೋಗ್ಯ ಸಮಸ್ಯೆಯಿಂದ ಬಳಲುತ್ತಿದ್ದು, ಹೆಣ್ಣು ಮಕ್ಕಳ ಆಸರೆಯಲ್ಲಿ ದಿನ ಕಳೆಯುತ್ತಿದ್ದಾರೆ.
ಮನೆಯ ಪಕ್ಕಾಸುಗಳು ಹಾಳಾಗಿದ್ದು, ಮಳೆಗಾಲದಲ್ಲಿ ಮಾಡು ಮುರಿದು ಬೀಳುವ ಸ್ಥಿತಿಯಲ್ಲಿದೆ. ಅದನ್ನು ಸರಿಪಡಿಸಲು ಸ್ಥಳೀಯ ಪೃಥ್ವಿ ಚಾರಿಟೇಬಲ್ ಟ್ರಸ್ಟ್ ಹಾಗೂ ಮೂಲತ್ವ ಫೌಂಡೇಶನ್ ಆಸಕ್ತಿ ವಹಿಸಿದ್ದು, ಗೋಡೆಗೆ ಅಳವಡಿಸಿದ ವಿದ್ಯುತ್ ಕಂಬ ಸಮಸ್ಯೆಯಾಗಿದೆ. ಕೆಲಸ ಮಾಡುವಾಗ ವಿದ್ಯುತ್ ತಂತಿಗೆ ತಾಗಿದರೆ ಅಪಾಯ ಸಂಭವಿಸುವ ಸಾಧ್ಯತೆ ಇದೆ. ಇಲ್ಲಿ ಕೆಲಸ ಮಾಡುವುದು ಅಪಾಯಕಾರಿಯಾಗಿದೆ.
ಕಳೆದ 30 ವರ್ಷಗಳಿಂದ ವಿದ್ಯುತ್ ಕಂಬ ಮನೆಯ ಗೋಡೆಯಲ್ಲಿದೆ. ಮಳೆಗಾಲದಲ್ಲಿ ಮಿಂಚು, ಸಿಡಿಲು ಬರುವಾಗ ಭಯವಾಗುತ್ತದೆ. ಕಂಬವನ್ನು ಸ್ಥಳಾಂತರಿಸುವಂತೆ ಹಲವು ಬಾರಿ ಸಂಬಂಧಪಟ್ಟವರಲ್ಲಿ ಮನವಿ ಮಾಡಿದರೂ ಯಾವುದೇ ಪ್ರಯೋಜನವಾಗಿಲ್ಲ. ಸುತ್ತ ಮುತ್ತ ಬೇರೆಯವರ ಜಾಗವಾದ ಕಾರಣ ಅವರ ಜಾಗದಲ್ಲಿ ಕಂಬ ಅಳವಡಿಸಲು ಒಪ್ಪುವುದಿಲ್ಲ. ಹೆಣ್ಣು ಮಗಳ ಜತೆ ಬಹಳ ಕಷ್ಟದಿಂದ ಜೀವ ಭಯದಲ್ಲಿ ವಾಸ ಮಾಡುತ್ತಿದ್ದೇವೆ ಎಂದು ಕಮಲಾ ವಿಜಯವಾಣಿಗೆ ತಿಳಿಸಿದ್ದಾರೆ.
