ಕೆರೆಯಲ್ಲಿ ನೀರು ಕಡಿಮೆಯಾಗಿದ್ದರೂ ಬೋಟಿಂಗ್ ವಿಹಾರಕ್ಕೆ ಯಾವುದೇ ತೊಂದರೆ ಉಂಟಾಗಿಲ್ಲ. ಯುವಕರು ಹೆಚ್ಚು ಆಗಮಿಸುತ್ತಿದ್ದು. ಸಂಜೆಯ ತಂಗಾಳಿಗೆ ಮೈಯೊಡ್ಡಿ ವಿಹರಿಸಿ ಖುಷಿ ಪಡುತ್ತಿದ್ದಾರೆ. ಕೆಲವರು ತಾವೇ ಬೋಟಿಂಗ್ ಪೆಡಲ್ ತುಳಿಯುತ್ತಾ ಮಜಾ ಅನುಭವಿಸುತ್ತಾರೆ. ವಾರದ ದಿನಗಳಲ್ಲಿ ಜನರ ಸಂಖ್ಯೆ ಕಡಿಮೆ ಇರುತ್ತದೆ. ಆದರೆ, ವಾರಾಂತ್ಯಕ್ಕೆ ಬೋಟಿಂಗ್ಗೆ ಸರದಿಯಲ್ಲಿ ನಿಲ್ಲಬೇಕು. ಜತೆಗೆ ಕೆರೆಯಲ್ಲಿನ ಬಸವೇಶ್ವರ ಮೂರ್ತಿ ಕೆಳಭಾಗದಲ್ಲಿ ಸ್ಥಾಪಿಸಿರುವ 12ನೇ ಶತಮಾನದ ಶರಣರ ಮಾಹಿತಿವುಳ್ಳ ಕಲಾಕೃತಿಯ ವಸ್ತು ಸಂಗ್ರಹಾಲಯ ಸಾರ್ವಜನಿಕರಿಗೆ ಮುಕ್ತವಾಗಿದೆ. ಪಾದದಿಂದ 111 ಅಡಿ, ಪ್ರದಕ್ಷಿಣೆ ಪಥದಿಂದ 116 ಅಡಿ ಎತ್ತರದ ಬಸವೇಶ್ವರ ಮೂರ್ತಿ ಪ್ರವಾಸಿಗರನ್ನು ಕೈಬೀಸಿ ಕರೆಯುತ್ತಿದೆ. ಇಲ್ಲಿರುವ ವಸ್ತು ಸಂಗ್ರಹಾಲಯಕ್ಕೆ ಭೇಟಿ ನೀಡಿದರೆ 12ನೇ ಶತಮಾನದ ಶರಣರ ಮಾಹಿತಿವುಳ್ಳ ಕಲಾಕೃತಿಗಳು ಕಣ್ಣಿಗೆ ಮುದನೀಡುತ್ತವೆ. ಅಲ್ಲದೆ, ಬಸವೇಶ್ವರ ಮೂರ್ತಿ ವೀಕ್ಷಣೆಗೆ ಬರುವ ಜನರು ಅಲ್ಲಿನ ಉದ್ಯಾನದಲ್ಲಿ ಕುಳಿತು ಕೆಲ ಹೊತ್ತು ಹರಟೆ ಹೊಡೆದು ಮನೆಗೆ ತೆರಳುತ್ತಾರೆ.
