ಸಂಸದರನ್ನು ಗೆಲ್ಲಿಸಿದ್ದು ನಾನೆ, ಕೆಪಿಸಿಸಿ ಅಧ್ಯಕ್ಷರು, ಸಂಸದರು ನಮ್ಮ ಬಳಿ ಇದ್ದಾರೆ ಎಂದು ಶಾಸಕ ಎ. ಮಂಜುನಾಥ್ ಹೇಳುತ್ತಿರುವುದನ್ನು ನೋಡಿದರೆ ನಮ್ಮ ಪಕ್ಷದ ವರಿಷ್ಠರ ಬಗ್ಗೆಯೇ ಅನುಮಾನದ ಜತೆಗೆ ಆತಂಕ ಮೂಡುತ್ತಿದೆ. ಸಂಸದ ಡಿ.ಕೆ. ಸುರೇಶ್, ಕೆಪಿಸಿಸಿ ಅಧ್ಯಕ್ಷ ಡಿ.ಕೆ. ಶಿವಕುಮಾರ್ ಆದೇಶದಂತೆ ಕರೊನಾ ಹಿನ್ನೆಲೆಯಲ್ಲಿ ಕಾರ್ಯಕರ್ತರೊಂದಿಗೆ ಗ್ರಾಮಗಳಿಗೆ ತೆರಳಿ ಕೈಲಾದ ಕೆಲಸ ಮಾಡುತ್ತಿದ್ದೇವೆ. ಇಷ್ಟೆಲ್ಲ ಮಾಡಿದರೂ ಕಾಲೆಳೆಯುವುದನ್ನು ನೋಡಿದರೆ ಕಾಂಗ್ರೆಸ್ ಸಂಘಟಿಸಬೇಕೆ, ಬೇಡವೆ ಎಂಬ ಗೊಂದಲ ಶುರುವಾಗಿದೆ. ಜೆಡಿಎಸ್ ಶಾಸಕರ ಮಾತಿನ ವರಸೆ ನೋಡಿದರೆ ಸಂಸದ, ಕೆಪಿಸಿಸಿ ಅಧ್ಯಕ್ಷರನ್ನೇ ನಿಯಂತ್ರಣದಲ್ಲಿಟ್ಟುಕೊಂಡಂತೆ ಭಾಸವಾಗುತ್ತದೆ. ಈ ಬಗ್ಗೆ ಸಂಸದರೇ ಸ್ಪಷ್ಟನೆ ನೀಡಬೇಕು. ಎದುರಿಗಿರುವ ಶತ್ರುವನ್ನು ಎದುರಿಸಬಹುದು. ಆದರೆ, ಪಕ್ಕದಲ್ಲೇ ಕುಳಿತು ಚುಚ್ಚಿದರೆ ಹೇಗೆ ಎಂದು ಶಾಸಕರು, ಸಂಸದರ ನಡೆ ವಿರುದ್ಧ ಟೀಕಾ ಪ್ರಹಾರ ನಡೆಸಿದರು. ಹಣಕ್ಕಾಗಿ ರಾಜಕಾರಣ ಮಾಡುವುದು ನಮ್ಮ ಕುಟುಂಬಕ್ಕೆ ಅಗತ್ಯವಿಲ್ಲ. ಬಿಡದಿ ಕೆಐಎಡಿಬಿ ವಿಷಯದಲ್ಲಿ ರೈತರಿಗೆ, ನನ್ನನ್ನು ನಂಬಿದವರಿಗೆ ಮೋಸವಾಗಲು ಬಿಡಲ್ಲ. ಶಾಸಕರನ್ನು ಎಂದಿಗೂ ಏಕವಚನದಲ್ಲಿ ನಿಂದಿಸಿಲ್ಲ ಎಂದರು.
