ಸಾಲಬಾಧೆಗೆ ಬಿಸಲಹಳ್ಳಿ ರೈತ ಆತ್ಮಹತ್ಯೆ

ಬ್ಯಾಡಗಿ: ಸಾಲಬಾಧೆ ತಾಳಲಾರದೆ ರೈತನೊಬ್ಬ ಆತ್ಮಹತ್ಯೆ ಮಾಡಿಕೊಂಡ ಘಟನೆ ತಾಲೂಕಿನ ಬಿಸಲಹಳ್ಳಿ ಗ್ರಾಮದಲ್ಲಿ ಜರುಗಿದೆ.

ಮೃತನನ್ನು ಕುರುವತ್ತೆಪ್ಪ ಪುಟ್ಟಪ್ಪ ಪೂಜಾರ (56) ಎಂದು ತಿಳಿದುಬಂದಿದೆ. ಇವರಿಗೆ 1.14 ಗುಂಟೆ ಕೃಷಿ ಜಮೀನಿದ್ದು, ಬ್ಯಾಡಗಿಯ ಕೆವಿಜಿ ಬ್ಯಾಂಕ್​ನಲ್ಲಿ 1.20 ಲಕ್ಷ ರೂ ಹಾಗೂ ಪಿಎಲ್​ಡಿ ಬ್ಯಾಂಕ್​ನಲ್ಲಿ 1 ಲಕ್ಷ ಹಾಗೂ ಸಹಕಾರಿ ಸಂಘದಲ್ಲಿ 60 ಸಾ.ರೂ. ಸಾಲವಿದೆ. 4 ವರ್ಷಗಳಿಂದ ಬಿತ್ತಿದ ಬೆಳೆ ಬಾರದೆ ಬೇಸರಗೊಂಡಿದ್ದ ರೈತ ತೀವ್ರ ಸಾಲದಲ್ಲಿ ಸಿಲುಕಿದ್ದರು. ಇದೇ ನೋವಿನಲ್ಲಿ ಭಾನುವಾರ ಮನೆಯಲ್ಲಿ ನೇಣಿಗೆ ಶರಣಾಗಿದ್ದಾರೆ. ಈ ಕುರಿತು ಬ್ಯಾಡಗಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.