ಐದು ತಿಂಗಳ ಗರ್ಭಿಣಿ ಆಗಿದ್ದಂತಹ ಬಿಲ್ಕಿಸ್ ಬಾನು ಎದುರಿಸಿದ ಭಯಾನಕತೆ ಮತ್ತು ಮಾನಸಿಕ ಆಘಾತವನ್ನು ನೆನಪಿಸಿಕೊಳ್ಳಲು ಸಾಧ್ಯವಿಲ್ಲ. ಆಕೆಯ ಮೇಲೆ ಸಾಮೂಹಿಕ ಅತ್ಯಾಚಾರವೆಸಗಿ, ಆಕೆಯ ಕಣ್ಣೆದುರೆ ಅವಳ ಮೂರು ವರ್ಷದ ಮಗುವನ್ನು ಗೋಡೆಗೆ ಅಪ್ಪಳಿಸಿ ಸಾಯಿಸಿ, ಅವಳ ಕುಟುಂಬದ ಏಳು ಸದಸ್ಯರನ್ನು ಕೊಲೆ ಮಾಡಲಾಗಿತ್ತು. ಇಂತಹ ಭೀಕರ ಮತ್ತು ಆಘಾತಕಾರಿ ಸನ್ನಿವೇಶವನ್ನು ಎದುರಿಸಿದ ಬಿಲ್ಕಿಸ್ ಬಾನು ಧೈರ್ಯದಿಂದ ಹೋರಾಡಿ, ನ್ಯಾಯಾಲಯದಿಂದ ನ್ಯಾಯಾಲಯಕ್ಕೆ ಪರದಾಡಿದಳು. ಕೊನೆಯದಾಗಿ 2008ರಲ್ಲಿ ಮುಂಬೈಯ ವಿಶೇಷ ಸಿಬಿಐ ನ್ಯಾಯಾಲಯವು 11 ಅಪರಾಧಿಗಳಿಗೆ ಜೀವಾವಧಿ ಶಿಕ್ಷೆಯನ್ನು ವಿಧಿಸಿತು. ಗುಜರಾತ್ ಸರ್ಕಾರವು ಇಂತಹ ಘೋರ ಅಪರಾಧವೆಸಗಿದ ಅಪರಾಧಿಗಳನ್ನು ತನ್ನ ಹಳೆಯ ಕ್ಷಮಾಪಣಾ ನೀತಿಯಡಿಯಲ್ಲಿ ಬಿಡುಗಡೆ ಮಾಡಿರುವುದು ಆಘಾತಕಾರಿ ವಿಷಯವಾಗಿದೆ. ಸರ್ಕಾರದ ಈ ನಡೆಯಿಂದ ಬಿಲ್ಕಿಸ್ ಬಾನು ಜೀವಕ್ಕೆ ಅಪಾಯ ಇರುವುದಲ್ಲದೆ, ಇದೇ ರೀತಿಯ ಅಪರಾಧಕ್ಕೆ ಬಲಿಪಶುವಾಗಿರುವ ಸಂತ್ರಸ್ತರಿಗೂ, ಅಪರಾಧಿಗಳಿಗೆ ಕೊನೆಯವರೆಗೂ ಶಿಕ್ಷೆ ಆಗುವುದರ ಭರವಸೆಯ ಆಶಾಕಿರಣ ಇಲ್ಲದಾಗುತ್ತದೆ ಎಂದು ಪ್ರತಿಭಟನಾಕಾರರು ಅಸಮಾಧಾನ ವ್ಯಕ್ತಪಡಿಸಿದರು.
