ಸಾರ್ವಜನಿಕ ಸ್ಥಳದಲ್ಲಿ ಅತಿವೇಗ ಮತ್ತು ಅಜಾಗರೂಕತೆಯಿಂದ ಕರ್ಕಶ ಶಬ್ದವನ್ನು ಮಾಡುತ್ತಾ ವ್ಹೀಲಿಂಗ್ ಮಾಡುತ್ತಾ ಚಾಲನೆ ಮಾಡುವ ಪ್ರಕರಣಗಳು ನಿರಂತರವಾಗಿ ನಡೆಯುತ್ತಿದ್ದು ಒಂದೆಡೆ ಹುಡುಗರ ಹುಚ್ಚು ಸಾಹಸಕ್ಕೆ ಹುಡುಗಿಯರು ಸಾಥ್ ನೀಡುತ್ತಿದ್ದಾರೆ. ಸಿನಿಮಾಗಳ ದೃಶ್ಯದ ಮಾದರಿಯಲ್ಲಿ ಪ್ರಿಯಕರ ಜತೆಗೆ ಪ್ರಿಯತಮೆ ಹೋಗಿ ಥ್ರಿಲ್ ಅನುಭವಿಸುವುದು, ಆಗಾಗ ಕೆಳಗೆ ಬಿದ್ದು ಗಾಯಗೊಳ್ಳುವಂತಹುದು ಸಾಮಾನ್ಯವಾಗಿದೆ. ಇದರ ನಡುವೆ ಅಮಾಯಕ ಜನರು ಸಹ ತೊಂದರೆ ಅನುಭವಿಸುವಂತಾಗಿದೆ. ಸ್ಥಳೀಯರು ಅನಾಹುತಗಳ ಸಾಧ್ಯತೆಯ ಬಗ್ಗೆ ಸಲಹೆ ಸೂಚನೆಗಳನ್ನು ನೀಡಿದರೂ ಕಿವಿಗೊಡುವುದಿಲ್ಲ. ಬದಲಿಗೆ ಹಾರಿಕೆ ಉತ್ತರವನ್ನು ನೀಡಲಾಗುತ್ತದೆ. ಮತ್ತೊಂದೆಡೆ ಪೊಲೀಸರು ಬರುತ್ತಿದ್ದಂತೆ ಕಿಡಿಗೇಡಿಗಳು ಪರಾರಿಯಾಗುವುದರಿಂದ ಸೂಕ್ತ ಕ್ರಮ ಕೈಗೊಳ್ಳಲಾಗುತ್ತಿಲ್ಲ. ಇದಕ್ಕೆ ಪೊಲೀಸರು ನಿರಂತರ ಕಾರ್ಯಾಚರಣೆ ಕೈಗೊಂಡು, ಕಿಡಿಗೇಡಿಗಳ ಪುಂಡಾಟಕ್ಕೆ ಕಡಿವಾಣ ಹಾಕಬೇಕು ಎನ್ನುವುದು ಸಾರ್ವಜನಿಕರ ಒತ್ತಾಯವಾಗಿದೆ.
