ಮೈನವಿರೇಳಿಸಿದ ಬೈಕ್ ಸ್ಟಂಟ್

ಹುಬ್ಬಳ್ಳಿ: ಬಜಾಜ್ ಆಟೋ ಲಿಮಿಟೆಡ್ ಹಾಗೂ ಚನ್ನಮ್ಮ ಬಜಾಜ್ ವತಿಯಿಂದ ನಗರದ ಹೋಟೆಲ್ ಡೆನಿಸನ್ಸ್ ಆವರಣದಲ್ಲಿ ಶನಿವಾರ ಆಯೋಜಿಸಿದ್ದ ‘ಪಲ್ಸರ್ ಮೇನಿಯಾ’ ಕಾರ್ಯಕ್ರಮದಲ್ಲಿ ಪರಿಣತರು ಪ್ರದರ್ಶಿಸಿದ ಬೈಕ್ ಸ್ಟಂಟ್ ಮೈನವಿರೇಳಿಸಿತು.

ಬ್ಯಾಂಡಿಡೋಸ್ ಪಿಟ್​ಸ್ಟಾಪ್ ತಂಡದ ಜಾಬಿನ್, ವೈಷ್ಣವ ಹಾಗೂ ಆಕಾಶ ಪಲ್ಸರ್ ಬೈಕ್​ನಲ್ಲಿ ವ್ಹೀಲಿಂಗ್, ಇತ್ಯಾದಿ ಸ್ಟಂಟ್​ಗಳ ಮೂಲಕ ಗಮನ ಸೆಳೆದರು. ಬೈಕ್​ನ ಮುಂದಿನ ಚಕ್ರವನ್ನು ಮೇಲಕ್ಕೆ ಎತ್ತಿ ವ್ಹೀಲಿಂಗ್ ಮಾಡುತ್ತ ಬೈಕ್ ಆಸನದ ಮೇಲೆ ಕಾಲಿಟ್ಟು ಒಂದೇ ಕೈಯಲ್ಲಿ ಬೈಕ್ ಚಲಾಯಿಸುವ, ವೇಗದ ಚಾಲನೆಯಲ್ಲೂ ತ್ವರಿತವಾಗಿ ಬೈಕ್​ನ್ನು ಟರ್ನ್ ಮಾಡುವ, ಇತ್ಯಾದಿ ಸ್ಟಂಟ್​ಗಳನ್ನು ಪ್ರದರ್ಶಿಸಿದರು.

ಇದೇ ವೇಳೆ ಉತ್ಸಾಹಿ ಯುವಕರಿಗೂ ಬೈಕ್ ಸ್ಟಂಟ್ ಕಲಿಸಲಾಯಿತು. ಆಸಕ್ತಿಯಿಂದ ಮುಂದೆ ಬಂದ ಯುವಕರಿಗೆ ಸುರಕ್ಷತೆ ದೃಷ್ಟಿಯಿಂದ ವ್ಹೀಲಿಂಗ್ ರಿಗ್ ಅಳವಡಿಸಿ ಬೈಕ್​ನಲ್ಲಿ ಸ್ಟಂಟ್ ಹೇಳಿ ಕೊಡಲಾಯಿತು. ನಿರ್ದಿಷ್ಟ ಅಂತರವನ್ನು ಕಡಿಮೆ ಅವಧಿಯಲ್ಲಿ ಕ್ರಮಿಸುವ, ಜಿಗ್​ಜಾಗ್ ಟ್ರ್ಯಾಕ್​ನಲ್ಲಿ ಬೈಕ್ ಚಲಾಯಿಸುವ ಸ್ಪರ್ಧೆಯನ್ನು ಏರ್ಪಡಿಸಲಾಗಿತ್ತು.

ಮುಖ್ಯ ಅತಿಥಿಯಾಗಿದ್ದ ಯುವ ಕಾಂಗ್ರೆಸ್ ಮುಖಂಡ ರಜತ್ ಉಳ್ಳಾಗಡ್ಡಿಮಠ ಮಾತನಾಡಿ, ಬಜಾಜ್ ಕಂಪನಿಯ ಪಲ್ಸರ್ ತುಂಬಾ ಸದೃಢವಾದ ಬೈಕ್. ಇದು ಕಳೆದ ವರ್ಷವೇ 10 ಲಕ್ಷ ಗ್ರಾಹಕರ ಗುರಿಯನ್ನು ತಲುಪಿದೆ. ಬೈಕ್​ನಲ್ಲಿ ಸ್ಟಂಟ್ ಮಾಡುವುದನ್ನು ಪೋಷಕರು ಒಪ್ಪುವುದಿಲ್ಲ. ಸುರಕ್ಷಾ ಕ್ರಮಗಳನ್ನು ಅಳವಡಿಸಿಕೊಂಡು ಸ್ಟಂಟ್ ಪ್ರದರ್ಶನಕ್ಕೆ ಇಲ್ಲಿ ಮಹತ್ವ ನೀಡಲಾಗಿದೆ ಎಂದರು.

ಚನ್ನಮ್ಮ ಬಜಾಜ್ ಮಾಲೀಕ ಶಿವಲಿಂಗಯ್ಯ ಗಡ್ಡದೇವರಮಠ, ಪ್ರಧಾನ ವ್ಯವಸ್ಥಾಪಕ ಶೇಖರಪ್ಪ ಬಿ.ಎಚ್., ಬಜಾಜ್ ಆಟೋ ಲಿಮಿಟೆಡ್​ನ ಪ್ರಾದೇಶಿಕ ವ್ಯವಸ್ಥಾಪಕ (ಮಾರಾಟ) ಸಿಂಗಾರವೇಲು, ಪ್ರಾದೇಶಿಕ ವ್ಯವಸ್ಥಾಪಕ (ಸೇವೆ) ರಾಜೇಶ, ಬಜಾಜ್ ಫೈನಾನ್ಸ್​ನ ಅಧಿಕಾರಿಗಳು, ಸಿಬ್ಬಂದಿ, ಇತರರು ಇದ್ದರು.