ನಂಬರ್​ ಪ್ಲೇಟ್​ ಮೇಲೆ POLICE ಎಂದು ಬರೆಸಿ ರಾಜಾರೋಷವಾಗಿ ಬಂದ ಬೈಕ್ ಸವಾರನಿಗೆ ಕಾದಿತ್ತು ಶಾಕ್​​!

ಬೆಂಗಳೂರು: ಯಾರಿಗೂ ಗೊತ್ತಾಗುವುದಿಲ್ಲ ಅಂದುಕೊಂಡು ಬೈಕ್​ ಮೇಲೆ ಪೊಲೀಸ್​ ಎಂದು ಬರೆಯಿಸಿಕೊಂಡು ತಿರುಗಾಡುತ್ತಿದ್ದ ಸವಾರನಿಗೆ ಬೆಂಗಳೂರು ಸಂಚಾರಿ ಪೊಲೀಸರು ಭಾನುವಾರ ಬಿಸಿ ಮುಟ್ಟಿಸಿದ್ದಾರೆ.

ಹೌದು, ಬೈಕ್​ ಸವಾರನೊಬ್ಬ ಆಂಧ್ರ ಪ್ರದೇಶದ ಅನಂತಪುರದಿಂದ ಬೆಂಗಳೂರುವರೆಗೆ ನಂಬರ್​ ಪ್ಲೇಟ್ ಮೇಲೆ 'POLICE' ಎಂದು ಬರೆಸಿಕೊಂಡು ರಾಜಾರೋಷವಾಗಿ ಬಂದಿದ್ದ. ಆತನನ್ನು ಕೆ.ಆರ್​.ಪುರಂ ಸಂಚಾರಿ ಠಾಣಾ ಪೊಲೀಸರು ತಡೆದು ವಿಚಾರಿಸಿದಾಗ ಸಿಕ್ಕಿಬಿದ್ದಿದ್ದಾನೆ. ತಕ್ಷಣ ಆತನಿಗೆ 2000 ರೂ. ದಂಡ ವಿಧಿಸಿ ಪೊಲೀಸರು ಬಿಸಿ ಮುಟ್ಟಿಸಿದ್ದಾರೆ. ಇನ್ನು ಮುಂದೆ ಇದೇ ರೀತಿ ಮಾಡಿದ್ರೆ ಕಠಿಣ ಕ್ರಮ ತೆಗೆದುಕೊಳ್ಳುವುದಾಗಿ ಎಚ್ಚರಿಕೆ ನೀಡಿದ್ದಾರೆ.

ಇದನ್ನೂ ಓದಿ: ಎಲೆಕ್ಟ್ರಾನಿಕ್ಸ್​ ಚಿಪ್​ ಅಳವಡಿಸಿ ಗ್ರಾಹಕರಿಗೆ ಮೋಸವೆಸಗುತ್ತಿದ್ದ 33 ಪೆಟ್ರೋಲ್​ ಬಂಕ್ಸ್​ ಸೀಜ್! ​

ಈ ವಿಚಾರವನ್ನು ಕೆ.ಆರ್​. ಪುರಂ ಪೊಲೀಸರು ಟ್ವಿಟರ್​ನಲ್ಲಿ ಹಂಚಿಕೊಂಡಿದ್ದು, ಸಾಕಷ್ಟು ಮೆಚ್ಚುಗೆಗಳು ವ್ಯಕ್ತವಾಗಿವೆ. ಕೆಲವರು PRESS ಎಂದು ಬರೆಸಿಕೊಂಡು ನಗರದಲ್ಲಿ ಓಡಾಡುತ್ತಿದ್ದಾರೆ ಅವರ ಬಗ್ಗೆಯೂ ಸ್ವಲ್ಪ ವಿಚಾರಿಸಿ ಎಂದು ಆಗ್ರಹಿಸಿದ್ದಾರೆ.